(эфір 22 лістапада)
170 мінімальных заробкаў штрафу – такі прысуд быў зачытаны сёньня
Андрэю Мялешку, кіраўніку Гарадзенскай арганізацыі Маладога Фронту. Гэта
612 тысяч рублёў. Хлопца пакаралі адначасова за акцыю “Моладзь – за перамены”
і за шэсьце, якое адбылося ў горадзе яшчэ 8-га кастрычніка.
Судовы разбор адбыўся ўчора. А сёньня ў Ленінскім раённым судзе горада
Андрэю Мялешку быў зачытаны такі прысуд: штраф 612 тысяч рублёў. Рашэньне
прыняў судзьдзя ў адміністрацыйных справах Дзьмітры Дземчанка.
Андрэй Мялешка патлумачыў, што падаваў заяўку аб правядзеньні 12-га
лістапада пікета каля Дома сувязі. Улады дазвол далі, аднак зьмянілі і
месца правядзеньня, і час. Спадар Мялешка сказаў, што накіраваўся да Дому
сувязі, каб папярэдзіць моладзь, якая магла ня ведаць аб пераносе месца
пікетаваньня. Аднак там ён быў затрыманы.
У міліцыі на яго быў складзены пратакол як на арганізатара недазволенага
пікета. Гэта раз. Па-другое, міліцыянты дадаткова напісалі яшчэ адзін пратакол,
абвінаваціўшы Мялешку у актыўным удзеле ў недазволеным шэсьці. Хаця з часу
яго правядзеньня мінуў больш за месяц. Зазначу, што 8-га кастрычніка пратаколы
увогуле не складаліся. Усе гэтыя акалічнасьці, аднак, не засмуцілі судзьдзю.
Гэта самы суворы прысуд. На мінулым тыдні іншыя ўдзельнікі акцыі “Моладзь
– за перамены” былі пакараныя штрафамі па 20-30 мінімальных заробкаў.
Сяргей Астраўцоў, Горадня
|
