Пятніца, 29 Верасьня 2000

Сёньня:

Насуперак пратэстам артыстаў тэатру “Вольная сцэна”, міністар культуры Аляксандар Сасноўскі пацьвердзіў прызначэньне мастацкім кіраўніком тэатру Валера Анісенкі замест надта незалежнага Валера Мазынскага. Каб прымусіць артыстаў пагадзіцца з гвалтоўным прызначэньнем, Анісенка дадаткова прызначаны й на пасаду дырэктара тэатру, а штат тэатру пашыраны на 15 акторскіх ставак, на якія будуць запрошаныя страйкбрэйкеры.

Прафсаюз работнікаў культуры Менскае вобласьці зьвярнуўся да творчае інтэлігэнцыі сталіцы, а таксама да іншых прафсаюзаў з заклікам падтрымаць акцыю супраць жабрачых заробкаў працаўнікоў бюджэтнае сфэры. Сярэднямесячны заробак ва ўстановах мастацтва цяпер складае 47 тысячаў беларускіх рублёў, а ва ўстановах культуры — 53 тысячы, што значна ніжэй за рысу беднасьці. Прафсаюз прапаноўвае наладзіць акцыю ў выглядзе канцэрту, дзе канфэрансье будзе аб’яўляць імёны артыстаў разам зь іхнымі заробкамі й распавядаць пра гаротны стан інтэлігенцыі. Дзеля перастрахоўкі прафсаюз просіць не называць акцыю фінансавага стрыптызу акцыяй пратэсту.

4 кастрычніка ў кінатэатры “Змена” адбудзецца канцэрт-прэзэнтацыя першага кампакт-дыску з запісамі выбітнага опэрнага сьпевака Міхала Забэйды-Суміцкага, якому сёлета споўнілася б 100 гадоў. Выдавец рарытэтнага дыску — Беларуская Музычная Альтэрнатыва. На вечарыне выступяць сьпевакі й пісьменьнікі, а таксама аўтары дакумэнтальнага фільму “Вяртаньне Міхала Забэйды”.

У Нацыянальным мастацкім музэі адчынілася міжнародная выстава “Ілюзія адлегласьцяў”, у якой, апроч беларускіх, бяруць удзел фотамастакі з Нямеччыны, Францыі ды Швэцыі. Асноўную частку экспазыцыі складаюць здымкі, зробленыя замежнікамі ў Беларусі. Адзін з найбольш цікавых удзельнікаў выставы — францускі паляк Богдан Канопка, заснавальнік мастацкага руху “Элемэнтарная фатаграфія”. На ягоных здымках помнік Леніну прыціскае да асфальту менскі Дом ураду, вылазяць з-пад зямлі бюсты Леніна й Маркса, а мэтафараю ўсёй лукашэнкавай Беларусі выглядае “Пункт Зэро” — Кастрычніцкі пляц, дзе месьціцца рэзыдэнцыя Лукашэнкі, найглыбейшая дзіра ў Эўропе.

Гурт “Нэўрадзюбель” зьняў відэакліп на сваю новую кампазыцыю, якая мае назву “Вася п’е”. Гэтым разам рэжысэрам выступіў не Анатоль Вечар, а Юры Вяржыцкі. Апроч таго, “Нэўрадзюбель” скончыў працу над альбомам сваіх лепшых песень “Народнае багацьце”, куды ўвайшла й беларускамоўная песьня, якая мае назву “Але”.

У Нацыянальным музэі гісторыі й культуры праходзіць выстава старажытнакітайскага ўжытковага мастацтва. Тут можна ўбачыць традыцыйныя музычныя інструмэнты, рытуальны посуд, упрыгожаньні з нэфрыту ды іншыя вырабы старажытных майстроў. Некаторыя з 6 соцень экспанатаў аналягічныя тым, якімі кітайцы карысталіся яшчэ 4 тысячы гадоў таму.

30.000 габрэяў Беларусі адсьвяткавалі Новы год, паводле габрэйскага каляндара — 5761-ы. Менавіта ў гэты дзень былі створаныя Адам і Эва. Сьвяточныя імпрэзы праходзяць і сёньня ва ўсіх 18 сынагогах Беларусі.

Юрась Барысевіч, Менск