Газэта New York Times сёньня надрукавала артыкул, прысьвечаны палітычнай
сытуацыі ў Беларусі
Аўтар артыкулу ў New York Times Патрык Тайлер зазначае, што Эўропа ўсё
яшчэ працягвае спадзявацца, але ў той жа час і баяцца што да магчымасьцяў
разьвіцьця дэмакратыі ў Беларусі. Дэлегацыя Эўрапейскага парлямэнту скрытыкавала
прэзыдэнта Лукашэнку. Аляксандар Лукашэнка зараз шляхам парлямэнцкіх выбараў
намагаецца аднавіць легітымнасьць сваёй жорсткай шавіністычнай улады. Апазыцыя
ж патрабуе адстаўкі Лукашэнкі.
Патрык Тайлер спасылаецца на размову з рэдактарам газэты Наша Свабода
Паўлам Жуком. Жук гаворыць, што “мэта беларускай апазыцыі - сам Лукашэнка”.
“Я ня думаю, што ён сыйдзе спакойна,” - цытуе New York Times Паўла Жука.
“Ціск працягвае расьці, і нешта павінна здарыцца, і тады ужо гэта будзе
выбух,” - гаворыць Павал Жук у інтэрвію карэспандэнту New York Times.
Нагадваюцца ў артыкуле пераважна галоўныя падзеі, што прывялі да сёньняшняга
палітычнага крызісу. Рэфэрэндум 96-га году, роспуск Вярхоўнага Савету,
зьбіццё і арышты дэманстрантаў… Карэспандэнт New York Times піша і пра
нядаўнюю рэзалюцыю Амэрыканскага Кангрэсу аб сытуацыі ў Беларусі. Аўтар
артыкулу прыводзіць чытача да высновы ды яшчэ раз нагадвае амэрыканскім
уладам, што сытуацыя ў Беларусі ўсё яшчэ патрабуе пільнае увагі.
|
