Кіраўніцтва Беларускага тэлецэнтру зьвярнулася да ўрадавых
структураў са скаргаю на тое, што цэнтар апынуўся ў крызысным фінансавым
стане.
Напярэдадні парлямэнцкіх і прэзыдэнцкіх выбараў з прапагандысцкай машынаю
адбываецца нешта дзіўнае. З аднаго боку, улады імкнуцца зрэалізаваць новыя
праекты, якія запатрабуюць шмат грошай. З другога – Беларускай тэлевізіі
сёньня не хапае сродкаў на самае неабходнае.
З афіцыйных і неафіцыйных крыніцаў вядомыя тры новыя праекты ў галіне
мас-мэдыяў. Паводле неафіцыйных крыніцаў, улады Беларусі маюць намер стварыць
новае міністэрства, якое будзе кіраваць дзейнасьцю дзяржаўных радыё, тэлевізіі,
газэтаў і часопісаў. Гэтая ідэя зьявілася каля паўгода таму і апошнім часам
ізноў пачала абмяркоўвацца ва ўладных структурах.
Другі праект – новы беларускі тэлеканал. Ідэя выглядае даволі дзіўна,
таму што грошай і кадраў не хапае нават цяперашняму беларускаму тэлеканалу.
Паводле словаў намесьніка кіраўніка адміністрацыі Лукашэнкі Івана Пашкевіча,
другі канал беларускае тэлевізіі будзе акцыянэрным таварыствам, і таму
фінансавыя праблемы БТ ня маюць да яго аніякага дачыненьня. Дзяржава разьлічвае
знайсьці грошы на свае прапагандысцкія мэты ў прадпрыемстваў, і ў яе гэта,
здаецца, атрымалася. Паводле словаў Пашкевіча, усе патэнцыйныя інвэстары,
якім Лукашэнка прапанаваў удзел у праекце, пагадзіліся дапамагчы стварыць
БТ-2.
Трэці праект – праект самое Беларускае тэлевізіі. Там было запушчана
некалькі новых праграмаў, для якіх набывалі адмысловае студыйнае афармленьне.
У той жа час на пачатку году беларуская тэлевізія мела значную запазычанасьць
перад тэлецэнтрам, які адказвае за тэхнічнае забесьпячэньне дзейнасьці
БТ. Хутчэй за ўсё, гэтая запазычанасьць не была пагашаная. У тэлецэнтра
няма грошай нават на запчасткі для тэлевізійнае тэхнікі, а заробак кваліфікаванага
інжынэра складае каля 20 даляраў. Таму ня дзіўна, што на працягу ўсяго
трох месяцаў з тэлецэнтру звольнілася каля 70 чалавек. Час ад часу не хапае
грошай нават на бэнзын для аўтатранспарту, і з гэтае прычыны зрываюцца
службовыя выправы.
Беларускай тэлевізіі таксама не хапае грошай. Сёлета яно сутыкнулася
з праблемаю затрымкі выплаты заробкаў.
Ганна Навумовіч, Менск
|
