Перамогай лічаць у Віцебску сябры Каардынацыйнай Рады дэмакартычных
сілаў выбары, якія не адбыліся. Кампанія “Байкот-2000” завершылася для
амаль 60 адсоткаў месьцічаў ігнараваньнем гэтых выбараў. Ніводзін дэпутат
ня быў абраны ад Віцебску ў “Палату прадстаўнікоў”. І гэтыя вынікі невыпадковыя.
Як падкрэсьліў на сёньняшняй прэсавай канферэнцыі старшыня абласной
Каардынацыйнай Рады ў справе нагляданьня за выбарамі Хрыстафор Жэляпаў,
гэта вынік руплівай працы соцень чалавек на працягу апошніх месяцаў.
Толькі ўлётак і налепак з заклікам да байкоту было распаўсюджана каля
200 тысячаў. Ува многіх участковых камісіях чальцамі зьяўляліся сябры дэмакратычных
арганізацыяў. Усяго некалькі камісіяў горада засталіся без назіральнікаў.
Як вынік у Віцебску падчас галасаваньня ня было занадта злосных парушэньняў.
Канешне, бегалі са скрынямі па кватэрах і дзе-нідзе прыносілі значна больш
запоўненых бюлетэняў, чым было заяўлена, як на 18-м участку Чкалаўскай
акругі. Але, як скардзіліся прадстаўнікі камісіяў, многія жыхары не пускалі
іх нават на ганак. Не было такога, як на 26-м Полацкім участку, калі скрыню
для галасаваньня прывезьлі ў двор дома № 42 па вуліцы Дзяржынскага і агітавалі
галасаваць ці за Ісаева, ці за Ільніцкага. Не спрацавала ў Віцебску і папярэдняе
галасаваньне.
У Віцебскім жа раёне, старшыня райвыканкаму непасрэдна ў сваім кабінэце
разам са старшынём акруговай камісіі прымалі бюлетэні з участкаў. Назіральнікаў,
натуральна туды не дапусьцілі.
Калі апошнія выбаршчыкі-віцябляне яшчэ ішлі на ўчасткі, ужо зьявіліся
першыя пацярпелыя па выніках кампаніі. Члены БПСМ, вучні старэйшых клясаў
СШ № 29 на чале з Аляксеем Байдай, лавілі па адным і зьбівалі падлеткаў
з клюбу “Мядзьведзь”, якія дапамагалі разносіць улёткі за байкот выбараў.
“Гэта вам за тое, што вы супраць Бялова”, — казалі яны. Але нават каб выбары
і адбыліся, стаўленік вэртыкалі, цяперашні дэпутат Бялоў усё роўна па іх
выніках не атрымаў бы перамогі.
Алег Жукоўскі, Віцебск
|
