У гэтыя халодныя сакавіцкія дні ў многіх калгасах і саўгасах Беларусі
выгналі кароў на пашу. На палях яшчэ ляжыць сьнег, не зьявілася нават першая
зеляніна. Галоднае быдла шукае леташнюю пажоўклую траву і корміцца гольлем
кустоў. Такога ў Беларусі не было нават у галодныя пасьляваенныя гады.
Калі даведалася, што ў Пастаўскім раёне напрыканцы лютага пачалі выганяць
каровы на пашу, падумала, што гэта адбываецца толькі ў адным раёне. Але
высьветлілася, што каровы пагналі на палеткі і ў Гарадзенскай вобласьці,
якая лічыцца заможнай. Дарэчы, сёлета гаспадаркі Віцебшчыны, у якіх прадбачылі,
што з-за недахопу кармоў каровы да вясны не дажывуць, перадалі ў заходнія
вобласьці каля 6 тысячаў галоваў жывёлы. Але і ў Гарадзенскай вобласьці
ў параўнаньні зь мінулым годам прывагі значна зьнізіліся, а надоі зьменшыліся
амаль на 20 адсоткаў.
Справа ня толькі ў тым, што летась з-за сьпёкі ня здолелі нарыхтаваць
належную колькасьць кармоў. Сваю адмоўную ролю адыграла і дырэктыва Лукашэнкі
любым коштам захаваць пагалоўе. А як яго захаваць, калі няма грошай на
кармы?
Як і ў найгоршыя гады, калгасьнікі кормяць быдла яловым гольлем. Прычым,
у многіх гаспадарках галінкі нават не перапрацоўваюць у хвойную пасту,
а проста кідаюць каровам. У Браслаўскім раёне ў якасьці ежы для кароў актыўна
выкарыстоўваюць трысьнёг, прычым, прыклад браслаўцаў перанялі калгасы і
іншых раёнаў. У Краснапольлі Расонскага раёну знайшлі і навогул нетрадыцыйны
корм. Як паведамілі афіцыйныя СМІ, там з-пад ільду здабываюць водарасьці.
Праўда, як адзначылі ў Расонскім райвыканкаме, мясцовыя жыхары называюць
гэтую карысную расьліну асотам. У хуткім часе здабываць яго будзе немагчыма,
бо растане лёд. Праз нейкі час нельга будзе карміць кароў і хваёвым гольлем,
таму што вясной пачынаюць ісьці смолы.
У Беларусі ня так многа гаспадарак, дзе няма аніякіх праблемаў з кармамі.
Часьцей за ўсё гэта так званыя “пацёмкінскія” вёскі, якія заўсёды наведвае
кіраўніцтва. А на фэрмах большасьці калгасаў Беларусі ў гэтыя дні чуецца
галоднае рыканьне няшчасных жывёлін.
Ганна Навумовіч, Менск
|
