(эфір 26 сакавіка)
Гаворыць народны пісьменьнік Беларусі Васіль Быкаў.
Мне думаецца, што тыя падзеі, якія адбыліся ў Менску 25 сакавіка, вельмі
паказальныя ў пэўных адносінах.
Найперш у тым сэнсе, што палітыка рэжыму ніколькі не мяняецца на працягу
апошніх гадоў. Хаця пасьля Маршу Свабоды паявілася нейкая ілюзія ў некаторай
часткі нашага грамадзтва, што пад узьдзеяньнем унутраных сілаў, а таксама
міжнародных, рэжым зьмякчае свае адносіны да беларускай дэмакратыі. Ну
але ўсё гэта вельмі ілюзорна і вельмі няпэўна працягвалася і вельмі коратка
доўжылася.
І вось падзеі 25-га паказалі, што рэжым вяртаецца да сваіх ранейшых,
я б сказаў, клясычных мэтадаў падаўленьня. І тут немагчымыя ніякія перамовы
– ані пад эгідай міжнародных арганізацыяў, ані пры саступках апазыцыі.
Ён будзе няўхільна доўжыць сваю палітыку і далей. Асабліва цяпер, у атмасфэры
таго, што адбываецца ў Расеі ў сувязі з перамогай пэўных сілаў, якія канешне
натхняюць пэўным чынам, надаюць другое дыханьне нашай беларускай дыктатуры.
Васіль Быкаў
Прага, 26 сакавіка 2000 г.
|
