Паблiзу аўтамагiстралi, што вядзе зь Берасьця ў Менск,
у Кобрыньскiм раёне знаходзiцца вёска Лука. Але зь нядаўняга часу ўсе дарожныя
паказальнiкi на гэтым участку шашы замененыя i цяпер паведамляюць, што
побач зь трасаю знаходзiцца ня вёска, а племянны завод «Дружба».
Паводле зьвестак вiдавочцаў, старыя дарожныя паказальнiкi, на якiх была
напiсаная назва вёскi Лука, зьнiклi напярэдаднi вiзыту Ўладзiмера Ярмошына.
Прэм'ер-мiнiстар Беларусi наведаў гэтыя мясьцiны, каб азнаёмiцца зь працаю
племяннога заводу «Дружба». Адмiнiстрацыя прадпрыемства месьцiцца менавiта
ў вёсцы Лука, i каб назва населенага пункта менш кiдалася ў вочы спадару
Ярмошыну было прынятае рашэньне зьмянiць усе шыльды ў навакольлях вёскi.
Аля й пасьля ад'езду прэм'ера нiхто не зьбiраўся вяртаць былыя дарожныя
паказальнiкi зь надпiсам «Лука» на свае месцы. Сярод аўтамабiлiстаў распаўсюдзiлiся
чуткi пра тое, што згаданую вёску — дарэчы, адну зь буйнейшых у Кобрыньскiм
раёне — улады ўсё ж вырашылi назваць па-новаму. Тым больш што прыклад ужо
йснуе: у некалькiх кiлямэтрах ад Лукi iснавала вёска Быкi, назва якой ня
вельмi спадабалася мясцовай «вэртыкалi». Было прынята рашэньне перайменаваць
яе ў вёску Засiна. Потым вызначылiся кобрыньскiя дарожнiкi, якiя ўсталявалi
шыльду, дзе гэтая назва была перакладзеная з расейскае мовы й чытаецца
зараз як «Засiно» (з нацiскам на апошнi склад).
Што да вёскi Лука, дык размовы пра неабходнасьць мець «больш мiлагучную
назву» пачалiся адразу пасьля абраньня ў Беларусi першага прэзыдэнта (дагэтуль
анiякiх заўвагаў на гэты конт не было). У мiнулым годзе ўлады ўжо спрабавалi
падрыхтаваць грамадзкую думку ў пытаньнi да зьмены назвы: нават iснаваў
праект рашэньня раённага выканкаму, згодна зь якiм вёска павiнна быць перайменаваная
ў Дружбу, як i мясцовы племянны завод. Пра тую iдэю забылiся, але зараз
Лука засталася не пазначанаю на дарожных паказальнiках. Быццам бы не йснуе
больш вёскi з такой «крамольнай» для цяперашнiх беларускiх уладаў назваю.
Алег Супрунюк, вёска Лука Кобрыньскага раёну
|
