Закончылася вылучэньне кандыдатаў у дэпутаты ў гэтак
званую “Палату прадстаўнікоў Нацыянальнага сходу”. Цяпер праводзіцца працэдура
праверкі пададзеных дакумэнтаў, і 15 верасьня стануць вядомыя прозьвішчы
зарэгістраваных кандыдатаў.
769 чалавек на сёньняшні момант можна назваць, так бы мовіць, прэтэндэнтамі
на званьне кандыдата ў дэпутаты. Адразу нагадаем, што ў “Палаце прадстаўнікоў”
110 крэслаў. Аднак колькасьць пададзеных дакумэнтаў на рэгістрацыю кандыдатам
істотна большая. Рэч у тым, што некаторыя прэтэндэнты на дэпутацкі мандат
дзеля гарантыі вылучылі сабе адразу некалькімі спосабамі — ад партыяў,
ад працоўных калектываў і шляхам збору подпісаў. Так што ўсяго ў выбарчыя
камісіі паступілі 972 заяўкі на права стаць кандыдатам у дэпутаты.
Сярод іх — 306 вылучаныя ад партыяў, 308 — ад працоўных калектываў,
і 334 — шляхам збору подпісаў. Сярод партыяў, як і варта было чакаць, найбольш
актыўна выявілі сябе абедьзве камуністычныя партыі — Чыкіна й Калякіна,
а таксама лібэрал-дэмакраты Гайдукевіча, якія вылучылі кандыдатаў у 109
са 110 акругаў. Усяго вылучылі сваіх кандыдатаў, а значыць, вырашылі браць
удзел у гэтых выбарах 9 партыяў — роўна палова з 18 зарэгістраваных на
сёньня ў Беларусі.
Што да вылучэнцаў шляхам збору подпісаў, дык тут, як паведаміла сёньня
на прэсавай канфэрэнцыі старшыня Цэнтральнае выбарчае камісіі Лідзія Ярмошына,
чакаецца даволі значная лічба адсеяных у выніку спраўджаньня. Многія падпісныя
лісты складзеныя з парушэньнямі заканадаўства, так што колькасьць удзельнікаў
выбарчае кампаніі да 15 верасьня істотна зьменшыцца.
Збор подпісаў увогуле аказаўся самай складанай формай вылучэньня — усяго
было створана 477 ініцыятыўных групаў, а сабраць тысячу подпісаў выбаршчыкаў
здолелі толькі 334 зь іх. Напрыклад, так і не дала рады гэтай задачы ініцыятыўная
група Леаніда Сініцына — колішняга першага кіраўніка адміністрацыі Лукашэнкі.
Астатнія вядомыя палітыкі, якія вырашылі браць удзел у выбарах, пакуль
прайшлі гэты этап кампаніі.
Даволі традыцыйным застаецца рэгіянальны аспэкт палітычнай актыўнасьці.
Найбольшая колькасьць кандыдатаў у Менску, дзе на 18 акругаў прэтэндуюць
пакуль 160 прэтэндэнтаў — звыш 9 на кожны дэпутацкі мандат. А ў Магілеўскай
і Гомельскай абласьцях у сярэднім на акругу толькі па 6 прэтэндэнтаў.
Віталь Цыганкоў, Менск
|
