Сёньня:

На паседжаньні Каардынацыйнай рады дэмакратычных прафсаюзаў разглядалі антыпрафсаюзныя дзеяньні ўладаў ды стаўленьне прафсаюзаў да сёлетніх выбараў на прэзыдэнта краіны.

Удзельнікі сёньняшняга паседжаньня Каардынацыйнай рады абмеркавалі магчымыя наступствы чарговай антыпрафсаюзнай кампаніі ўладаў.

Старшыня Свабоднага прафсаюзу транспартнікаў Уладзімер Макарчук назваў пляны адміністрацыі Лукашэнкі грубым умяшаньнем у прафсаюзныя справы. Як вядома, тыя пляны прадугледжваюць стварэньне ў краіне новых прафсаюзаў.

Адным з вынікаў гэтага працэсу, на думку спадара Макарчука, будзе зьнішчэньне ў краіне незалежнага рабочага руху. А вось што паведаміў на гэты конт нашаму радыё прэзыдэнт Беларускага кангрэсу дэмакратычных прафсаюзаў Віктар Бабаед:

(Бабаед: ) "Для дэмакратычных прафсаюзаў, для большасьці зь іх — гэта пагроза іхнага зьнішчэньня. Там што новы законапраект патрабуе, каб 10% ад працоўных прадпрыемства і ня менш за 10 чалавек былі ў першаснай суполцы. Гэта вельмі небясьпечна, мы мусім нешта рабіць. Таму мы й вырашылі сёньня падтрымаць акцыю Фэдэрацыі прафсаюзаў у лютым, і возьмем найактыўнейшы ўдзел у гэтай акцыі".

(Карэспандэнт: ) "Ці абмяркоўвалі, як Кангрэс беларускіх дэмакратычных прафсаюзаў будзе браць удзел у сёлетніх выбарах на прэзыдэнта?"

(Бабаед: ) "Так, мы абмяркоўвалі гэта пытаньне. Мы сябры Кангрэсу дэмакратычных сілаў, то будзем выконваць усе рашэньні КРДСу. І будзем працаваць на кандыдата, якога прызначаць кандыдатам на прэзыдэнта нашай дзяржавы".

Каардынацыйная рада дэмакратычных прафсаюзаў прыняла сёньня зварот да Каардынацыйнай рады дэмакратычных сілаў з тым, каб у ейны склад вярнуліся кіраўнікі Партыі працы й сацыял-дэмакратычнай партыі “Народная грамада”. Прафсаюзныя лідэры лічаць, што ў цяперашняй сытуацыі ў краіне дзейнасьць ажно некалькіх дэмакратычных цэнтраў палітычных сілаў — памылка.

Дэмакратычныя прафсаюзы зьбіраюцца падтрымаць на наступных выбарах аднаго з трох прэтэндэнтаў ад апазыцыі — Ганчарыка, Домаша ці Чыгіра. Паводле пазыцыі Каардынацыйнай рады, выбар канкрэтнай асобы залежыць ад паразуменьня між кандыдатамі. Гаворыць старшыня Свабоднага прафсаюзу Генадзь Быкаў:

(Быкаў: ) "Мы падтрымліваем гэтых трох чалавек, якія ўжо кажуць, што маюць намер выбірацца на прэзыдэнта. Ёсьць нейкія прыярытэты і ў прафсаюзаў. Мы хочам аднаго: каб гэтыя тры пэрсоны правялі столькі кансультацыяў, колькі трэба, каб яны пайшлі адной камандай, памятаючы пра тое, што тут галоўнае не пэрсанальныя інтарэсы, а 10 мільёнаў беларусаў.

Вырашаецца, як беларусы будуць жыць у новым стагодзьдзі. Мы будзем уплываць на КРДС, на гэтых людзей, каб стварылі каманду, каб была згода між імі ды каб на выбарах яны працавалі ў адным накірунку. Ня надта важна, хто зь іх зробіцца прэзыдэнтам".

Міхал Стэльмак, Менск

Архіў

Радыё СВАБОДА