Галоўны рэдактар незалежнае гарадзенскае газэты “Пагоня”
Мікола Маркевіч забавязаны быў падпісаць акт праверкі, праведзенай у рэдакцыі
падаткавай інспэкцыяй Ленінскага раёну гораду. Сума штрафу, вызначанага,
інспэкцыяй, — 4 мільёны 700 тысячаў рублёў. Па-сутнасьці, пад пагрозаю
апынуўся выхад гэтае беларускамоўнае газэты.
Асноўнае парушэньне, паводле праверкі, — гэта быццам бы няправільнае
адлюстраваньне ў бугальтарскіх дакумэнтах непрададзенае колькасьці газэтных
паасобнікаў. Гэтак, маўляў, за мінулы год быў заніжаны прыбытак, атрыманы
ад продажу газэты.
Мікола Маркевіч, зрэшты, прызнае, што некаторыя хібы ў бугальтарскім
уліку сапраўды былі. Аднак штрафныя санкцыі — несувымерна вялікія адносна
гэтых хібаў, — лічыць ён. На грошы, якія маюцца спагнаць з фонду “Бацькаўшчына”,
які выдае “Пагоню”, можна выпусьціць амаль 10 нумароў гэтага штотыднёвіка.
Карацей, 4 мільёны 700 тысячаў рублёў — гэта практычна кошт двухмесячнага
існаваньня “Пагоні”.
Галоўны рэдактар схільны лічыць вялікія штрафныя санкцыі адным са спосабаў
задушыць “Пагоню”. Гэтым разам — фінансава. Крыху раней газэта на працягу
ўсяго аднаго месяца атрымала тры папярэджаньні ад Дзяржаўнага камітэту
друку. Папярэджаньні — зь неістотнымі падставамі.
Сяргей Астраўцоў, Горадня
|
