Учора Міжнародная Ліга правоў чалавека зьвярнулася да Аляксандра Лукашэнкі
са зваротам у справе дэпутата Андрэя Клімава.
“Мы выказваем сваю глыбокую занепакоенасьць нядаўнім прысудам, вынесеным
дэпутату легітымнага парлямэнту Беларусі – Вярхоўнага Савету 13-га скліканьня
– Андрэю Клімаву, які абвінавачаны ў растраце дзяржаўнай маёмасьці і фінансавых
махінацыях”.
У звароце нагадваюцца арышт Клімава, ягоныя дзьве галадоўкі, зьбіцьцё
ў сьледчым ізалятары, тое, што ў суд ён быў дастаўлены басанож і ў парванай
вопратцы, і што судзьдзя адмовілася выклікаць мэдычную дапамогу.
“Ліга перакананая, – гаворыцца ў звароце на імя Лукашэнкі – што суд
над Клімавым і жорсткае абыходжаньне зь ім у часе затрыманьня зьяўляюцца
помстай за ягоную крытыку ў адрас Лукашэнкі, за тое, што дэпутат падпісаў
пэтыцыю із заклікам да імпічмэнту Лукашэнку за парушэньні нацыянальнага
і міжнароднага права.
“Ліга заклікае Вас, – гаворыцца з звароце – дазволіць распачаць сьледзтва
ў справе незаконнага арышту Клімава, дапусьціць разгляд апэляцыі такім
чынам, каб дэпутат меў свабодны і справядлівы суд, у часе якога ён быў
бы вызвалены з-пад варты”.
“Дзякуем за ўвагу і спадзяемся Вашага адказу”. – Гаворыцца на заканчэньне
ва ўчарашнім звароце Міжнароднай Лігі правоў чалавека да Аляксандра Лукашэнкі,
які падпісала выканаўчы дырэктар Лігі Кэці Фіцпатрык.
|
