 |
|
Iвонка Сурвіла
Старшыня Рады БНР Iвонка Сурвіла (Шыманец) нарадзілася 11 красавіка 1936 году ў Стоўбцах. З 1944 году – у эміграцыі. Жыла ў Францыі‚ Даніі‚ Гішпаніі. Цяпер жыве ў Канадзе. Мае дзьвюх дачок.
Вучылася ў Вышэйшай мастацкай школе ў Парыжы‚ скончыла лінгвістычнае аддзяленьне Сарбонскага ўнівэрсытэту (1959).
Акрамя роднае мовы‚ валодае яшчэ васьмю: францускай‚ гішпанскай‚ ангельскай‚ нямецкай‚ дацкай‚ лацінскай‚ нарвэскай‚ польскай.
У 1958-1965 гадох працавала ў беларускай рэдакцыі Гішпанскага нацыянальнага радыё. З 1969 году і да апошняга часу працавала англа-францускім перакладчыкам у Фэдэральным урадзе Канады.
Займалася жывапісам‚ удзельнічала ў мастацкіх выставах.
У 1989 годзе арганізавала Канадзкі фонд дапамогі ахвярам Чарнобыля ў Беларусі і заставалася ягоным кіраўніком да моманту абраньня Старшынёй Рады БНР.
Задавайце пытаньні |
|
2003
2004
2005
2006 |
| [ 07/04/2006 13:59 ] |
| Некаторыя беларускія "экспэрты", паліваючы брудам БНР, робяць акцэнт на тым, што падчас нямецкай акупацыі БЦР карысталася такой самай сымболікай. А ці ёсьць увогуле нейкая сувязь паміж БНР і "нямецкай" БЦР? |
Дзякую за Вашае пытаньне. Экспэрты, пра якіх Вы гаворыце, як выглядае, ёсьць экспэртамі перад усім у антыбеларускай прапагандзе. Раіла б ім пацікавіцца таксама гісторыяй...
Рада Беларускай Народнай Рэспублікі была выбраная Ўсебеларускім Кангрэсам. У апошнія дні 1917 году Ўсебеларускі кангрэс даручыў ёй давесьці да канца працу. Якую ён мусіў перарваць з прычыны бальшавіцкай агрэсіі. Беларуская Цэнтральная Рада. Ці БЦР, была створаная падчас Другой усясьветнай вайны, калі Беларусь была пад нямецкай акупацыяй.
Рада БНР ніколі не супрацоўнічала з БЦР. Пад час вайны Рада БНР ужо была на выгнаньні.
|
| [ 07/04/2006 14:01 ] |
| Што ёсьць на ангельскай мове пра БНР? Мой англамоўны сябра шукаў інфармацыю пра гісторыю БНР і сказаў, што ніякіх кніг ці проста мінімальнай інфармацыі няма. Чаму так? Актывісты БНР жылі ў эміграцыі. Няўжо яны не маглі паклапаціцца пра свой імідж, прысутнасьць, піяр у англамоўных публікацыях і СМІ? |
| Фактычна, існуе даволі шмат матэрыялаў. Цікавая кніга “Byelarussian Statehood”, выдадзеная Беларускім Інстытутам Навукі і Мастацтва ў Нью-Ёрку пад рэдакцыяй Вітаўта і Зоры Кіпель у 1988 годзе. У ёй 66 старонак прысьвечана БНР. У Гісторыі Беларусі Янкі Запрудніка "At a Crossroad in History", у ягоным “Historical Dictionary of Belarus” таксама можна шмат даведацца. Гэтыя кнігі зьмяшчаюць і падрабязныя біяграфіі. Нарэшце, сябрамі Рады БНР выдаецца штоквартальны бюлетэнь “Belarusian Review”, які паступае ў тым ліку ў Кангрэс ЗША. Аднак Рада БНР ніколі не займалася піяр-кампаніямі самой сябе. Яе мэтай заўсёды было змаганьне за Незалежнасьць і лепшую долю беларускага народу. Інфармавала яна пра Беларусь, пра гісторыю Беларусі, бараніла інтарэсы Беларусі – не свае. Тое самае робім і цяпер. Імідж Беларусі для нас ёсьць шмат важнейшым за імідж Рады. |
| [ 07/04/2006 14:02 ] |
| Наколькі рэальнай была БНР у 1918? Не было ж ні арміі, ні пашпартоў, ні іншых патрэбных рэчаў... І што ўяўляе зь сябе БНР 2006 году? Што гэта за структура, што яна робіць і якімі дасягненьнямі можа пахваліцца? Дзякуй вялікі. Андрэй. |
Была гэта беларуская дзяржава са сваім урадам, сваімі ўстановамі, прызнанымі дэ-юрэ альбо дэ-факта шматлікімі іншымі дзяржавамі. Войска ня мела, хаця Случчакі змагаліся пад сьцягам БНР. Але пашпарты, безумоўна, былі, як і іншыя, як Вы, Андрэй. Кажаце, “патрэбныя рэчы”. Прыкладам, пошта. На зьнішчанай вайной беларускай зямлі паўсталі беларуская адміністрацыя, беларуская школьніцтва. На беларускай мове ёсьць вельмі шмат матэрыялаў пра гэта. Ці Вы чулі пра два першыя тамы Архіваў БНР пад рэдакцыяй Сяргея Шупы, выдадзеныя ў 1998 годзе? Рыхтуюцца цяпер наступныя. Раіла б Вам іх пагартаць.
Што да цяперашняй Рады, дык хачу найперш сказаць, чым Рада ня ёсьць. Яна ня ёсьць “эмігранцкая арганізацыя”, якая займаецца справамі эміграцыі. Рада ёсьць экзыльным урадам (урадам на выгнаньні), мэта наша – не дапусьціць, каб беларускі народ ізноў згубіў сваю дзяржаву і зноў зрабіўся расейскай калёніяй. Небясьпека гэтая зусім рэальная, і будзе захоўвацца, пакуль Лукашэнка застаецца пры ўладзе. Рада займаецца лабіраваньнем беларускіх інтарэсаў, беспасрэдна кантактуючыся з урадамі краінаў, якія могуць дапамагчы Бацькаўшчыне. Адначасна выкарыстоўваем паўсюль, дзе магчыма, сродкі масавай інфармацыі, – пішам лісты, дэманструем, дыскутуем, прыцягваем увагу да Беларусі. Тут хацела б адзначыць, што Беларусь не страціла б Незалежнасьць у 1918 годзе, калі б мела такіх прыяцеляў у Вэрсалі, якіх мае цяпер у Вашынгтоне і Брусэлі, дзякуючы ў немалой ступені і дзейнасьці беларускай дыяспары. |
| [ 07/04/2006 14:05 ] |
| Шаноўная спадарыня Івонка, Вы маеце вялікі досьвед у лінгвістыцы, мовазнаўстве, жывапісу, культуры, але наколькі вялікі Вы маеце досьвед у палітыцы? Ці ёсьць у Вас рэальны палітычны вопыт? З кім зь вядомых сусьветных палітыкаў Вы сустракаліся? Што зь імі абмяркоўвалі? |
Дзякуй за гэтае цікавае пытаньне. Некаторыя паняцьці – а між імі і палітыка – маюць зусім іншы сэнс у заходнім сьвеце. Тут уважаецца, што калі Вы нават не бярэце ўдзел у нейкай палітычнай акцыі, напрыклад дэманстрацыі, Вы ўсё роўна займаецеся палітыкай, бо адмаўляеце ў падтрымцы справе, пра якую ідзе гаворка. Калі б нашыя людзі ў Беларусі гэта разумелі, дык магчыма, выйшлі б на плошчу Каліноўскага не дзясяткамі тысяч, а сотнямі тысяч 19 сакавіка.
Асабіста я брала ўдзел ня толькі ў беларускіх, але і наагул у грамадзкіх справах цягам усяго майго жыцьця. У Канадзе вельмі цікавілася палітыкай шматкультур’я, была сябрам управаў шматлікіх арганізацыяў. Удзельнічала ў рэдагаваньні іх Статутаў, выступалі ў СМІ, спатыкалася з палітыкамі. Калі мы тут стварылі вельмі пасьпяховы Фонд дапамогі ахвярам Чарнобылю ў Беларусі, які я ўзначальвала восем гадоў, мне вельмі прыдалося гэтае дасьведчаньне. Я таксама працавала 27 галоў у канадыйскай адміністрацыі ў Атаве. Гэта дало магчымасьць блізка спазнаць палітычнае жыцьцё краіны. Што да палітыкаў, зь якімі спатыкалася, цяжка ўсіх пералічыць. Скажу толькі, што вельмі ганаруся знаёмствам з Вацлавам Гаўлам, які ёсьць ня толькі эўрапейскім, але і ўсясьветным маральным аўтарытэтам. Даволі дзіўнае паняцьце “прафэсійны палітык” да яго абсалютна не адносіцца.
|
| [ 07/04/2006 14:08 ] |
| Шаноўная спадарыня Івонка, чаму вэбсайт Рады БНР такі прымітыўны і статычны? Няўжо так цяжка зрабіць нешта больш цікавае -- па мінімуме, нейкую стужку навінаў і новых прэс-рэлізаў і зваротаў. Можна зрабіць блог, дзе Івонка Сурвіла магла-б публікаваць тыя-ж самыя звароты і выказваць свае думкі пра сытуацыю ў Беларусі і дзейнасьць БНР. Гэта і ёсьць маё галоўнае пажаданьне для Рады БНР -- не забывайцеся на Інтэрнэт. Гэта самы пэрспэктыўны сродак інфармаваньня. |
| Шчыра дзякую за канструктыўную крытыку. На жаль, як я ўжо казала, Рада ніколі не прыдавала шмат увагі ўласнай піяр-кампаніі. Заўсёды былі больш сьпешныя і важныя справы на парадку дня. Возьмем пад увагу Вашыя парады. Яшчэ раз дзякую. |
| [ 07/04/2006 15:03 ] |
| Дарагая і шаноўная спадарыня Прэзыдэнт БНР, я хачу падзякваць Вам за ўсю тую цеплыню і клопат пра насі пра Беларусь. Маю такое пытаньне: ці ў Радзе БНР і ў Вашым коле прысутнічаюць і працуюць толькі сталыя прадстаўнікі старой беларускай хвалі? Або моладзь таксама трохі цікавіцца БНР? Ці робіце Вы нейкія захады, каб зацікавіць моладзь гісторыяй і ідэаламі БНР? Ваш сябра і прыхільнік |
| Шчыра дзякую Вам за добрыя словы. У Радзе БНР ёсьць даволі шмат прадстаўнікоў новай хвалі эіміграцыі – Алеся Сёмуха з Вашынгтону, Віталь Зайка і Марат Клакоцкі з Нью-Ёрку, Уладзіслаў Яндзюк з Прагі, Зьміцер Піменаў (адзін са знакамітых віцебскіх “Міронаў”), які цяпер у Бэльгіі, Мікола Пачкаеў з Вялікабрытаніі... Але пытаньне Вашае сьведчыць, што, магчыма, мы недастаткова пра гэта кажам. Вазьму гэта пад увагу. |
| [ 07/04/2006 15:18 ] |
| Паважаная Iвонка, якi колер (акрамя бел-чырвона-белага) павiнен быць у Беларускай рэвалюцыi? |
| Я моцна люблю васільковы колер, але колеры нашага нацыянальнага бел-чырвона-белага сьцягу для мяне наймілейшыя. Адчула вялікае шчасьце, калі пабачыла днямі на дэпутатах эўрапарлямэнту бел-чырвона-белыя шалікі. Што да колеру рэвалюцыі – выбар за вамі, шаноўныя суродзічы. |
| [ 07/04/2006 15:25 ] |
| Не ожидает ли Беларусь судьба Кубы со своим "Фиделем-батькой" во главе? Что может свидетельствовать об обратном (учитывая реалии, а не иллюзии)? |
| Лёс Беларусі ў руках беларускага народу. Ад яго будзе перад усім залежыць, ці Беларусь застанецца Кубай, ці зробіцца прагрэсіўнай эўрапейскай дзяржавай. Нашым жаданьнем ёсьць здабыць для народа магчымасьці атрымліваць праўдзівую інфармацыю, каб ён мог сам выбраць сваю будучыню. |
| [ 07/04/2006 18:30 ] |
| Шаноуная панi Iвонка, мае рытаннi датычацца магчымасцей рабiць нешта на справ.
1. Цi есць магчымасць пераследу рэжыму у мiжнеродных судах i чаму гэта не робiцца? |
Падчас гэтых выбараў і падзеяў пасьля іх, сьвет на свае вочы пабачыў, хто такі Лукашэнка. Таксама зразумеў і ролю “расейскага фактару”. Як Вам вядома, апрача Расеі і Азэрбайджану, ніхто ў Эўропе не прызнаў выбараў. Гэта значыць, што ніхто ня скажа, апроч расейскіх аналітыкаў – чула такое сёньня, – што Лукашэнка пры ўладзе па волі народу.
А ўзурпатары ня маюць ніякіх правоў. Будучыня пакажа, як скончыцца ягоная ўлада. Са свайго боку, мы будзем дамагацца, каб сьвет не талераваў надалей цынічнага зьдзеку Лукашэнкі над сваім народам. Спадзяюся, што ня будуць прызнаныя і ягоныя намаганьні заплаціць нашай зямлёй за падтрымку з боку Расеі.
|
| [ 07/04/2006 18:31 ] |
| 2. Цi збiраецца спiс злачынствау рэжыму i яго "герояу"? |
| Сьпіс злачынстваў безумоўна ёсьць. Цяпер робіцца сьпіс злачынцаў. |
| [ 07/04/2006 18:33 ] |
| 3. Што робiць Рада БНР для дапамогi ахвярам рэпрэсiй? Што можна зрабiць для тых, каго рэжым збауляе магчымасцi працаваць? |
| Рада БНР падтрымлівае ўсе ініцыятывы ў гэтым напрамку. Людзі, якія страцілі працу з-за іх змаганьня з дыктатурай, мусяць мець магчымасьць выжыць, пакуль гэтая дыктатура існуе. Мы ўсё будзем рабіць, каб ім дапамагчы. |
| [ 07/04/2006 18:36 ] |
| Якiя Вашы дачыненнi з Зенонам Пазняком i Мiлiнеквiчам? Ваша меркаванне аб iх супярэчнасцях, у першую чаргу, аб Народным галасаваннi?
Дзякую. |
Паважаю ўсіх змагароў за вольную і Незалежную Беларусь. Ідэя Народнага галасаваньня магла б цудоўна спрацаваць, але ў іншых умовах, калі б была падтрыманая ўсімі. У Беларусі гэтага не адбылося, магчыма, таму, што на яе зарана. Між іншым, пра гэта заявіў нядаўна і сам спадар Пазьняк. Стаўленьне спадара Мілінкевіча пад час выбараў было больш адпаведнае цяперашнім абставінам.
У мяне добрыя адносіны і са спадаром Пазьняком, і са спадаром Мілінкевічам. Бясспрэчным фактам нацыянальнай гісторыі ёсьць заслуга Пазьняка ў аднаўленьні Незалежнасьці Беларусі ў пачатку 1990-х гадоў. Я паважаю ў Пазьняку ягоныя аналітычныя здольнасьці і стратэгічнае прадбачаньне, асабліва што датычна паводзінаў Масквы і небясьпекі анэксіі Беларусі, якой, на жаль, некаторыя не надаюць увагі. У спадару Мілінкевічу я бачу асобу, якая здолела актывізаваць значную частку беларускага грамадзтва пад час выбарчай кампаніі; асабліва карыснымі ўважаю ягоныя крокі ў эўрапейскіх структурах. Вельмі важна і тое, што Аляксандру Мілінкевічу да гэтага часу ўдаецца захаваць адзінства дэмакратычнай кааліцыі.
Яшчэ раз падкрэсьлю, што Рада БНР выступае за аб’яднаньне ўсіх нацыянальна арыентаваных дэмакратычных сілаў, якія ўвасабляюць і Пазьняк, і Мілінкевіч, і іншыя палітыкі.
|
| [ 07/04/2006 19:30 ] |
| Скажите, на каком основании "рада бнр" называет себя легитимным органом. Ведь всем известно, что легитимность - это политико-правовое понятие, которое обозначает положительное отношение населения страны, его больших групп, общественного мнения к существующим институтам государственной власти. Даже просто знает о существовании каких-то не наигравшихся в солдатики в дестве личностей, объявляющих себя "радой бнр" абсолютное меньшинство белорусского народа. А признает этих шутов в качестве законной власти, может, тысячи две-три. Так о какой легитимности может идти речь?
Второй вопрос: было ли в 1918 году всеобщее прямое тайное голосование, на основании которого можно признать, что белорусский народ уполномочил "раду бнр" действовать от своего имени?
Белый Росс |
| Рада БНР гэта экзыльны ўрад, такі самы, як, скажам, экзыльны ўрад Тыбэту. Такая самая нашая і легітымнасьць. Калі краіна ня вольная, калі ўлады яе не прадстаўляюць волі свайго народу, тады і зьяўляюцца экзыльныя ўрады. Пад час існаваньня савецкай імпэрыі, шмат якія падсавецкія краіны мелі экзыльныя ўрады. Бальшыня іх змагла перадаць свае паўнамоцтвы пасьля вызваленьня іх бацькаўшчынаў. Мы гэтага не зрабілі, бо наш першы парлямэнт (ці Вярхоўны Савет 12-га скліканьня) ня быў абраны дэмакратычна, не кажучы ўжо пра іншыя выбары. Што да нашай легітымнасьці, дык мы ўважаем сябе больш легітымнымі за ўрады, створаныя ўжо на чужыне. Мы ёсьць спадкаемцамі тае Рады, якая атрымала свае паўнамоцтвы ў 1917 годзе ад Усебеларускага Кангрэсу, які быў сапраўдным голасам усяго беларускага народу, перад сталінскім генацыдам і постсталінскім прамываньнем мазгоў. Мы ўважаем сябе сапраўдным голасам беларускага народу, і ўсё робім, каб гэты голас быў пачуты ў сьвеце. Факт, што Беларусь усё яшчэ ня ёсьць свабоднай дэмакратычнай дзяржавай і што ёй усё яшчэ пагражае аншлюс у Расейскую Фэдэрацыю, надае Радзе БНР яе легітымнасьць. |
| [ 07/04/2006 19:33 ] |
| Як вы лiчыце, хто небудзь у нашай краiне ведае сапраудную (прабачце за у нескладовае, бо яго на "клаве" няма) беларускую мову? Цi можна свайму дзiцяцi казаць аб тым, што тая мова, якую зараз выкладаюць у школах, - гэта сапраудная "родная мова"? Вялiкi дзякуй за адказ. |
| На гэтае пытаньне Вам найлепш адказаў бы Вінцук Вячорка. Суродзічы з новай хвалі эміграцыі, якія гавораць па-беларуску, гавораць цудоўна, хаця часам заўважаецца адсутнасьць мяккага знаку. Найважней, аб Вашыя дзеткі палюбілі сваю мову. З часам недахопы (калі яны будуць) самі выправяць. |
| [ 07/04/2006 21:33 ] |
| Паважаная Івонка Сурвіла, мне вельмі прыемна, што я маю гонар задаць вам пытанні. Я сурёзна цікаўлюся гісторыяй нашае Бацькаўшчыны і ўпэўненны , што БНР-гэта сапраўды была незалежная, беларуская дзяржава, а не як гавораць “ дзяржава на паперы”. Каб жыць у незалежнай краіне беларусы павінны трымацца ідэалаў БНР. Але ж мне хацелася б больш даведацца пра БНР , яе дзеячаў ( перш за ўсё нейкія адметныя матэрыялы ). Дзе гэта можна знайсці? І яшчэ, я бачыў некалькі вашых карцін у газэце “Атаўскі веснік”. На якіх сайтах змешчана ваша мастацкая творчасць, і, менавіта знакамітая асабістая Калядная марка? На які адрас вам магчыма ліставаць? Дзякуй за адказы.
ЖЫВЕ БЕЛАРУСЬ! |
| Жыве Беларусь! Свайго мастацкага сайту ня маю. Усе карціны, якія Вы бачылі ў "Атаўскім весьніку", узятыя з іншых сайтаў – на жаль, ня ведаю, зь якіх. На мастацтва ў мяне цяпер застаецца вельмі мала часу. Калядную картачку – Эўфрасіньню Полацкую са Сьвечкай надзеі – пастараюся Вам неяк даслаць. Можаце са мной скантактавацца праз сайт Рады БНР. Што да гісторыі БНР, за выняткам двух першых тамоў Архіваў, матэрыялаў ёсьць шмат, але яны раскіданыя па розных крыніцах. Шмат гаворыцца пра тое, каб іх неяк сабраць у адну публікацыю. Але. як я ўжо казала, "піяр" мы дасюль не ўважалі найважнейшай нашай функцыяй. |
| [ 07/04/2006 22:24 ] |
| Спадарыня Івонка:
Як чалавек Вы мне надта падабаецеся. Апрача таго, з твару Вы на дзіва моцна ўдаяцё на прзідэнтку Латвіі спн. Віке-Фрэйбэргу (напэўна, той самы балцкі субстрат). Было б вельмі добра, каб калі-небудзь Вы таксама сталіся прэзідэнткай Беларусі - пажадана яшчэ ў часы спн. Віке-Фрэйбэргі, бо добра б выглядалі разам.
А пытанне такое: чаму пішацё Вашае прозвішча (мужніна, наколькі разумею) як Сурвілла, з двума "л". Але ж гэта, здаецца, па-польску? Пад возерам Свір ёсць вёска Сурвілы, дык там пішацца "як чуецца".
Дзякуй за ўвагу, спн. Будучая Прэзідэнтка! |
Дзякуй за добрыя словы. У Беларусі, аднак, ёсьць шмат цудоўных людзей, разумных, адданых, таленавітых, якіх вельмі паважаю. Веру, што яны будуць дастойна прадстаўляць наш народ. Між іншым, спадар Мілінкевіч робіць гэта ўжо цяпер. Але маеце рацыю, са спадарыняй Віке-Фрэйбэрге ў нас даволі падобныя лёсы.
Што да прозьвішча Сурвілла, зусім магчыма, што гэта літоўская вэрсія яго. У Амэрыцы ёсьць шмат літоўскіх Сурвіллаў, якія пішуць сваё прозьвішча з двума "л".
Вельмі хацела б адведаць вёску Сурвілы. Спадзяюся, што Бог мне яшчэ дасьць гэтую радасьць.
|
| [ 07/04/2006 22:53 ] |
| Шаноўная спадарыня Сурвіла! Вельмі добра, што такую высокую пасаду як Старшыня Рады БНР, займае надзвычай адукаваны чалавек. Віньшую Вас з Народзінамі і зычу Вам усяго самага добрага. Маю да Вас некалькі пытаньняў. Як Вы лічыце, якая роля беларускай культуры у наш час (маю на ўвазе існуючыя ўмовы на Беларусі), калі чыняцца ня проста перашкоды для яе дзейнасьці, а ідзе не прыхыванае вынішчэньне ўсяго беларускага, як у такіх умовах мець посьпех? Як Рада БНР, ставіцца да розных палітычных апазіцыйных сілаў на Беларусі, ці ёсьць да некаторых зь іх пэўная асьцярога? Дзякуй. Бенедзікт.
Жыве Беларусь! |
| Жыве! Дзякую за віншаваньне. Вельмі важна, каб беларусы ўсьвядомілі ролю мовы і культуры ў сваім жыцьці. Дзякуючы ім мы перажылі, як народ, страшэнную русыфікацыю 19-стагодзьдзя. Лукашэнка нішчыць усё беларускае таму, што гэта добра ведае. Ён сьвядома выкараняе нашу мову і культуру, каб лягчэй было нас паняволіць, перадаць Маскве. Кожны беларус мусіць гэта ведаць. Думаю, што выказваньні на гэтую тэму Багушэвіча і Кастуся Каліноўскага не дастаткова ведамыя ў Беларусі. Што да беларускае дэмакратычнае апазыцыі, на гэтым этапе найважнейшае, каб яна была зьяднаная. Мы ставімся станоўча да ўсіх, хто змагаецца за незалежную, дэмакратычную беларускую дзяржаву. |
| [ 08/04/2006 02:35 ] |
| Дзень добры, спадарыня Сурвіла! Скажыце, калі ласка, як Вы ставіцеся да палітычных падзей апошніх часоў на Беларусі ўвогуле і да дзеяньняў Пазьняка, Казуліна і Мілінкевіча ў прыватнасьці? (Спадара Гайдукевіча я не прыгадваю, бо той яшчэ, на маю думку, ня "разабраўся" ў адносінах Садам - Ваганаў - Крэмль - Жырыноўскі - Лукашэнка - і ен сам...)
Дзякуй за дказ!
Панас |
| Добры дзень! Я моцна ганаруся ўсімі, хто выйшаў на плошчу ў абарону свабоды. Што да дзеячоў апазыцыі, заклікаю іх да згоды і еднасьці. Пэўная, што ўсе рабілі ў гэты час усё, што ўважалі найбольш карысным для Беларусі. Як і ўсе людзі, магчыма, часам памыляліся. Палітыку часам даводзіцца рабіць цяжкі выбар, вынік якога бачны толькі пасьля падзеі. Напэўна, ведаеце вельмі трапнае беларускае прыслоўе на гэтую тэму... (пра “задні розум”) Гайдукевіча да дэмакратычнай апазыцыі я не залічваю. |
| [ 08/04/2006 03:21 ] |
| Pavazhanaia sp. Survila,
Iak mozhna atrymlivats' peryiadychnyia vydanni belaruskai emigratsii u ZSHA i Kanadze? Iakia, na vashuiu dumku, z'iauliautsa naibol'sh tsikavymi?
Siarzhuk,
ZSHA |
| Я атрымліваю газэту "Беларус", Belarusian Review, "Беларускі дайджэст". "Беларускае слова". "Запісы БІНІМу", "Прамень". Калі б мелі Ваш адрас, падалі б Вам, куды зьвяртацца, каб усё гэта атрымоўваць. |
| [ 08/04/2006 10:43 ] |
| Паважаная сп-ня Івонка!
Заранёў выбачаюся за вялікі аб'ём тэксту, але гэта неабходна для дакладнага фармуляваньня двух пытаньняў.
Галоўным этапам у падрыхтоўцы Беларусі да анэксіі расейскай імперыяй зьяўляецца этнацыд – вынішчэньне культуры, гістарычнай памяці, нацыянальна-гістарычных сімвалаў, сьветагляду беларускага народу, а, найперш, нашай мовы. Зараз у Беларусі практычна немагчыма атрымаць адукацыю (асабліва вышэйшую) на беларускай мове, усе тэлеканалы «гавораць» толькі па-руску, 90% шыльдаў на тэрыторыі Беларусі па-руску, усё начальства выступае толькі па-руску і г.д., і т.п. Этнацыд праводзіцца ня толькі расейскімі імперцамі-акупантамі, якія прыехалі з Масквы, а і рукамі тупых падонкаў-здраднікаў з мясцовых. Вядома, за этапам этнацыду, які ў самай апошняй гісторыі працягваецца вось ужо 12 гадоў, у тэхналогіі анэксіі пойдзе этап намаўленьня. Маўляў, беларусы і рускія – гэта адзін народ, і што мы толькі па недарэчнасьці жывем у двух краінах. Між іншым, прыкладна так ужо пасьпелі выказацца і А.Лукашэнка («Беларусы – тыя ж рускія»), В.Пуцін («адна нацыя»), міністр абароны РФ С.Іваноў («адзін народ») і вядомая пісьменьніца С.Алексіевіч («маюць аднолькавую ментальнасьць»)… За гэтым этапам пойдзе «аб'яднаўчы рэферэндум»… І ўсё – анэксія завершана! Частка Еўропы разам з нашым народам беларусаў-ліцьвінаў зноў апынецца ў складзе самай крыважэрнай імперыі за ўсю гісторыю людскай цывілізацыі, а эскадрыліі самалётаў з ядзернымі ракетамі і танкавыя дывізіі імперыі, скіраваныя на Еўропу, апынуцца на 600 км бліжэй да Берліна, Парыжа, Лондана…
Дык вось, сп-ня Івонка, Вы шмат сустракаліся з прадстаўнікамі кіраўніцтва заходніх дзяржаў, адкажыце, калі ласка, на першае пытаньне: Чаму ў пераліку галоўных праблем, якія адмыслова стварае прамаскоўскі рэжым у Беларусі, ніякімі заходнімі структурамі (ні ААН, ні АБСЕ, ні ЕС, ніякія грамадскія праваабарончыя арганізацыі - ніхто) ніколі не ўзгадваецца ГАЛОЎНАЯ СУЧАСНАЯ БЕЛАРУСКАЯ ПРАБЛЕМА – ЭТНАЦЫД?!
Гавораць пра што заўгодна: пра абстрактныя правы абстрактнага чалавека, пра ўціск нейкіх меньшасьцяў, а пра самае галоўнае – ні гу-гу… Чым гэта патлумачыць? Няздатнасцю заходніх бюракратаў да разумення сапраўднай сітуацыі ў Беларусі; ці здэградаванасцю ўсёй заходняй бюракратычнай сістэмы, ад якой ня толькі дапамогі немагчыма чакаць, а якая нават страціла інстынкт самазахавання? Ці тут схаваныя нейкія больш істотныя інтарэсы, і таму адбываецца нейкая гульня?
Другое пытаньне датычыць «падтрымкі дэмакратыі ў Беларусі».
Па заявах прадстаўнікоў заходніх краін на барацьбу за дэмакратыю ў Беларусі штогод выдзяляюцца мільёны даляраў і еўра.
Чаму нават драбнюткая частка гэтых сродкаў не ідзе на падтрымку сапраўдных беларускіх патрыётаў, а апынаецца ў руках жулікаў тыпу «Хартыі»? Ці гэта заходнія бюракраты ня здольны адрозьніць сапраўдных людзей і рэальныя структуры ад выпендрожнікаў і фантомаў?!
Ці тут зноўку схавана нешта іншае?
Заранёў дзякую за адказ.
Прафесар, Алесь Астроўскі. Гародня. |
Паважаны прафэсар, я думаю, што пасьля апошніх выбараў і падзеяў на плошчы Кастуся Каліноўскага міжнародная супольнасьць не прызнае ніякіх дамоваў Лукашэнкі з Масквой. рада БНР дагледзіць, каб пра гэта памяталі нават тыя, у каго асабліва кароткая памяць. Але. на маю думку, нават нагадваць ня будзе патрэбы. Масква безумоўна ўсё зробіць. каб праглынуць Беларусь, шляхам як палітычнага, так і эканамічнага ціску на Лукашэнку. Да "саюзу", аднак, на маю думку, ня дойдзе.
Этнацыд ня згадваецца таму, што Захад паняцьця злачынства супраць культуры, мовы і г.д. – ня лічыць парушэньнем правоў чалавека. У выпадку зь Беларусьсю, абарона сваё культуры ўважаецца адказнасьцю самога беларускага народу, абыякавасьць якога і давяла да этнацыду. Мы, сябры Рады БНР, пад час спатканьняў з заходнімі палітыкамі і ў інтэрвію СМІ імкнёмся паказаць, што абыякавасьць гэтая не прыпадковая.
Што да заходніх палітыкаў, дык трэба прызнаць, што іх разуменьне ня толькі падзеяў у Беларусі, але і адносінаў Расеі да Беларусі, апошнім часам зрабіла вялікі крок наперад. Каб Вы ведалі, якое гэта вялікае для нас задавальненьне, і колькі сілаў было пакладзена, аб гэта адбылося. Паўстагодзьдзя нашыя заклікі былі "голасам у пустэчы". Масква ўсё рабіла, каб так і засталося. Апошнім часам, упершыню ўвесь сьвет загаварыў пра Беларусь. А падчас апошніх падзеяў увесь сьвет БЫЎ у Беларусі. Так што абражаць сёньня нікога не зьбіраюся.
Пра "мільёны даляраў і эўра, якія штогод выдзяляюцца на барацьбу за дэмакратыю ў Беларусі", пра якія вы пішаце, я мала ведаю. Праўда, некаторыя ўстановы давалі гранты на няўрадавыя арганізацыі, ні з кім не параіўшыся. Цяпер сытуацыя крыху зьмянілася. Асабіста, уважаю пазытыўным, што Беларусі наагул надаюцца фонды. Не заўсёды рашэньні "бюракратаў" правільныя, але тое, што магчыма, стараемся паправіць. Што да "Хартыі", яна таксама робіць шмат чаго карыснага. Яе сайт у Інтэрнэце чытаецца ва ўсім сьвеце. А інфармацыя – адзін з нашых прыярытэтаў. Усё ж, найважней, каб дэмакратычныя сілы былі зьяднаныя, спадар прафэсар. Толькі разам мы пераможам нашых сапраўдных ворагаў.
|
| [ 08/04/2006 15:49 ] |
| Шаноўная спадарыня Сурвіла!
Як мяркуеце, ці здольны прынятыя на гэтым тыдні санкцыі супроць рэжыму ў Беларусі, пераадолець гэты рэжым? Калі раней забаранялася ездзіць за мяжу чацьвёрам злыдням і нічога не мяняласяб дык хіба калі 31 ў сьпісе, яны запалохаюцца? Якія з Вашагу пункту гледжаньня ёсць сапраўдныя, моцныя і выніковыя рычагі ціску на А.Г. і яго сяброў?
Вялікі дзякуй за адказ і Вашу дзейнасць!
З павагай, Кміт Кацярына |
| Дарагая Кацярына, дзякуй за пытаньне. Трэба ўсё рабіць, каб візавыя санкцыі былі прынятыя супраць тых, хто спрыяе Лукашэнку ў ягонай сумнеўнай дзейнасьці. Гэта значыць, да міністраў, да судзьдзяў, якія прымалі хлусьлівыя сьведчаньні пра змагароў за волю і за праўду, да амонаўцаў", якія бязьлітасна зьбівалі нашую моладзь, да ўсіх сьвядомых калябарантаў нялюдзкага рэжыму. Мелі б, магчыма, большы эфэкт эканамічныя санкцыі, але пацярпеў бы ад іх найболей наш бедны народ. |
| [ 08/04/2006 17:32 ] |
| Спадарыня Івонка, якім вы бачыце далейшы лёс 1) Беларусі, 2)Рады БНР. Якое, на ваш погляд, месца павінна займаць рада БНР у палітычным, культурным і інш. аспэктах будучай дэмакратычнай Беларусі. |
| Я веру, што Беларусь станецца вольнай, дэмакратычнай, незалежнай дзяржавай, дзе людзі нарэшце пазнаюць шчасьце і дабрабыт. Тады Рада будзе магчы перадаць свае паўнамоцтвы дэмакратычна выбранаму парлямэнту ці прэзыдэнту. Апрацаваць мы будзем, як і раней, для Беларусі. Трэба будзе працягваць здабываць сяброў для нашага народу, пераконваць заможныя краіны дапамагчы Беларусі ўзьняцца на ногі здабываць для яе падтрымкі ў ва ўсіх галінах жцьця, бо ж народы сто раз болей залежныя адны ад другіх. Я веру, што наш беларускі разумны і працавіты народ хутка зробіцца паважаным членам усіх міжнародных арганізацыяй і ўстановаў. Усе мы будзем магчы тады ганарыцца, што мы – беларусы. |
| [ 08/04/2006 17:35 ] |
| Кім вы бачыце будучага прэзыдэнта Беларусі? Ці ёсьць сярод сучасных палітыкаў такі чалавек, які б быў варты і годны для кіраваньня Беларусяй? Калі такі ёсьць, назавіце яго! |
| Я ўжо казала, што ў Беларусі ёсьць шмат цудоўных людзей, якія б дасканала выконвалі гэтую функцыю. Магу толькі выказаць спадзяваньне, што будучы прэзыдэнт дэмакратычнай Беларусі будзе моцна любіць свой край, свой народ, сваю мову, сваю беларускую культуру. Што ён (або яна!) будзе справядлівым, талерантным і добразычлівым чалавекам. Што будзе чулым на патрэбы свайго народу, а менавіта на патрэбы людзей. якія дасюль былі зьняволеныя, адкінутыя нялюдзкай уладай. Спадзяюся, што ён, ці яна, усё зробяць, каб тыя беларусы, якія былі змушаныя пакінуць сваю Бацькаўшчыну, – вярнуліся ў Беларусь з новымі сіламі і ведамі, каб дапамагаць зрабіць яе другой Даніяй... Ня бачу ў гэты нічога немагчымага. |
| [ 08/04/2006 17:39 ] |
| Як вы ацэньваеце палітычную дзейнасьць Зянона Пазьняка за апошнія 10 гадоў ягонай эміграцыі? На ваш погляд, ці варта яму зараз вяртацца ў Беларусь, альбо трэба чакаць, пакуль тут у нас "нехта" ня скіне гэты рэжым? |
| Зянон Пазьняк застанецца ў нашай гісторыі як вялікі патрыёт, сымбаль беларускага Адраджэньня. Якраз дзеля гэтага ня раю яму вяртацца, пакуль пры ўладзе цяперашні рэжым. Жыцьця людзей, якія гэтай уладзе пагражаюць, дыктатар не шкадуе. |
| [ 08/04/2006 17:43 ] |
| Паважаная Iвонка Сурвіла, віншую вас з вашым 70годзьдзем, жадаю ўсяго найлепшага і плённай працы на карысьць Беларусі і Беларусукай Народнай Рэспублікі! |
| Шчыра Вам дзякую за пажаданьне. Прашу Бога, каб даў мне сілаў, пакуль мая праца будзе патрэбная. Зь Нью-Ёрку атрымала цудоўнае прывітаньне зь вершам Сержука Сокалава-Воюша, у якім ветліва кажацца. што "ў змагароў няма ўзросту, яны заўсёды маладыя..." |
| [ 08/04/2006 18:40 ] |
| Спадарыня Iвонка!
Я БЕЛАРУС i жыву на Беларусi. Як i многiя мае землякi стомлены да смерцi "лукашызмам"! i шукау дарогi выехаць адсюль куды вочы глядзяць! Але пасля таго што я бачыу i адчувау ад 19 па 24 сакавiка вырашыу застацца! Справа у тым, што я дауно адчуваю неабходнасць пасвяцiць свае сiлы на дапамогу тым каму падрэбна гэтая дапамога. Я маю на увазе старых, нямочных, бяздомных! I хачу рабiць гэта у нашай краiне. I спадзяюся, што адшукаю аднадумцау сярод тых, хто кахаю сваю Радзiму i жадае ей дапамагчы.
Падкажыце, калi ласка, як можна навязаць кантакты з суайчыннiкамi за межамi Беларусi.
Дзякуй!
Аляксандр |
| Дарагі Аляксандар, віншую з Вашым рашэньнем. Такія людзі, як Вы, моцна патрэбныя нашай Бацькаўшчыне. Добра, што ня выехалі. Мне падаецца, што кожны супрацоўнік Радыё Свабода з прыемнасьцю дасьць Вам патрэбныя каардынаты суайчыньнікаў за мяжой. |
| [ 08/04/2006 19:39 ] |
| Dzen dobry!
Hacela b zapytac, kolki na dadzeny momant nalichwajecca gramadzian BNR i jak mozna atrymac geta gramadzianstwa?
Z pawagaj,
Ina |
| Дарагая Іна, дзякуй за пытаньне. Падлікаў мы ў гэтым мамэнце не вядзем. Папросту, не хапае часу. Грамадзянства БНР – сымбалічнае. Грамадзянінам БНР – чалавек перад усім у сэрцы. Ён гэтым выказвае сваю падтрымку ідэалам 25-га Сакавіка. Я лічу ўсіх герояў Плошчы Кастуся Каліноўскага грамадзянамі БНР. |
| [ 08/04/2006 20:25 ] |
| Беларускі народ не можа скінуць дыктатара, большасць людзей палітычна не актыўныя, Здаецца будзе як на Кубе. Як Вы думаеце, што можа зрабіць Еўропа
і ці зробіць што-небудзь Дыктатура-гэта гора не толькі для беларусаў, але і для усіх сумленных людзей |
| Згаджаюся з Вамі, што да дыктатуры. Але Кубай Беларусь ня зробіцца. Беларусь – ня выспа. Мы адукаваны, эўрапейскі народ. Калі інфармацыя дойдзе да нашых людзей, калі яны змогуць самі параўнаць сваё жыцьцё з жыцьцём народаў Эўропы, дык зразумеюць, што зьмены патрэбныя. Быць апошнімі нявольнікамі Эўропы нармальных людзей задаволіць ня можа. Я замоцна паважаю мой народ, каб думаць, што ён на такое пагодзіцца. |
| [ 08/04/2006 22:10 ] |
| Прабачце канешне вы нашмат сталей за меня, але хто вы што зрабілі для нашай свабоды...жывеце амаль ўсё жыццё за мяжой, штосьці там крычыце з-за кіяну. На мой погляд 17 - гадовыя дзяўчынкі што стаялі са мной побач ў намётавым мястэчку на Кастрычніцкай зрабілі нашмат болей. Хопіць, хопіць ужо маўкліва дапамагаць нам з-за мяжы....вы прыедце і сустрэнціся з гэтай моладлзю якой жыць ў гэтай краіне!!
Сяржук Касцюкевіч |
| Дарагі Сяржук, прабачу Вам з прыемнасьцю. Калі б Вы ня былі сумленным беларусам, не выбачаліся б. Так, на жаль, я жыву амаль усё маё жыцьцё на чужыне. Але не з маёй волі. Каб бацькі мае ня вывезьлі б мяне ў дзяцінстве перад надыходам бальшавікоў, магчыма, я не была б сярод жывых. На чужыне я ўсё жыцьцё была даволі чутным голасам Беларусі.За свабоду Вашую і Вашых бацькоў змагалася яшчэ тады, калі Беларусь была анямелая пад савецкім ярмом. Як толькі даведалася пра сапраўдныя памеры Чарнобыльскай бяды, узялася арганізоўваць Фонд дапамогі ахвярам Чарнобылю ў Беларусі, які дапамог прыехаць у Канаду на аздараўленьне тысячам беларускім дзеткам. Былі сабраныя на дапамогу ахвярам Чарнобылю мільёны даляраў. Узначальвала гэты Фонд восем гадоў, да моманту абраньня Старшынёй Рады БНР. Дзяўчынкі і хлопцы, якія рызыкавалі сваім жыцьцём на плошчы Кастуся Каліноўскага, безумоўна. ёсьць героі. Такімі яны і застануцца ў нашае гісторыі. Але калі б Беларусь мела сяброў на чужыне ў 1918 годзе, хто ведае, магчыма. і Вам ня трэба было б рызыкаваць сёньня жыцьцём. Беларуская дыяспара ўвесь час здабывала сяброў для Беларусі. Гэта таксама было змаганьнем за свабоду Бацькаўшчыны. |
| [ 08/04/2006 23:03 ] |
| Вельмі Шаноўная Пані! Мяне вельмі турбуе ПРАБЛЕМА адукацыя ў галіне гісторыі нацыянальнгага мастацтва. Сёння тэматы лекцый па гісторыі беларускага мастацтва ў ВНУ абмяжоўваюцца этнаграфіяй ці творамі пачатку ХХ стагоддзя. Неабходнасць паглыблення у гісторыю НАШАЙ КУЛЬТУРЫ ВІДАВОЧНАЕ. ЯК ВЫ БАЧЫЦЕ змены у сістэме адукацыі дзеля папулярызацыі ведаў па гісторыі мастацтва, калі большасць твораў, прадметаў і дакументаў застаюцца па за межамі Беларусі. А мастацтвазнаўцы ПОЛЬШЧЫ. РАСІІ,УКРАІНЫ, Літвы...ужо паспелі замацаваць пэўныя з'явы мастацтва да набыткаў уласных народаў...ДЗЯКУЙ.(Ірына Лаўроўская, Берасьце) |
| Дарагая спадарыня Ірына, зь вялікім сумам чытала Вашае пытаньне. Я таксама моцна перажываю, што шмат што з нашае спадчыны, уключна са спадчынай мастакоў, знаходзіцца на чужыне. Цяперашні рэжым гэта не турбуе – магчыма, яму гэта нават выгодна. Спадзяюся. што як толькі зробіцца наш край сапраўды беларускай дзяржавай, а ня новым сатэлітам Масквы, пачнем старацца, каб нашую спадчыну вярнуць на Бацькаўшчыну. Гэты працэс перажылі шматлікія краіны. Спадзяюся, што і нам удасца вярнуць сваё. |
| [ 09/04/2006 03:06 ] |
| Vабраньня Старшынёй Рады БНР.
XTO ABIRAU? |
| Старшыню Рады БНР выбірае сэсія Рады што шэсьць гадоў. Мяне выбралі амаль аднагалосна ў 1997 годзе, і ізноў пераабралі ў 2003-ім годзе. |
| [ 09/04/2006 18:09 ] |
| Генадзь Лех . Масква. Як Вы ставіцеся да прапановы, каб РАДА БНР ўзяла на сябе кардынацыю дзеяньняў сусветнай беларускай дыяспары супраць рэжыму Лукшэнкі. |
| Добры дзень, спадар Генадзь. Фактычна, Рада ёсьць у кантакце з нашымі асяродкамі ў большасьці краінаў сьвету. Паважную частку нашай дзейнасьці праводзяць сэктары Рады. Толькі чамусьці кантакты з беларусамі ў Расеі нейкім чынам дасюль былі цяжэйшыя. Пастараемся гэта зьмяніць. |
| [ 09/04/2006 22:06 ] |
| Добры дзень.
Добры дзень.
У статуце БНР напiсана - "БНР — найвышэйшая ўстанова і адзінае праўнае прадстаўніцтва сувэрэнных правоў беларускага народу...". Калi рэальна агульнанародных выбарау БНР няма, то нашто пiсаць у статуце такiя фразы? Атрымлiваецца такое ж самазванства як у Лукашэнкi. Дарэчы, прарэклямую сайт БНР - www.radabnr.org, няхай людзi пачытаюць i зробяць высновы самастойна..
З павагаю, Ян. |
Хацела б Вам, спадар Ян, прыгадаць, што праз доўгія – вельмі доўгія гады – народ наш ня меў голасу на ўсясьветнай арэне. Нават у ААН, членам (і нават заснавальнікам) якой была БССР, беларуская дэлегацыя рабіла дакладна тое, што ёй было даручана Масквой. голасу БССР ня мела, і выглядала. што не жадала яго мець.
Затое Рада БНР заўсёды і паўсюль бараніла сувэрэнныя правы беларускага народу. Нагадаю, што Ўсебеларускі Кангрэс – выбраны яшчэ перад тым, як Сталінскі тэрор зрабіў нас народам нявольнікаў, – даручыў Радзе прадстаўляць яго, пакуль ня бузе скліканы ўстаноўчы Сойм. Як Вам ведама, такі Сойм яшчэ ня быў скліканы. Таму Рады і працягвае даручаную ёй Усебеларускім Кангрэсам працу, уважаючы сябе праўным прадстаўніком беларускага народу. Між іншым, гэта прызнана і Ўсебеларускім Зьездам за Незалежнасьць, які адбыўся ў Менску летам 2000 году.
|
| [ 09/04/2006 22:25 ] |
| Шаноўная спадарыня Сурвіла!
1. Что реально может и делает Рада БНР для изменения ситуации в Беларуси. Я имею ввиду борьбу с лукашизмом в умах 50% беларусов и консолидацию всех беларусов в нацию.
2. Почему Рада БНР не ведет активную пропаганду своей деятельности как надгосударственного представительства беларусов. Почему не создаете политическую платформу в Беларуси для объединения оппозиции. Помниться не очень давно на беларусских сайтах стоял вопрос "Может ли спадарыня Сурвила стать беларусским президентом".
С уважением Олег. Москва. |
| Паважаны спадар Алег, на Вашае пытаньне я, здаецца, ужо адказала. Тым ня менш – дзякуй за параду. |
| [ 09/04/2006 23:23 ] |
| Шаноўная спадарыня Івонка,
Зычу Вам усяго найлепшага, а таксама, асабістага шчасьця і посьпехаў.
Маё пытаньне: Ці магла б Рада БНР неадкладна адкрыць свой офіс у Менску?
А.Шпакоўскі |
| Шчыра дзякую за пажаданьні. Што да Вашага пытаньня, ва ўмовах прыгнёту, у якіх жыве наш народ, адкрыць офіс Рады БНР у Менску, на жаль, не магчыма. |
| [ 10/04/2006 01:43 ] |
| Спадарыня Сурвіла!
Каго з вядомых Вам сёння на Беларусі прафесіяналаў Вы б маглі ўключыць, альбо парадзілі б уключыць, у будучы нацыянальны ўрад краіны?
З павагай Мікалай Васілевіч Антуковіч. |
| Добры дзень, спадар Антуковіч. Ведаю ў Беларусі шмат выдатных людзей, але ня ўсіх. З другога боку, так доўга. як будзе ў Беларусі прэзыдэнцкі лад, выбар нацыянальнага ўраду будзе выключна прэрагатывай дэмакратычна абранага прэзыдэнта. Калі б гутарка ішла пра ценявы ўрад, дык я радзіла б, пакуль не пазбавімся дыктатуры, прыняць канцэпцыю ўраду нацыянальнага даверу, які б працягваў працэс нацыянальнага яднаньня. |
| [ 10/04/2006 13:50 ] |
| Паважаная Івонка Сурвіла, у мяне да вас такое пытанне: чаму з людзьмі, якія маюць “Грамадзянства БНР” і пражываюць у Беларусі, рада не кантактуе? Далёка не ў кожнага ёсць інтэрнэт, каб сачыць за дзейнасцю БНР, і простыя людзі забываюць, што вы ёсць. Трэба кідаць у паштовы яшчык , ці дасылаць усім сябрам рады нейкія паведамленні, навіны, віншаванні паболей ( а не раз за два гады, як БНФ). Зрэшты ў кожнага ёсць тэлефон. Больш кантактуйце з людзьмі! |
| Маеце рацыю – абавязкова трэба болей кантактаваць з людзьмі. Але каб быць у кантакце з дзясяткамі тысячаў грамадзянаў БНР, трэба было б ствараць паўнавартаснае міністэрства камунікацыі.... На гэта мы проста ня маем сродкаў. Хацела б выкарыстаць гэтую нагоду, каб даць да ведама тым, хто гэтага ня ведае: каб быць цалкам незалежнай, Рада БНР ня просіць і не бярэ ніякіх грантаў ад чужых дзяржаваў ці ўстановаў. Выдаткі пакрываем выключна сабранымі ў беларускай дыяспары сродкамі.
|
| [ 10/04/2006 16:22 ] |
| Паважаная Івонка! Пытанне вельмі глабальнае, не спадзяюся на вычэрпальны адказ, але: як Вы бачыце далейшае разготваньне сітуацыі ў Беларусі паводле нашага грамадзства, адносін Расеі і Захада? Каця |
| Каця, на падобнае пытаньне я ўжо адказала вышэй. Дадам толькі, што беларускія дэмсілы зрабілі вялізны крок наперад за апошні месяц. Сьвет на свае вочы пабачыў, што ўяўляе сабой Лукашэнка і ягоны рэжым. Таксама сьвет нарэшце зразумеў ролю Масквы, без падтрымкі якой Лукашэнка ўжо ў 1996 годзе пазбыўся б прэзыдэнцтва. Цяпер трэба, аб рух свабоды набіраў моц. стаўся нечым накшталт "Салідарнасьці" у Польшчы. Веру ў наш народ. Веру, што перамога будзе за намі. |
| [ 10/04/2006 18:16 ] |
| Шаноўная спадарыня Сурвілла! Ці мае Беларусь у бліжэйшай будучыні шанец вярнуцца на дэмакратычны шлях разьвіцьця? Як Вам гэта бачыцца з замежжа? Якія фактары могуць паспрыяць гэтаму? Алесь З. |
| Добры дзень, Алесь. Найвялікшым фактарам уважаю волю нашага народу жыць бяз страху ў сваёй уласнай дзяржаве. Як толькі народ зразумее, што такая магчымасьць існуе, Беларусь вернецца на дэмакратычны шлях разьвіцьця. |
| [ 10/04/2006 20:12 ] |
| вітаю Вас, шаноўная, спадарыня Івонка. Мне здаецца, што Рада БНР, гэта адзіная структура, якая можа аб'яднаць беларусаў. Адкажыце , калі ласка, ці ў стане Рада БНР стаць аб'яднальнікам беларусаў замежжа, а таксама і баларусаў на Радзіме? Як Вы ставіцеся да закліку З.Пазьняка стварыць урад, які б дзейнічаў на Беларусі і на выгнаньні Што, на Вашую думку, перашкаджае ці можа перашкодзіць гэтаму працэсу?
З повагай і спадзяваньнямі - Лявон Садлўскі. |
| Добры дзень, спадар Лявон. Шчыра дзякую за добрыя словы. Рада БНР можа адыграць вельмі карысную ролю ў працэсе аб'яднаньня ўсіх дэмакратычных сілаў Беларусі. На выгнаньні, для дыяспары, мы заўсёды былі аб'ядоўваючым фактарам. Для гэтага, аднак, трэба, каб народ зразумеў, што ўся дрэнна зычлівая прапаганда супраць Рады БНР і дыяспары была і ёсьць хлусьнёй. Што ў Раду ўваходзяць найлепшыя прадстаўнікі неад'емнай часткі беларускага народу, якая жыве на чужыне, і што кожны зь іх ёсьць шчырым беларускім патрыётам. З нашага боку праблем няма. |
| [ 10/04/2006 21:14 ] |
| Шаноўная сп.Старшыня,
віншую Вас з днем Народзін!
Зычу Вам моцнага Духа і здароўя.Дзякуй Вам і прадстаўнікам Рады БНР за ўвагу,дабразычлівасьць і плённую працу з беларускімі арганізацыямі Эўропы і замежжа.Спадзяемся на наступную сустрэчу!
Пытаньне:у сувязі з тым,што кааліцыя захоўваецца як рух “За Свабоду",а таксама плянуе вярнуцца да Кангрэса дэмакратычных сіл,каб стварыць вышэйшы прадстаўнічы і легітымны органам прыхільнікаў пераменаў,то можа было б добра абраць (ці прызначыць) афіцыйнага прадстаўніка Рады БНР у Беларусі,які зможа супрацоўнічаць(ці ўвайсьці ў гэтую структуру),тым свмым непасрэдна ўплываць на прыняцьцё палітычных і іншых рашэньняў?
З павагай, Ігар Лазарчук. Бельгія. |
| Ня ведаю, у якой ступені кангрэс можа стварыць легітымны і прадстаўнічы орган. Але што да супрацоўніцтва з кангрэсам, дык гэта, фактычна, добрая ідэя, каб БНР брала ўдзел у гэтым руху. Было б добра, каб быў наш прадстаўнік. Але, безумоўна, мы маем аднаго сябра -- прадстаўніка Рады БНР у Беларусі -- гэта Аляксандар Старыкевіч. Я буду зь ім гаварыць на гэтую тэму. |
| [ 10/04/2006 21:19 ] |
| Ці не атрымаецца так, што гонячы Лукашэнку апазыцыя заганяе Беларусь у імпэрыю з усходу?
Адтуль дарогі назад ня будзе! Сёння, баронячы сябе, Лукашэнка бароніць і Беларусь ад паглынання. |
| На маю думку, той, хто сапраўды жадае перадаць Беларусь у рукі ўсходняга суседу, дык гэта Лукашэнка. Калі б ён шчыра жадаў Незалежнасьці, ён бы ня зьдзекаваўся з нашай культуры і беларускай мовы. |
| [ 11/04/2006 00:09 ] |
| Ці можа беларуская эміграцыя паспрыяць узьнікненьню новых незалежных СМІ для Беларусі? Андрэй, Магілёў |
| Мы гэта ўжо цяпер робім. Калі дэлегацыя Рады была ў Брусэлі, у Эўразьвязе і ў Эўрапарлямэнце, мы ўздымалі гэтае пытаньне. І на маю думку, наша паездка мела пэўныя вынікі. Мы ўважаем, што гэта цяперака адзін з галоўных прыярытэтаў -- стварыць міжнародныя СМІ, якія б перадавалі праўдзівую інфармацыю беларускаму народу. |
| [ 11/04/2006 01:37 ] |
| Зноў дабрадзень, спадарыня Сурвіла! Дазвольце задаць Вам другое пытаньне:
Зыходзячы з канадыйскай рэчаіснасьці, што б Вы параілі ўзяць у разьлік пад час будаўніцтва новай, дэмакратычнай Беларусі? Яшчэ раз дзякуй за адказ!
Панас |
| Я мару аб тым, каб наш народ зразумеў дэмакратыю так, як яе разумее Канада. Тут сытуацыя, якая цяпер паўстала ў Беларусі, была б проста немагчымая. Найважнейшыя характарыстыкі гэтай дэмакратыі -- гэта поўная свабода ўсіх партый, усіх сьветапоглядаў, гэта поўнасьцю сумленныя паводзіны палітыкаў, справядлівыя выбары, пачуцьцё людзей, што яны чагосьці вартыя. Калі б усё гэта было ў Беларусі, то мы б ужо сёньня жылі б у вольнай краіне. |
| [ 11/04/2006 04:54 ] |
| Паважаная сп. Івонка! Віншую Вас с днём нараджэння! Маю два пытання:
1. Дзе Вы былі найшчаслівейшыя ў жыцці: ў Даніі, Парыжы, Гішпаніі ці Канадзе?
2. Адкуль у Вас такое рэдкае для беларускі імя?
А. Шымановіч, Горкі, Магілевская вобл. |
1. Дарагі спадар Шымановіч, дзякуй за такое прыемнае пытаньне. Кожны чалавек любіць гаварыць пра добрыя ўспаміны. Мне цяжка выбраць паміж усімі тымі краінамі, дзе я жыла. У Беларусі я толькі бачыла вайну і бяду, але засталіся надзвычайныя ўспаміны зь Беларусі. У Даніі была пасьля вайны -- адчувала сябе як у раі. У Францыі было цяжкавата. У Гішпанію паехала адразу пасьля шлюбу і там, безумоўна, пазнала вялікае шчасьце. У Канадзе мяне захапляе дабрыня народу, якая была выяўленая падчас маёй працы для ахвяраў Чарнобылю ў Беларусі. Дык цяжка зрабіць выбар.
2. Гэта выбар маіх бацькоў. Яны, здаецца, былі пад уражаньнем падзеі, калі ў Канадзе нарадзілася пяць блізьнятак-дзяўчынак, адну зь якіх і назвалі Івонкай. Гэта было, здаецца, у сярэдзіне 1930-х гадоў, якраз перад маім нараджэньнем. |
| [ 11/04/2006 07:43 ] |
| Як Вы ацэньваеце стан сучаснага выяўленчага мастацтва, якія яго плыні вам блізкія, а што лічыце непрымальным. І ў рэчышчы гэтага, як Вы ацэньваеце стан мастацтва Беларусі на сучасным этапе развіцьця як складовай часткі нацыянальнай культуры. Эдвард Кавалеўскі |
| На маю думку, мастацтва цяпер сталася ў сьвеце не мастацтвам , а вынаходніцтвам. Для мяне гэта не зусім прымальна. Мастацтва для мяне мусіць прагаворваць пачуцьці з поўнавартасным адчуваньнем эстэтыкі. Між беларускімі мастакамі ёсьць і такія вынаходнікі, для якіх важней зьдзівіць, чым захапіць. Але таксама ёсьць шмат цудоўных мастакоў, у якіх паняцьце пра мастацтва супадае з маім. |
| [ 11/04/2006 10:31 ] |
| Chamu ideja hramdzianstva BNR znikla? ci varta jaje uznavic?
Siamion. |
| Пра грамадзянства БНР я ўжо выказавалася вышэй. |
| [ 11/04/2006 10:47 ] |
| Вашае стаўленьне да беларускага нэаязычніцтва? Ці лічаце вы гэтую культуру варожай? Shuver. |
| Я вельмі цьмяна ўяўляю сабе гэтую плынь, каб пра яе разважаць. |
| [ 11/04/2006 11:07 ] |
| Паважаная спадарыня Сурвiла! Мы ужо год жывем у Ванкуверы ды не стамляемся шукаць тутэйшую беларускую супольнасць. На жаль, - беспаспяхова. Мы ведаем, што на з'ездзе беларусау Пауночнай Амерыкi былi людзi з Брытанскай Калюмбii, але больш падрабязнай iнфармацыi аб мясцовых беларусах знайсцi ня здолелi. Можа Вы падкажаце, да каго звяртацца? З павагай, Вольга з Ванкуверу. |
| Я Вам адкажу на гэта праз імэйл. У Ванкувэры ёсьць беларусы. Я Вам падам іх адрас. Вельмі цешуся, што Вы шукаеце сваіх суродзічаў. Хацелася б, каб усе беларусы, што прыяжджаюць у Новы сьвет, гэта рабілі. |
| [ 11/04/2006 11:55 ] |
| Спадарыня Сурвілла, ці магчыма ў цывілізаванай краіне, каб на пасаду кіраўніка дзяржавы быў абраны чалавек чыё паходжаньне невядомае? Маю на ўвазе, што ніхто ня ведае, хто ж бацька Лукашэнкі, |
| Гэтае пытаньне ня ёсьць істотным на Захадзе. Гэта ёсьць прыватным жыцьцём чалавека. Але калі гаворка пра палітыка, на Захадзе пра чалавека хочуць ведаць усё. Магчыма, інфармацыя і не паўплывае адмоўна ці станоўча на вынік выбараў, але інфармацыю людзі хочуць мець. Але самае важнае, гэта не паходжаньне, а асабістыя якасьці чалавека. Я думаю, Лукашэнку на Захадзе ня выбралі б. |
| [ 11/04/2006 13:01 ] |
| Чым маглі б дапамагчы замежныя беларусы стаць Радзіме дэмакратычнай краінай? Нас жа многа, і вельмі многія неабыякавыя да таго, што адбываецца на Беларусі.
З павагай, Сцяпан Разанка, Эстонія. |
| Адзінае, што магу сказаць, мы ўсё робім, каб дапамагчы Беларусі стаць вольнай і дэмакратычнай дзяржавай. Калі ласка, далучайцеся да нашай справы. Дарэчы, у Эстоніі ёсьць наша прадстаўніца Зінаіда Клыга. |
| [ 11/04/2006 13:01 ] |
| Добры дзень,
Як вы ставіцеся да таго, каб вярнуцца на Беларусь і балатавацца на пасаду прэзідэнта? Мне падаецца, што Літва і Латвія маюць станоўчы вопыт абрання на гэтую пасаду эмігрантаў. Бо чалавеку, які выхаваны гэтай сістэмай, які вымушаны быў прыстасоўвацца да яе, цяжка будаваць жыцце па ішых прынцыпах.
Дзякуй.
З павагай,
Ларыса.
Менск. |
| Гэта павінен вырашаць беларускі народ. Дарэчы, у прыгаданых Вамі Літве і Латвіі стаўленьне да эмігрантаў нашмат больш станоўчае, чым у Беларусі. Безумоўна, у Беларусі вялікую ролю мае антыімігранцкая прапаганда, якая існавала раней і існуе зараз. |
| [ 11/04/2006 14:57 ] |
| spadarynia Jvonka
Jak vy liczycie nakot plana - adradrzennia VKL, ja litwin j dzie lia mianie slovy europa ci nata nie majuc sensa biez kanteksta adradrzennia VKL. Robic BNR nieszta u hetym napramku ci nie.
Dziakuj EUgen
eugensmalakou@hotmail.com |
| Гэта цудоўная мара. Але ў гэтым мамэнце нам трэба змагацца за волю і незалежнасьць нашай Беларусі, якую мы маем. |
| [ 11/04/2006 16:21 ] |
| Шродэр -- лепшы сябар Пуціна. Нямеччыне мы ніколі не былі цікавыя як незалежная дзяржава. Яны не знаёмыя з нашай гісторыяй і нашымі праблемамі. Ці зьменіцца сытуацыя з прыходам Ангелы Мэркель на пост бундэсканцлер? Ці зьменіцца сытуацыя ў булучыні? Якую працу праводзіла ці праводзіць Рада БНР у Нямеччыне? Загадзя дзякую за адказ. І ВІНШУЮ З ДНЁМ НАРАДЖЭНЬНЯ!! |
| Дзякуй за віншаваньні. Ангела Мэркель ужо даказала сваю падтрымку Беларусі. Я думаю, што ў гэтым кірунку будзе і надалей выяўляцца замежная палітыка Нямеччыны. Што да Рады БНР, мы кантактуемся з усімі прыхільнымі ўрадамі дэмакратычнага сьвету. |
| [ 11/04/2006 16:28 ] |
| Добрый день! Вопрос немного общий, но все-таки.. Как Вы полагаете - какие конкретные действия должна сейчас предпринять оппозиция? Штаб Милинкевича говорил о "работе с населением - разрушением информационной блокады" - но какие еще действия были бы целесообразны с вашей точки зрения?
26-го планируется Чернобыльский Шлях. Люди вновь выйдут на улицу - мы вновь увидим, как нас много - но ЧТО ДАЛЬШЕ? |
| Я спадзяюся, што ў Беларусі паўстане рух падобны да руху "Салідарнасьці" ў Польшчы пару дзясяткаў гадоў таму. І над гэтым зараз працуе дэмакратычная апазыцыя. Вышэй я пра гэта гаварыла больш падрабязна. |
| [ 11/04/2006 16:31 ] |
| sznounaja spadarynia Prezydent!
Ja zyvu u Vialikaj Brytanii i baczyu usie naszyja namahanni tut dapahczy ssuajczynnikam. Z usich maich nazirannich maju prapanovu - moza zrabic na bzie Urada BNR susvietnuju bielaruskuju sietku, kab kardyjanavac naszyja dziejanni. Mnie padajecca takim czynam, my budziem bolsz paspiachovyja nia tolki u pikietach la bielaruskich ambasadau, ale tak sama i u zbory srodkau dla paciarpielych ad palitycznaha pierasledu. |
| Я згодная з Вашай гэтай прапановай. Спадзяюся, што Вы ў кантакце са спадарыняй Лёлей Міхалюк, спадарамі Шаўцовым і Пачкаевым, якія жывуць у Вялікай Брытаніі і зьяўляецца сябрамі Рады БНР. |
| [ 11/04/2006 16:32 ] |
| Sanonaja Pani, jakija asoby cytavac, na kaho pakazvac zamieznikam, jak na pryklad salidarnasci z Bielarussiu. Pierad usim nie palitykau, na prylad dla Palakau, rabili peunyja gesty zorki Hollywood. Z sacunkam Kastus Liclievic. |
| Беларусь дала сьвету вельмі шмат слаўных людзей. Напрыклад, тут у Канадзе ўсе ведаюць, што хакеіст Ўэйн Грэцкі мае беларускія карані. |
| [ 11/04/2006 16:34 ] |
| Шмат маіх сяброў хочуць прымаць удзел у вулічных акцыях, але турбуюцца, што іх выключаць з ВНУ. Як мне іх супакоіць? |
| Трэба сказаць, што мы вельмі добра разумеем іхную засьцярогу, але выбар рабіць ім самім. Магу дадаць, ужо вядома, што польскія ўнівэрсытэты паабяцалі ўладкаваць тых, хто будзе выключаны ў Беларусі з палітычных прычынаў. На гэта ўжо выдзелены сродкі. Ужо ня першы год беларускія студэнты вучацца ў Чэхіі. Наагул, студэнты, якія здольныя змагацца за свабоду, вельмі добра ўспрымаюцца ў дэмакратычных краінах. |
| [ 11/04/2006 16:54 ] |
| Паважаная спадарыня Івонка! па-першае, вялікі дзякуй Вам за любоў да краіны і моц рабіць тое, што робіце! Віншую Вас з Юбілеем і жадаю шмат здароўя, усіх блаславенняў, якія Бог мае да Вас!
сярод моладзі шмат тых, хто разумее працу дэм.сілаў у Беларусі. Але ж большасць сталага насельніцтва "рожденных в СССР" ставіцца падазрона да Захаду і, перш за ўсе, выбачайце за "кухонную" лаянку, бачыць ЭЗ як суполку блакітных і прагных да грошаў. Канешне, гэта не мае меркаванне, але яно мае быць, і трэба з усей адказнасцю ставіцца да думкі гэтых людзей. Спадар Мілінкевіч шмат робіць у дачыненні сябройства з ЭЗ, на яго ўлетках напісана: Он ізвестен, Его знают! А для большасці нашых грамадзян гэта азначае: "Он продался, Цветная чума, Запад спонсірует, Введут войска НАТО" і г.д.
Як жа ж быць з гэтым? Як пераканаць быбульку на лаве, якой кажаш: да яго з вялікай павагай ставяцца, яго ведаюць на Захадзе. а тая ў адказ: прадае краіну...
Адкажыце, калі ласка, гэта ж нашае грамадзтва, нам трэбы кожнаму працаваць са сваімі знаемымі, бабулькамі і суседзямі!
Дзякуй! Лена |
| Трэба пераканаць бабулек, што сапраўдная небясьпека ідзе для Беларусі не з Захаду, а з Усходу. Адзіная краіна, якая мае намеры анэксіі Беларусі, гэта Расея. Але дзеля гэтага патрэбныя сродкі масавай інфармацыі -- над чым мы і працуем. |
| [ 11/04/2006 17:01 ] |
| паважаная пані старшыня бнр!
ці можа зараз рада бнр узяць на сябе арганізацыю руху за вольную беларусь, каб не кпіў лука, што мы прадаліся амерыканцам?
з павагай, васіль ігнаценка |
| Мы імкнемся рабіць усё магчымыя дзеля таго, каб Беларусь была вольнай і падтрымоўваем у гэтых намаганьнях беларускую апазыцыю. |
| [ 11/04/2006 17:03 ] |
| Спадарыня Івонка! Ці памятаеце мястэчка Гавязну? Грамадзкасьць Стаўпеччыны дамагаецца вяртаньня гэтай назвы, забранай у 1964 годзе і зьмененай на Вішнявец. Ваша парада землякам? Вялікі дзякуй і паклон Вам ад Гавязны. |
| Вітаю Вас. На жаль, я была занадта маленькай, каб памятаць усе назовы, але варта было б вярнуць гістарычную беларускую тапаніміку. Асабліва мне хацелася б зьмяніць назву Дзяржынска. Але зробіць усё гэта зможа толькі новая дэмакратычная ўлада. |
| [ 11/04/2006 17:11 ] |
| Sp.Survilla, nekali chuu vashy uspAMINY PA rADYJO sVABODA -- CI BUDUC JANY NADRUKAVANY?
MIHAL jANKEVICH |
| Радыё Свабода перадавала толькі ўрыўкі маіх успамінаў. Спадзяюся, што калі-небудзь буду мець час, каб заняцца іх публікацыяй. |
| [ 11/04/2006 17:14 ] |
| ci lichyce vy, shto ideja gramadzjanstva BNR pavinna byc' ab'jadnal'nym faktaram va usih s'vjadomyh ljudzej? |
| Безумоўна, ідэалы 25 сакавіка могуць аб'яднаць беларускі народ. |
| [ 11/04/2006 17:14 ] |
| Вы аднаго месца нараджэньня з Ф. Акінчыцам, лідарам даваеннай БНСП (нацыянал-сацыялістычнай партыі). Некаторыя беларускія даследнікі (напрыклад, з Беластоку) называюць тую партыю "запраўды інтэлектуальнай". Вашае меркаванне? |
| Я без захапленьня стаўлюся да гэтай арганізацыі. |
| [ 11/04/2006 17:21 ] |
| З Днем Народзінаў! Беларускі народ любіць Вас! Дай Вам Бог шчасьця і дабрабыту, міру Вашае сям'і! Хай Ваша ўсьмешка заўседы застаецца гэткай маладой і бадзёрай! І яшчэ шмат чаго хачу дадаць, але лепш памалюся!!!:) Кася |
| Шчыра дзякую за вельмі цудоўныя словы! |
| [ 11/04/2006 17:24 ] |
| Вельмі паважаная спадарыня Івонка! Праз тыдзень, калі пачне красаваць раньневясновая прыкрынічная кветка -- белакапытнік гібрыдны, -- на чарговы 8 Экалягічны пленэр "Маляўнічая Бацькаўшчына" зьбяруцца юныя мастакі Стаўпеччыны, каб разам намаляваць гэтую чароўную бясстрашную кветку Вясны. Што Вы хацелі б ім пажадаць? І яшчэ. Якім Вы памятаеце Нёман у ваколіцах Стоўпцаў? Дзякуй -- і жывіце доўга-доўга, спадарыня Сурвілла. Вашы землякі. |
Вельмі прыемна пачуць ад Вас гэта. Хацелася б быць сярод тых мастакоў, калі яны будуць маляваць тую чароўную кветку. Маладым мастакам -- сваім землякам я хацела б пажадаць цудоўнага пленэру і плённай працы ў галіне мастацтве. Спадзяюся, Беларусь заўсёды будзе ў цэнтры іхнай творчасьці.
Нёман я прыгадваю як вельмі шырокую раку. Але сумна бачыць, што каля Стоўпцаў ён цяпер стаў малым ручайком, як я пабачыла ў 1992 годзе. |
| [ 11/04/2006 17:32 ] |
| Як вы лічыце, апазіцыя ўсё зрабіла, для таго. каб не адбылося фальсификацый выбараў? |
| Я думаю, што зрабіла, што магла. Але фальсыфікацыя выбараў абсалютна не залежала ад апазыцыі. Тут трэба вінаваціць толькі рэжым пры ўладзе. |
| [ 11/04/2006 17:42 ] |
| Усім дзякуй. Мы заканчваем наш форум. Вэб-рэдактар |
| Зь вялікай прыемнасьцю ўзяла ўдзел у онлайн-канфэрэнцыі. Дзякуй усім удзельнікам за пытаньні, якія часам былі цяжкія. Спадзяюся, што на ўсе пытаньні я адказала задавальняюча. Шчыра дзякуй. |
|
 |
![[ svaboda logo ]](http://www.svaboda.org/images/left-banner.gif)
![[ svaboda logo ]](http://www.svaboda.org/images/banner.gif)
![[ svaboda logo ]](http://www.svaboda.org/images/right-banner.gif)
![[ svaboda logo ]](http://www.svaboda.org/images/left-bar-nav.gif)
![[ svaboda logo ]](http://www.svaboda.org/images/right-bar-nav.gif)
![[ svaboda logo ]](http://www.svaboda.org/images/left-bar-nav2.gif)
![[ svaboda logo ]](http://www.svaboda.org/images/right-bar-live.gif)
