У Менску пачаўся антываенны пікет “Мы грамадзяне Беларусі выказваем
рашучы прачэст супраць ваенных дзяньняў у Чачні, дзе адбываецца сапраўдны
гэнацыд чачэнскага народу,” – гаворыцца ў пэтыцыі, перададзенай у амбасаду
Расеі.
Сёньня 16-гадовы Алег не пайшоў у школу. Замест гэтага ён браў удзел
у антываенным пікеце, што ладзіў “Малады Фронт”. Такіх, як Алег ля будынку
па вуліцы Старажоўская ў Менску сабралося каля 10 чалавек.
Цягам двух гадзінаў, стоячы пад бела-чырвона-белым і зялёна-бела-чырвона-бела-зялёным
чачэнскім сьцягам ўдзельнікі пікету трымалі плякаты: “Не – гэнацыду чачэнскага
народу!”, “Спыніць расейскую агрэсію ў Чачні!”, “Свабоду Ічкерыі” і “Каго
пасьля Чачні Пуцін будзе “мочить в сортире”?”
Час ад часу пікеты на вуліцах Менску праходзяць вельмі эмацыйна. Мінакі
падыходзяць да ўдзельнікаў і наўпрост выказваюць сваё стаўленьне да пікету.
Гэтым разам людзі абыякава чыталі плякаты, пазіралі на ўдзельнікаў акцыі
і зыходзілі. Антываенны пікет плянавалася правесьці побач з будынкам амбасады
Расеі. Аднак Менскі гарадзкі выканаўчы камітэт дазволіў акцыю ў трохстах
мэтрах ад дыпляматычнага прадстаўніцтва.
Пікетоўцы ўпэўненыя, што праблема вайны ў Чачні актуальна для Беларусі.
Яны лічаць: тое, што афіцыйная расейскія ўлады называюць “антытэрарыстычнай
апэрацыяй”, можа напаткаць іншыя народы Расеі і бліжэйшых суседзяў.
Ягор Маёрчык, Менск
|
