Пятніца, 5 Студзеня 2001

Сёньня:

Загадчык аддзелу культуры бабруйскай газэты "Камэрцыйны кур'ер" Уладзімер Рэпік ужо прайшоў экспэртызу і накіраваў адпаведную скаргу ў пракуратуру Ленінскага раёну Бабруйску. Як стала вядома, яго спачатку зьбілі некалькі юнакоў, а калі ён зьвярнуўся да міліцыянтаў, затрымалі і яго.

Паводле ягонай інфармацыі, міліцыянты пазналі яго як журналіста, абзывалі "пісакам", абражалі і некалькі разоў ударылі па галаве. Як сьцьвярджае ў заяве ў пракуратуру спадар Рэпік, супрацоўнікі Ленінскага раённага аддзелу ўнутраных справаў Бабруйску адмовіліся прад'явіць пасьведчаньні, вызвалілі ўсіх тых, хто зьбіваў яго, а ён быў вымушаны правесьці ва ўчастку 12 гадзінаў.

Ён лічыць, што гэткія дзеяньні міліцыянтаў абумоўленыя ягонымі крытычнымі артыкуламі ў іхны бок. Вось як ён камэнтуе паводзіны міліцыі:

"Яны палохаюцца вольнага слова — калі журналіст зьбірае інфармацыю і распаўсюджвае яе. А я пабачыў недахоп, прыкладам, п'янага міліцыянта, і не магу не напісаць пра гэта".

Кіраўнікі газэты пацьвердзілі, што непрыемнасьці з праваахоўчымі органамі пачаліся ва Ўладзімера Рэпіка яшчэ ў 1996 годзе, калі ён напісаў артыкул "Дзеці перабудовы" пра ігнараваньне такой зьявы як дзіцячая прастытуцыя.

У Ленінскім раённым аддзеле ўнутраных справаў Бабруйску паведамілі, што паводле заявы вядзецца службовае расьсьледаваньне, і яны пакуль што ня могуць пракамэнтаваць падзеі.

Кіраўнік бабруйскіх праваабаронцаў Яўген Чыпурышкін адзначыў, што ў аддзяленьні БГК знаходзяцца ўжо чатыры скаргі з выкладаньнем фактаў зьбіцьця людзей супрацоўнікамі Ленінскага РАУС Бабруйску. Сярод пацярпелых — рабочы Аляксей Багданаў, вайсковы падпалкоўнік у адстаўцы Георгі Ражкоўскі, мастак Міхаіл Семяненка.

Так, рабочы Аляксей Багданаў быў зьбіты напрыканцы мінулага году, калі адмовіўся падпісаць пратакол пра адміністрацыйнае правапарушэньне. Міліцыянты заявілі, што юнак п'яны, але ж адмовіліся правесьці адпаведную экспэртызу.

Аляксандар Сердзюкоў, Бабруйск