Якраз у гэтыя хвіліны ў Ню-Ёрку адбываецца паседжаньне Рады Бясьпекі
ААН, дзе таксама фігуруе Беларусь – на гэты раз ня ў справе дэмакратыі
і правоў чалавека, а – нелегальнага гандлю зброяй.
Толькі што мы атрымалі паведамленьне ад акрэдытаванага пры ААН нашага
карэспандэнта Боба Макмэна. Рада Бясьпекі слухае даклад у справе парушэньня
санкцыяў ААН пастаўшчыкамі зброі з Усходняй Эўропы для ангольскага паўстанцкага
руху УНІТА. Сярод галоўных падазраваных ў нелегальным гандлі зброі разам
з Балгарыяй, Расеяй і Украінай называецца Беларусь.
Даклад на 60-ці старонках прадстаўляе старшыня аанаўскага камітэту ў
справах санкцыяў за пастаўку зброі канадыйскі амбасадар ў ААН Робэрт Фаўлэр.
У дакладзе адзначаецца, што пасьля распаду Варшаўскага блёку ва Ўсходняй
Эўропе засталося вельмі шмат сучаснай зброі і сродкаў яе вытворчасьці.
Цяпер гэты тавар прасоўваецца на сусьветныя рынкі, часам, насуперак санкцыям
ААН. Беларускія ўлады крытыкуюцца перш за ўсё за адмову прадаставіць усе
неабходныя зьвесткі і нежаданьне супрацоўнічаць з камітэтам ААН у гэтай
справе.
Робэрт Фаўлер робіць 39 рэкамэндацыяў, частка зь якіх тычыцца афіцыйнага
Менску. Камітэт ААН настойвае на прадстаўленьні ўсёй запатрабаванай інфармацыі
і абавязвае старшыню камітэту дамагацца выкананьня гэтага патрабаваньня
беларускімі ўладамі.
Паводле нашых зьвестак, на Раду Бясьпеку запрошаны прадстаўнік Беларусі.
Пакуль ён ня меў слова. Наш карэспандэнт ў ААН сочыць за дэбатамі, мы спадзяемся
на сьвежую інфармацыю ў нашай вечаровай праграме а 22-й гадзіне.
Аляксандар Лукашук
|
