Пятніца, 13 Кастрычніка 2000

Сёньня

Невядомыя асобы размалявалі фашыстоўскай свастыкай помнік, які ўшаноўвае памяць пра пакуты тысячаў берасьцейскіх габрэяў.

Інфармацыя пра тое, што ў Берасьці на рагу вуліцаў Карбышава ды Дзяржынскага апаганены памятны знак, што ўсталяваны ў гонар ахвяраў мясцовага гета, зьявілася ўвечары 12-га. Але ўсё яшчэ сёньня апоўдні пра гэта нічога не было вядома праваахоўчым ворганам.

Натуральна, што не былі праведзеныя і апэратыўныя дзеяньні, каб знайсьці тых, хто намаляваў свастыку.

Дарэчы, такія паводзіны ўладаў ня надта зьдзівілі берасьцейскага кіраўніка цэнтру “Галякост” Аркадзя Бляхера. Ён нагадаў, што гэта трэці акт вандалізму ў дачыненьні да помніку. У першым выпадку выканаўцу гэтага злачынства ўдалося знайсьці –ім быў 13-ці гадовы юнак, супраць якога з цягам часу непрыкметна закрылі крымінальную справу. Другі выпадак не раскрыты.

Зьвяртае ўвагу факт, што апаганены помнік менавіта зараз. 15-га кастрычніка будзе адзначана 58-я гадавіна з таго дня, як было зьнішчанае мясцовае гета. У ім на той момант былі 34 тысячы габрэяў зь Берасьця і навакольных вёсак.

Аркадзь Бляхер лічыць, што тыя, хто апаганіў помнік, рабілі сваю справу сьвядома і ведалі пра набліжэньне сумнай даты. Ён таксама нагадаў, што тэрыторыі, дзе месьцілася гета, даўно не шанцуе – у свой час мясцовыя ўлады распачалі тут будаваць жыльлё. Для выкананьня плянаў разбурылі імправізаваны помнік, які быў усталяваны роднымі тых, хто загінуў падчас зьнішчэньня гета.

Алег Супрунюк, Берасьце