Аўторак, 28 Сакавіка 2000

Сёньня

Сёньня судзьдзя Руслан Казадаеў разглядаў першай справу Сяргея Пціцына, якога схапілі міліцыянты, калі той выйшаў з мэтро на тралейбусны прыпынак.

У судзе ён распавёў, што там ён сустрэў свайго знаёмага. Не пасьпелі яны павітацца, як убачылі, што міліцыянты цягнуць жанчыну ў “варанок”. Яго знаёмы абурыўся: “Што ж вы робіце?! Чацьвёра мужчынаў, і цягнеце адную жанчыну?!” і адразу атрымаў удар у твар. Ён паваліўся на зямлю, і яго пачалі зьбіваць пяць міліцыянтаў.

Сяргея Пціцына схапілі й кінулі ў вадзін “варанок”, а яго знаёмага Леаніда Сакольчыка – у другі. Адзін апынуўся ў Савецкім РАУСе, а другі – на стадыёне. Сяргея Пціцына адвезьлі ў спэцпрыёмнік-разьмеркавальнік на вуліцу Акрэсьціна, а Леаніда Сакольчыка выкінулі з машыны разам зь дзясяткамі затрыманых у Лошыцы.

На гэты раз сьведкамі з боку міліцыі былі тыя самыя вайскоўцы, якія самі затрымлівалі людзей. Гэта шэраговыя жаўнеры нутраных войскаў Валодзін і Бойка. Сёньня яны зьявіліся ў сваёй звычайнай вайсковай форме. Яны патлумачылі, што схапілі Пціцына за тое, што, “актыўна ўдзельнічаў у мітынгу, якога не было”. На пытаньне судзьдзі: “У чым была ягоная актыўнасьць?”, адказалі: “Ён не рэагавал”. Як ні намагаўся судзьдзя даведацца ад іх – на што ж ён не рэагаваў, так і ня здолеў атрымаць адказу…

Наступная справа была Ангеліны Масюты. Яна атрымала папярэджаньне. Судзьдзя Руслан Казадаеў праігнараваў тую абставіну, што супрацоўнікі міліцыі Галубовіч і Барысевіч хлусілі. Назіральнікі лічаць, што справа была б спыненая, калі б спадарыня Масюта не размаўляла ў судовай залі па-беларуску.

Гэтая ж абставіна адыграла сваю ролю ў справе Аляксандра Гомана зь Дзятлаўскага раёну Гарадзенскае вобласьці. Ён таксама атрымаў сёньня папярэджаньне.

Потым у судовай залі зьявіўся Юрась Барок, сьвятар рыма-каталіцкага касьцёлу, які выконвае абавязкі пробашча Бялынічаў і Шклова. Ён таксама быў затрыманы 25 сакавіка пад час “зачысткі” ў раёне пляцу Якуба Коласа. Ён паведаміў “Радыё Свабода”:

(Барок: ) “Так здарылася, што 25 сакаавіка я знаходзіўся ў Менску па сваіх службовых справах, і дзесьці ў 12.30 прыкладна я накіроўваўся ў катэдру на плошчы Свадобы, і, выходзячы з ЦУМа, я ўбачыў, што там шмат народу. Я не да канца і зарыентаваўся, што там адбывалася, але ў гэты момант, ужо ў раёне ЦУМа і гэтай прадуктовай крамы падышлі супрацоўнікі міліцыі… падышлі, гэта мякка сказана. Яны наляцелі і, прымяняючы сілу і нецэнзурную лаянку, не растлумачыўшы ў чым справа, яны адразу заламалі мне рукі, пасадзілі мяне ў сваю машыну, “казелок” так званы, і завезьлі ў Савецкі РАУС. Я паказаў сваё пасьведчаньне, што я сьвятар і запытаўся прозьвішчы тых, хто мяне затрымліваў, і на якой падставе. Я хацеў проста атрымаць тлумачэньне, чаму так здарылася, чаму мяне беспадстаўна затрымалі, і каб хто-небудзь папрасіў прабачэньня”, – паведаміў Юрась Барок, сьвятар рыма-каталіцкага касьцёлу ў Шклове.

Судзьдзя Руслан Казадаеў спыніў справу Аляксандра Алешкі, якога затрымалі разам з 15-цігадовым сынамі па дарозе ў мэтро. Ён правёў двое сутак ў спэцпрыёмніку-разьмеркавальніку.

Вось што ён распавёў “Радыё Свабода”:

“25 сакавіка разам са сваім непаўнагадовым сынам, яму толькі споўнілася 15 год ішоў ў мэтро й быў схоплены міліцыянтамі. Спачатку схапілі майго сына, а потым мяне. Мяне кінулі ў машыну, а сына – у аўтобус. Мяне завезьлі ў Савецкі РАУС, а куды сына – я ня ведаў і, таму, вельмі хваляваўся. Двое сутак я правёў у спэцпрыёмніку, дамоў патэлефаніць мне не далі.

Толькі потым высьвятлілася, што сына завезлі на стадыён, пратрымалі 2 гадзіны, а потым выпусьцілі за браму. У панядзелак нам дахаты патэлефанілі й патрабавалі, каб бацькі напісалі тлумачэньне, што рабіў наш сын 25 сакавіка і чаму быў затрыманы. Гэта было патрабаваньне Першамайскага РАНА.

Я зьбіраюся падаць скаргу ў пракуратуру на дзеяньні міліцыянтаў. Мой сын быў вельмі напалоханы: бранетранспартэры, сабакі, міліцыянты зьбіваюць нагамі й дубінкамі жанчынаў, якія ляжаць на зямлі. Гэта ня можа прайсьці бязьсьледна. У яго зьявілася нянавісьць да людзей у міліцэйскай форме”, – паведаміў Аляксандар Алешка.

Пакуль судзьдзя Руслан Казадаеў разглядаў адміністрацыйныя справы затрыманых 25 сакавіка, зьявіліся новыя затрыманыя. Лідэра Сацыял-дэмакратычнае партыі “Народная Грамада” Міколу Статкевіча супрацоўнікі міліцыі Савецкага РАУСу затрымалі сёньня на аўтастаянцы й пасьля складаньня пратаколу даставілі ў Савецкі суд. Іна Шыйко перанесла разгляд гэтае справы на заўтра з-за хадайніцтва Статкевіча пра адваката.

А 16-й гадзіне міліцыянты затрымалі Вячаслава Сіўчыка, калі той выходзіў са штаб-кватэры БНФ. Яго кінулі ў “варанок”, адвезьлі ў Савецкі РАУС, а зараз яго таксама чакаюць у Савецкім судзе.

Любоў Лунёва, Менск