Сёньня:

Выйшаў 500-ы нумар гарадзенскай гарзэты "Пагоня". Выданьне існуе амаль 9 гадоў, наклад мае большы за 7 000 асобнікаў.

Першы нумар "Пагоні" выйшаў 25 сакавіка 1992 году. Праз год газэта зрабілася штотыднёвікам, пры канцы 1990-х пэўны час выходзіла двойчы на тыдзень.

Газэта мае на сваёй шапцы рыцара з нашага нацыянальнага герба, яна заўжды была й ёсьць абаронцай беларускай ідэі, не спакусілася на кан'юнктуру, не зрабілася дзьвюхмоўнай. А трымацца беларускамоўнай газэце, пагатоў па-за сталіцай, цяжка.

У "Пагоні" ўвесь час працуе моладзь, студэнты. Сёньня газэту можна знайсьці ў Інтэрнэце. "Пагоня" была і агульнабеларускай, і абласной. Зараз рэдакцыя хоча вярнуцца да першапачатковай канцэпцыі, паводле якой газэта выдавалася як рэгіянальны агляд: Вільня, Горадня, Беласток.

Гаворыць рэдактар газэты "Пагоня" Мікола Маркевіч:

(Маркевіч: ) "Нашымі рукамі, рукамі журналістаў пішацца гісторыя нашай Беларусі. Я вельмі ганаруся тым, што гэта гісторыя пісалася журналістамі "Пагоні" вельмі адказна, шчыра й сумленна.

Я веру ў тое, што мы будзем працаваць гэтак і надалей".

Сяргей Астраўцоў, Горадня

Архіў

Радыё СВАБОДА