Серада, 3 Студзеня 2001

Сёньня:

На пераднавагодняй прэсавай канфэрэнцыі дырэктар “8 каналу” Пётар Чарнаморац выказваў упэўненасьць, што ўсё скончыцца пасьпяхова. Паводле закону, “8 канал” мог працаваць у ранейшым рэжыме прынамсі да 2004 году (менавіта да гэтага тэрміну дзейнічае ліцэнзія на права вяшчаньня). Аднак, насуперак аптымізму дырэктара, яшчэ 1 студзеня тэлевізійны сыгнал без усялякіх папярэджаньняў быў пераарыентаваны — яго атрымала студыя “СТВ” Менскага гарвыканкаму.

Некаторыя аналітыкі мяркуюць, што гэта — пачатак інфармацыйнага ўплыву на самую "незгаворлівую" частку электарату — менскую інтэлігенцыю. Паводле зьвестак Міністэрства сувязі, сыгнал 8 каналу ахоплівае амаль 3,5 мільёнаў патэнцыйных гледачоў у Менску і вобласьці, а гэта траціна ўсяго насельніцтва. “8 канал” з прычыны сваёй апалітычнасьці і залежнасьці толькі ад прыватнага капіталу, відавочна, не адпавядаў мэце мабілізацыі насельніцтва дзеля патрэбнага ўладам выніку на хуткіх выбарах. Зусім іншая справа — “Сталічныя навіны”, іх цалкам утрымліваюць улады, і грошы ідуць з гарадзкога бюджэту. Да таго ж, многія ведаюць кіраўніка “Сталічных навінаў”, Рыгора Новікава, які ў свой час спрабаваў сілы ледзь не ва ўсіх рэспубліканскіх выданьнях, зрэшты, доўга нідзе не затрымліваючыся.

Не прэтэндуючы на лаўры вядомых тэлевізійнікаў, “СТВ” пачаў з рэтрансьляцыі расейскага каналу "RenTV", які зь нядаўняга часу падпарадкаваны кіраўніку расейскай электраэнэргетыкі Чубайсу. Астатняя, зусім нязначная частка эфіру, запоўненая даволі дзіўнымі па форме нарысамі тыпу “Мінск і мінчане”. Што тычыцца навінаў сталіцы, то адсутнасьць глябальнасьці ў параўнаньні з БТ кампэнсуецца патэтыкай.

Адносна ж “8 каналу” многія лічаць, што немалая віна за паразу ляжыць якраз на заснавальніках. Кантрольны пакет акцыяў “8 каналу” апошнім часам належаў Яўгену Краўцову — банкіру, мэцэнату, вядомаму аматару мастацтва і заснавальніку студыі “Відэафакт”. Аўтарытэт Краўцова падмацоўваецца цеснымі адносінамі з уплывовым расейскім "ОНЭКСИМ-банкам". Але, захапіўшыся шматпрофільнасьцю, Краўцоў рызыкуе згубіць усё паасобку. Другі гаспадар, дырэктар СП "Лада-ОМС" Аляксей Ваганаў, перажывае ня лепшыя часы разам зь няспраўджанай надзеяй беларускай эканомікі — прадпрыемствам “Форд-Юніён”.

Уласна дырэктарат “8 каналу”, які зьяўляецца (як і ўсе супрацоўнікі) выключна наёмнай сілай і ня мае дачыненьня да акцыяў, як высьветлілася, самастойна ня здольны супрацьстаяць палітычнай волі чынавенства. Адсюль і радыкальныя зьмены пад поўнае маўчаньне непераборлівае аўдыторыі.

Ужо перад эфірам стала вядома, што ранейшая частата ня будзе вернутая калектыву “8 каналу” ніколі. Магчымы, але малаверагодны варыянт, ужо агучаны ў Менгарвыканкаме, — калі пацярпеламу боку дадуць магчымасьць вяшчаць на іншай частаце. Пакуль жа становішча застаецца няпэўным.

Ігар Карней, Менск