Сёньня прыватныя гандляры буйнейшых рэчавых рынкаў
Гомельскага рэгіёну падтрымалі агульнанацыянальны страйк.
Звыш двух соцень гандляроў Рэчыцы пратэставалі сёньня супраць неапраўданага
ўскладненьня прадпрыймальніцкае дзейнасьці, незаконных канфіскацыяў тавараў
і чарговага падатковага ўціску. Вось як патлумачыла свой удзел у страйку
прадпрыймальніца Тацяна Сава: “Проста ўжо накіпела ў душы. Хочацца працаваць
спакойна, не адчуваць сябе злачынцам”, — сказала прадпрыймальніца. У Рагачове
сёньня гандляры рэчавага кірмашу скарысталі страйк для правядзеньня сходу,
на якім стварылі суполку Саюзу прадпрыймальнікаў. Узначаліў яе Ўладзімер
Ціхінскі.
Ня выйшлі сёньня на працу і каля трох тысячаў прыватных гандляроў Гомелю.
Нязвыкла пуста выглядаў рынак “Давыдаўскія рады” ў Савецкім раёне гораду.
На Цэнтральным кірмашы, дзе прадаюцца прамысловыя вырабы, не было ніводнага
страйкбрэхера. Гандлёвыя шэрагі спрэс пуставалі. Да страйку далучыліся
і многія з тых, хто гандлюе харчовымі прадуктамі.
Напярэдадні дырэкцыя кірмашу, разам зь міліцыянтамі й падаткоўцамі запалохвала
арганізатараў страйку — прадстаўнікоў Свабоднага прафсаюзу прадпрыймальнікаў
Тацяну Марчанку, Тамару Нічыпарэнку ды іншых — адносна немагчымасьці правядзеньня
мітынгу. Відаць таму, каб розгалас пра страйк і мітынг не дайшоў да прэм’ера
Ярмошына, які прыяжджаў сёньня ў Гомель, наведваў “доўгабуды”, аглядаў
новыя вагоны, станцыю перапампоўваньня нафты, але са страйкоўцамі не сустрэўся.
Прадпрыймальнікі не мітынгавалі. Яны ахвотна дзяліліся сваімі праблемамі.
Распавядае Віктар Чмыхаў:
“Рэзкі ўздым падатковае нагрузкі — кожны год, кожны месяц — ён ужо захлынае.
Людзі ня могуць гандляваць. Я актыўную прадпрыймальніцкую дзейнасьць спыніў
яшчэ ў мінулым годзе. Рызыкоўна ўкладаць свае грошы. У Расею людзі ад’яжджаюць,
сыходзяць у цень, бо нельга заплаціцьтакія шалёныя падаткі. А тут запаланяюць
усё віетнамцы. Як жа нацыяналізму ня быць? Скупляюць месцы, затым нам перапрадаюць.
Плацяць ня толькі дзяржаве, але й кірмашу. Вось вам і карупцыя. Мы хочам
падняць эканоміку, а нам не даюць. На каго ж нашыя дзеці, дзяржава абапірацца
будзе? Няма на каго!”, — зазначыў прадпрыймальнік Чмыхаў.
Казімер Яноўскі, Гомель
|
