"Беларусь сёлета будзе мець найбольшую сярод дзяржаваў СНД інфляцыю", - заявіў
сёньня на прэсавай канфэрэнцыі ў Менску прадстаўнік Усясьветнага банку
ў Беларусі Сяргей Кулік.
Адной з умоваў Усясьветнага банку ў справе аднаўленьня крэдытнага супрацоўніцтва
зь Беларусьсю была валютная лібэралізацыя. У мінулым месяцы адзіны абменны
курс беларускага рубля ўсталяваны. Аднак, як паведаміў Сяргей Кулік, Банк
лічыць гэтыя зьмены недастатковымі. Камэнтуючы нашаму радыё цяперашнюю
пазыцыю Ўсясьветнага банку ў дачыненьні да Беларусі, спадар Кулік зазначыў:
“Нас вельмі хвалюе сытуацыя з разьвіцьцём вытворчых стасункаў у Беларусі,
пытаньні структурнае перабудовы, фармаваньня ў краіне рынкавых мэханізмаў.
Паводле папярэдніх прагнозных ацэнак Усясьветнага банку, Беларусь сёлета
будзе мець найбольшую сярод дзяржаваў Садружнасьці інфляцыю. Таму нам хацелася
б працягнуць дыялёг наконт структурных пераўтварэньняў у Беларусі”, — зазначыў
Сяргей Кулік.
Як вынікае зь ягоных словаў, кіраўніцтва Ўсясьветнага банку хоча ўпэўніцца
ў доўгатэрміновасьці цяперашняга эканамічнага курсу беларускіх уладаў,
скіраванага на рынкавыя пераўтварэньні. Апроч таго, паводле словаў Куліка,
Банк шчыльна каардынуе свае дзеяньні зь Міжнародным валютным фондам. І
таму сур’ёзная крэдытная падтрымка з боку Банку магчымая толькі пры аднаўленьні
Фондам праграмаў супрацоўніцтва зь Беларусьсю. МВФ жа крэдытаваць Беларусь
пакуль не зьбіраецца. І таму ў бліжэйшых плянах Усясьветнага банку — дапамагчы
Беларусі ў сфэры энэргаашчаджэньня.
Мяркуемы праект ахоплівае каля пяці соцень аб’ектаў сацыяльна-культурнае
сфэры. Рэч, аднак, у тым, што й гэтаму намеру папярэднічае фінансавая ўмова
Ўсясьветнага банку. А менавіта: партнэрства ў сфэры энергаашчаджэньня прадугледжвае
на супольны праект шматмільённыя фінансавыя выдаткі і беларускага боку.
Між тым, Сяргей Кулік ня ўпэўнены, што такія грошы знойдуцца сёньня ў беларускім
бюджэце.
Міхал Стэльмак, Менск
|
