Сёньня ў Жабінцы перад пачаткам галасаваньня на выбарчым участку №43
кардынатар групы назіральнікаў па гэтым раёне Берасьцейскай вобласьці Генадзь
Самойленка абвесьціў галадоўку. Ён пайшоў на гэты крок, каб выклікаць пратэст
супраць дзеяньняў мясцовых уладаў пад час выбараў.
Жабінкаўскі раён уваходзіць у выбарчую акругу №13, якая аб’ядноўвае
тэрыторыі яшчэ двух раёнаў – Берасьцейскага і Маларыцкага. Па гэтай акрузе
мясцовая вэртыкаль атрымала заданьне правесьці дэпутатам у “палату прадстаўнікоў”
намесьніка старшыні аблвыканкаму Валерыя Захарчанку.
Для дасягненьня сваёй мэты ўлады пайшлі на значнае парушэньне выбарчага
закону ўжо пад час агітацыйнай кампаніі, калі паставілі кандыдатаў у няроўныя
ўмовы. Сустрэчы з выбаршчыкамі Валерыя Захарчанкі рыхтаваліся пры непасрэдным
удзеле чыноўнікаў з адпаведных райвыканкамаў, у той жа час астатнія кандыдаты
па згаданай акрузе былі пазбаўленыя магчымасьці трапіць на згаданыя сустрэчы.
Падобныя факты парушэньняў закону фіксаваліся яшчэ да пачатку галасаваньня,
але мясцовыя ўлады вырашылі пайсьці далей і не рэгістраваць на ўчастках
айчынных назіральнікаў.
Найбольш актыўна ў гэтым кірунку папрацавалі ўлады Жабінкаўскага раёну.
Тут у якасьці незалежных назіральнікаў спрабавалі адсочваць хаду галасаваньня
некалькі настаўніцаў мясцовых школаў. Спачатку ім было адмоўлена ў рэгістрацыі
на канкрэтных выбарчых участках, а потым некаторых настаўніцаў пачалі выклікаць
у райвыканкам. Там іх папярэдзілі, што ўдзел у назіраньні можа прывесьці
да звальненьня з працы. На кватэры іншых настаўніцаў тэлефанавалі адказныя
чыноўнікі вэртыкалі і таксама прымушалі адмовіцца ад удзелу ў назіраньні
за выбарамі. У выніку, паводле словаў каардынатара назіральнікаў па Жабінкаўскім
раёне Генадзя Самойленкі, пяць чалавек, прозьвішчы якіх ён пакуль дзеля
вядомых прычынаў назваць ня можа, вымушаныя былі здаць пасьведчаньні назіральнікаў,
каб пазбавіцца непрыхаванага ціску з боку ўладаў.
Проатэстуючы супраць дзеяньняў мясцовых чыноўнікаў, спадар Самойленка
сёньня раніцай на адным з выбарчых участкаў, што адчынены ў Жабінкаўскай
школе №1, заявіў, што распачынае галадоўку. Такім чынам ён зьбіраецца прыцягнуць
увагу грамадзкасьці да парушэньняў, якія зьдзейсьнілі прадстаўнікі ўладаў
пад час падрыхтоўкі і правядзеньня выбараў.
Алег Супрунюк, Берасьцейская вобласьць
|
