Чацьвер, 4 Траўня 2000

Сёньня

Прынятая Палатаю прадстаўнікоў Кангрэсу адмысловая рэзалюцыя ў справе Беларусі ня стала нечаканасьцю для беларускіх палітыкаў. Пракамэнтаваць гэтую падзею я папрасіў віцэ-сьпікера гэтак званае “Палаты прадстаўнікоў” і чалавека, блізкага да Аляксандра Лукашэнкі – Ўладзімера Канаплёва…

(Канаплёў: ) “Я Палаце Прадстаўнікоў раю ня ўмешвацца ў справы нашае сувэрэннае дзяржавы, няхай лепш навядуць парадак у сваёй хаце. Яны па нас шмат чаго прымалі раней, і я лічу, што гэта – чыста палітычная неабдуманая ініцыятыва, на якую прадстаўнікоў Кангрэсу штурхаюць пэўныя апазыцыйныя сілы ў нашай краіне.

Вы ўявіце, якія б былі наступствы для Злучаных Штатаў Амэрыкі, калі б мы прынялі рэзалюцыю пра тое, што яны дрэнна абыходзяцца з нэграмі ці зь індзейцамі – загналі іх у рэзэрвацыі. Аніякіх наступстваў ня будзе, што яны могуць нам зрабіць?

Мы йдзем на наступныя выбары ўвосень, самыя дэмакратычныя выбары, якія будуць праведзеныя ў Рэспубліцы Беларусь за апошнія гады”,

– паведаміў нашаму радыё спадар Канаплёў.

У лідэраў беларускай апазыцыі кардынальна іншы погляд на тую падзею, што адбылася ўчора на Капіталійскім узгорку ў Вашынгтоне. Гаворыць лідэр АГП й дэпутат Вярхоўнага Савету Анатоль Лябедзька:

(Лябедзька: ) “Дакумэнт – палітычнага зьместу, але натуральна, што наступствы яго будуць ня толькі палітычныя, але і экананмічныя, і зьвязаныя з тымі рэшткамі іміджу, якія яшчэ былі ў рэжыма Лукашэнкі на міжнароднай арэне. Я думаю што час, калі прынятая гэтая рэзалюцыя, – ён таксама вельмі істотны. Зараз ідзе дыскусія, ці будзе рэжым і асабіста Лукашэнка выконваць тыя міжнародныя абавязкі, якія ён на сябе ўзяў пад час саміту ў Стамбуле. І я думаю, што якраз Кангрэс Злучаных Штатаў Амэрыкі найбольш пасьлядоўна адстойвае гэтую пазыцыю. Я не выключаю, што зараз будзе нейкая хваля антыамэрыканскіх заяваў на ўзроўні Масквы – Дзяржаўнай Думы, іншых публічных палітыкаў – але калі справа дойдзе да канкрэтнага вырашэньня канкрэтных пытаньняў, дык я думаю, што Масква павінна будзе ўлічваць наступствы гэтае рэзалюцыі”.

– лічыць спадар Лябедзька.

А вось думка старшыні партыі БНФ Вінцука Вячоркі…

(Вячорка: ) “Тое, што рэзалюцыя, прайшоўшы ўсе папярэднія інстанцыі ўхваленая Кангрэсам, вельмі важны крок дзеля стварэньня спрыяльнага міжнароднага клімату вакол пытаньня вяртаньня дэмакратыі і абароны незалежнасьці Беларусі. Па-першае, ясна сьцьвярджаецца, што ў цяперашнім кантэксьце немагчымыя ніякія дэмакратычныя выбары ўвосень. Гэтая пазыцыя Злучаных Штатаў павінна паўплываць і на эўрапейскія краіны. І добра, што тэкст прыняты напярэдадні прыезду сюды эўратройкі. Другі момант – у гэтым дакумэнце ўпершыню ў найноўшай гісторыі міжнародных дачыненьняў Беларусі адназначна сьцьвярджаецца, што Расея нясе віну за кансэрвацыю рэжыму Лукашэнкі, і адназначна сьцьвярджаецца, што замахі на незалежнасьць Беларусі ёсьць пагражальныя для раўнавагі, для дэмакратычных, мірных працэсаў у нашым рэгіёне. Каштоўнасьць дакумэнту якраз у тым, што дзьве справы – незалежнасьць Беларусі і аднаўленьне дэмакратыі ў Беларусі – завязваюцца ў адно цэлае”.

Вы чулі камэнтар да рэзалюцыі ў справе Беларусі Палаты прадстаўнікоў Кангрэсу ЗША лідэра партыі БНФ Вінцука Вячоркі.

Альгерд Невяроўскі, Менск

(Тэкст рэзалюцыі, а таксама інтэрвію з ініцыятарам яе прыняцьця, кангрэсмэнам Сэмам Гейдэнсанам ды іншыя прынагадныя матэрыялы чытайце ў адмысловым разьдзеле “Рэзалюцыя Кангрэсу ЗША” у разьдзеле “Што новага” на галоўнай старонцы сайту)