Па Беларусі пракацілася сапраўдная хваля рабункаў рэсурсавых цэнтраў.
Абсталяваньне і інфармацыя былі выкрадзеныя ў Наваполацку, Верхнядзьвінску,
Берасьці. Сёньня стала вядома пра напад на офіс Слонімскага грамадзкага
аб’яднаньня “Воля да разьвіцьця”.
Вось што паведаміў кіраўнік аб’яднаньня Міхась Варанец.
(Варанец: ) “Грамадзкае аб’яднаньне “Воля да разьвіцьця” хацелі абрабаваць
яшчэ раз. У гэтыя выхадныя невядомыя зламалі дзьверы офісу, але нічога
ня скралі, таму што там нічога не было. Справа ў тым, што ў кастрычніку
нашае грамадзкае аб’яднаньне было абрабаванае, і была скрадзеная ўся аргтэхніка:
два кампутары, ксэракс, тэлефон-факс, мадэм, сканэр. І было вырашана ўсталяваць
сыгналізацыю і здаць кватэру пад ахову Слонімскаму гарадзкому аддзелу аб’яднаньня
“Ахова” пры МУС. Спэцыялісты з “Аховы” павінны былі сёньня пачаць устаноўку
сыгналізацыі.
Пасьля папярэдняга крадзяжу аргтэхнікі ў офісе не было, і я думаю, што
злодзеі гэтага ня ведалі, бо ў чацьвер на мінулым тыдні на тэхніцы нашага
аб’яднаньня быў выпушчаны чарговы лісток Свабоднага прафсаюзу тутэйшага
Слонімскага. У міліцыю мы гэтым разам не зьвярталіся, у мяне ёсьць важкія
падставы, каб не зьвяртацца ў міліцыю: гэта зьвязана з папярэднім абрабаваньнем.
У мяне ёсьць падставы казаць, што гэта не звычайныя злодзеі залезьлі.”
Гаварыў
Міхась Варанец, Слонім
|
