Сёньня:

Сапраўдная чыноўніцкая карусель закруцілася вакол выпуску ўлётак да другога туру галасаваньня кандыдата ў дэпутаты ў гомельскай Сяльмашаўскай выбарчай акрузе №34, прафэсара катэдры фізыкі ўнівэрсытэту транспарту Валянціны Савасьценка.

Напачатку выпуск ўлётак стрымлівала з розных прычынаў акруговая камісія. А ўчора 15 тысячаў надрукаваных асобнікаў са зваротам да выбаршчыкаў канчаткова былі заблякаваныя на фабрыцы “Палесдрук”. Вось як напачатку патлумачыла гэта галоўны інжынэр фабрыкі Ларыса Пратасенка:

«Нам кожная капеечка дарагая. Я сказала прадстаўнікам кандыдата: калі ласка, аплаціце заказ. Аплаціце — і сёньня ж атрымаеце ўлёткі», — сказала спадарыня Пратасенка.

Тут жа, у кабінэце інжынэра, адбылася перамова па тэлефоне на падвышаных інтанацыях кандыдата ў дэпутаты з бугальтарамі фінансавага аддзелу адміністрацыі Чыгуначнага раёну. Бюджэтныя грошы памерам 56,9 тысячы рублёў неўзабаве былі пералічаныя фабрыцы. Аднак ўлёткі забараніў выдаваць ужо сам дырэктар Віталь Штульман… — яго з гэтае нагоды адмыслова выклікаў да сябе намесьнік старшыні гарадзкога выканкаму ў справе інфармацыі Валеры Зашчук.

Па ўсяму відаць, уладным чыноўнікам прыйшоўся не да спадобы зьмест улётак. Валянціна Савасьценка прыводзіла вялікую вытрымку з выступу Аляксандра Лукашэнкі на апошняй сэсіі “Палаты прадстаўнікоў”. Кіраўнік дзяржавы досыць нэгатыўна адклікнуўся пра дзейнасьць канцэрну “Белрэсурсы”, які ўзначальвае дэпутат Юры Астапчанка.

Цяпер спадар Астапчанка зноўку прэтэндуе на дэпутацкі мандат ў гомельскай Сяльмашаўскай акрузе №34 і супернічае з Валянцінаю Савасьценкай у другім туры галасаваньня.

Уладныя структуры адкрыта падыгрываюць Астапчанку і, відавочна, не зацікаўлены, каб інфармацыя праз улёткі адносна дзейнасьці канцэрну “Белрэсурсы” дайшла да шырокага кола выбаршчыкаў.

Казімер Яноўскі, Гомель

Архіў

Радыё СВАБОДА