Нядзеля, 8 Кастрычніка 2000

Сёньня

27-мі мільёнам польскіх выбаршчыкаў прапанавана лідэра краіны з 12-ці кандыдатаў. Фаварытам – цяперашні прэзыдэнт, прадстаўнік левых палітычных сілаў Аляксандар Квасьнеўскі.

Паводле апошніх сацыялягічных апытаньняў, 57 адсоткаў выбаршчыкаў гатовыя аддаць галасы менавіта Квасьнеўскаму. Другім – вылучэнец бізнэсу Анджэй Аляхоўскі. На трэцяй пазыцыі з 17-цю адсоткаў падтрымкі лідэр “Салідэрнасьці” Мар’ян Кшаклеўскі.

Ці магчыма такое, што палякі не абяруць Квасьнеўскага? Аглядальнікі сыходзяцца ў думцы, што такое малаверагодна. Сёньня ад 8-й раніцы адчыніліся выбарчыя ўчасткі, але толькі недзе к 1-й гадзіне колькасьць тых, хто прагаласаваў, перайшла мяжу адной траціны.

Гэта ў асноўным людзі сталага ўзросту. Я пабываў у 365 выбарчым участку, што блізу Старога гораду і пераканаўся, што прагнозы польскіх аналітыкаў і журналістаў спраўджваюцца: найбольш актыўныя на выбарах – пэнсіянэры, якія не жадаюць нейкіх зьменаў у польскай унутранай палітыцы.

Таксама пяцігадовая палітыка Аляксандра Квасьнеўскага задавальняе і “сярэднюю” клясу. Пры Квасьнеўскім сярэдні заробак палякаў павялічыўся ад 250 да 500 даляраў, што лічыцца някепскімі грашыма.

Натуральна, што ёсьць і тыя, якія варожа, іранічна ставяцца да фаварыта ці ўвогуле да выбараў. Тыя маладыя людзі, да якіх я падыходзіў на вуліцах Варшавы, ці цалкам не цікавяцца выбарамі, ці будуць галасаваць за іншых кандыдатаў.

Першыя вынікі галасаваньня зьявяцца, паводле абяцаньняў выбарчай камісіі, недзе ў 21 вечара. Дарэчы, за выбарамі ў Польшчы амаль ня сочаць замежныя назіральнікі. Бо Польшча лічыцца ў сэнсе дэмакратыі беспраблемнай краінай.

Журналістаў прыехала вельмі шмат. І некаторыя ўжо пачалі сьвяткаваць перамогу Аляксандра Квасьнеўскага.

Алег Грузьдзіловіч, Варшава