Гарадзенскія ўлады не дазволілі сёньня правесьці пікеты, але Дзень беларускай
вайсковай славы ўсё роўна ў горадзе быў адзначаны.
У цэнтры, на Савецкай вуліцы гараджане змаглі ўбачыць карціны Зьміцера
Іваноўскага. Мастак адлюстраваў на іх беларускіх ваяроў часоў Давыда Гарадзенскага
і бітвы пад Воршай.
Над Савецкай вуліцай зьявіўся таксама бел-чырвона-белы сьцяг, які правісеў
каля паўгадзіны. Прыехала міліцыя і людзі ў цывільным, якія сьцяг зьнялі
і забралі з сабой.
Пасьля вулічнай выставы патрыятычна настроеная публіка ўсклала кветкі
ў трох месцах – на чыгуначным вакзале да мэмарыяльнай шыльды паўстанцам
Каліноўскага, да шыльды паўстанцам Тадэвуша Касьцюшкі на Новым замку і
да мэмарыяльнага знака “Пагоня на Грундвальд”.
Увечары адбылося набажэнства ў Калоскай царкве за тых, хто загінуў за
Беларусь, а пасьля каля Каложы – невялікі канцэрт.
Сяргей Астраўцоў, Горадня
|
