Пасьля 11 дзён страйку наваполацкія “чаўнакі” правялі сёньня сход, на
якім вырашалі пытаньне: выходзіць на працу ці працягваць страйкаваць. Вырашылі
спыніць страйк 15 студзеня.
Сход праходзіў у эмацыйным ключы і быў больш падобны на мітынг. Выступаючы
перад калегамі старшыня мясцовага прафсаюза дробных прадпрымальнікаў Валер
Шаўчэнка перш-наперш дэзавуяваў заявы прадпрымальніцкай грамады пра тое,
што пяцідзённы студзеньскі страйк быў пасьпяховым. (Цытую): “Страйкавая
акцыя можа быць пасьпяховай толькі ў адным выпадку – калі улады ідуць на
саступкі. Пяцідзённая навагодняя гулянка такіх задачаў ня выканала, а таму
называць яе пасьпяховай папросту недарэчна”. (канец цытаты)
Улады, – сказаў выступоўца, – ні на якія кампрамісы ісьці не жадаюць,
што і засведычыў на днях намесьнік старшыні Дзяржаўнага камітэту фінансавых
расьледаваньняў Каласоўскі. Пад час нефармальнай гутаркі з прадпрымальнікамі
ён заявіў, што ўсе нарматыўныя акты, у тым ліку і датычныя мытнага афармленьня
тавараў, застаюцца ў сіле і наўрад ці будуць перагледжаныя. У такой сытуацыі
адзінае, што можа схіліць улады да кампрамісу, – гэта ўсебеларускі страйк
дробных прадпрымальнікаў. Менавіта яго ўлады і баяцца, а таму імі была
абраная бясхібная тактыка выбарачнага здушэньня найбольш актыўных прадпрымальнікаў
у рэгіёнах, каб потым узяцца за сталіцу і абласныя гарады.
Дарэчы асноўнае, што турбавала і непакоіла прадпрымальнікаў на сходзе,
– менавіта адсутнасьць іх страйкавай акцыі ў іншых буйных гарадах Беларусі.
Эмацыйнага прыску падсыпала і прадстаўніца адміністрацыі рынку, якая, узяўшы
слова, заявіла наступнае: “Калі ў панядзелак “чаўнакі” ня выйдуць на працу,
яны страцяць свае гандлёвыя месцы”.
На хвалі людзкога абурэньня старшыня прафсаюзу прапанаваў страйкаваць
да канца месяца, аднак бальшыня такой прапановы не падтрымала і выказалася
за спыненьне страйку з 15 студзеня.
Вінцэсь Мудроў, Наваполацак
|
