Прадпрымальнікі Віцебшчыны падтрымалі агульнабеларускі страйк...
Другі год запар пачынаецца ў Віцебску са страйку дробных гандляроў.
Але калі летась амаль усе яны былі на сваіх працоўных месцах і сварыліся
са штрэйкбрэхерамі, то зараз усе віцебскія рынкі на дзіва пустыя. На Смаленскім
працавала каля дзесяці адсоткаў кропак, на вялізным Полацкім — яшчэ меней.
Каля Паўднёвага актыўна гандлявалі толькі бабулі з семкамі, а крыты прадуктовы
рынак “Вольга” нават зусім быў зачынены. Не адкрыліся з раніцы і больш
за палову гарадзкіх крамак і шапікаў.
Страйк заарагнізавала філія індывідуальных прадпрымальнікаў гораду Віцебску
Свабоднага прафсаюза Беларускага. Як сказала яе старшыня Іна Фралова, гвалт
уладаў у адносінах да дробных гандляроў, перайшоў ужо ўсе межы. І яны гатовыя
адстойваць свой не такі ўжо вялікі заробак і чалавечую годнасьць. Людзі
добра разумеюць, што з пачатку лютага, калі ўвойдзе ў сілу гэтак званы
“адзіны падатак”, абсалютная большасьць зь іх застанецца бяз кавалка хлеба.
Бо, як падлічылі ў прафсаюзе, каб не збанкрутаваць пасьля аплаты гэтага
ды мытнага падаткаў, трэба мець на месяц ў абароце каля пяці тысяч даляраў,
што для большасьці дробных гандляроў справа немагчымая. У выніку проста
павялічыцца колькасьць беспрацоўных. А калі ўлічваць, што вельмі многія
з тых, хто гандлюе на рынках, у свой час сталую працу ўжо гублялі, а былыя
школьнікі яе ніколі і ня мелі, то што здарыцца далей з гэтымі людзьмі —
невядома. Але гэта будзе бядою ня толькі тых, хто забясьпечваў нас таннымі
таварамі, — падкрэсьліла спадарыня Фралова, — аднак і бядою ўсяго даведзенага
да галечы насельніцтва.
Пакуль страйк заплянаваны на пяць дзён. Але ўжо зараз значная колькасьць
дробных прадпрымальнікаў настроеная больш рашуча і прапаноўвае працягнуць
яго яшчэ на тыдзень. Менавіта пра гэта пойдзе гаворка на агульным сходзе,
які пройдзе 5-га студзеня на Полацкім рынку. Пад адкрытым небам, бо ўлады
у памяшканьні адмаўляюць.
Алег Жукоўскі, Віцебск
|
