Сёньня ўвечары Аляксандар Лукашэнка прыляцеў у Маскву. Журналісты, якія
сустракалі яго ў аэрапорце, пабачылі, што як толькі Лукашэнка сыйшоў з
трапa самалётa, адтуль перш за ўсё вынесьлі клюшкі і хакейную форму. Гэта
невыпадкова, бо ўсе афіцыйныя перамовы Аляксандра Лукашэнкі заплянаваныя
на аўторак. А сёньня ён толькі гуляў у хакей.
Праз некалькі гадзінаў пасьля прылёту ў Маскву Аляксандар Лукашэнка
выйшаў на хакейную пляцоўку ў Лужніках. Там адбылася гульня з удзелам расейскіх
ды беларускіх палітыкаў, а таксама ветэрэнаў хакею. Верагодна, такім чынам
Аляксандар Лукашэнка рыхтаваўся да заўтрашніх перамоваў з кіраўніцтвам
Расеі.
У аўторак Аляксандар Лукашэнка перш-наперш сустрэнецца с прэзыдэнтам
Расеі Ўладзімірам Пуціным. Паводле словаў самога Лукашэнкі, галоўным пытаньнем
перамоваў стане пашырэньне супрацоўніцтва ў вытворчасьці і продажы зброі.
Прэзыдэнт Беларусі катэгарычна абверг версію, што ягоны візыт нейкім
чынам зьвязаны з будучымі прэзыдэнцкімі выбарамі ў Беларусі. Журналістаў
вельмі цікавіла гэтае пытаньне, бо напярэдадні расейскія газэты паведамілі,
што быццам бы кіраўніцтва Расеі схіляецца да таго, каб падтрымаць на выбарах
нейкага іншага кандыдата, а не Лукашэнку. Газэты прыводзілі зьвесткі, што
ў адміністрацыі Ўладзіміра Пуціна нават створана адмысловая аналітычная
група, якая раіць Пуціну зрабіць стаўку на былога кіраўніка беларускага
КГБ Мацкевіча.
Акрамя Ўладзіміра Пуціна, Аляксандар Лукашэнка сустрэнецца з прэм’ер-міністрам
Міхаілам Касьянавым і старшынём Цэнтрабанку Віктарам Герашчанкам. Размова
пойдзе пра ўвядзеньне адзінае валюты. На думку Лукашэнкі, адзіная влюта
можа быць уведзеная нават раней, чым праз 8 год, як прадугледжвае адпаведнае
пагадненьне.
Не абмінулі Аляксандра Лукашэнку і пытаньні ўзаемаадносінаў са Злучанымі
Штатамі Амэрыкі. Ён заявіў (цытую) “калі новая адміністрацыя ЗША здольная
адыйсьці ад прынцыпаў уціску на Беларусь, то мы гатовыя зь імі супрацоўнічаць”.
(канец цытаты)
Віктар Дзятліковіч, Масква
|
