Водгукі футбольнага чэмпіянату Эўра2000. Як паказвае рэакцыя чэхаў,
спартыўныя падзеі маюць беспасярэдні ўплыў ня толькі на патрыятычныя пачуцьці,
але і на больш шырокія палітычныя настроі…
Пасьля вырашальнага пэнальці у нядзельным матчы Чэскай Рэспублікі з
Галяндыяй распачаліся міжнародныя дэбаты пра справядлівасьць рашэньня італьянскага
судзьдзі. Як піша сёньня чэская газэта “Лідове навіны”, нават галяндзскі
прынц і галяндзкі прэм”ер не змаглі зразумець рашэньня Пэруджы Каліны,
які прысудзіў перамогу камандзе гэтай краіны.
Чэскія футбольныя экспэрты мяркуюць, што ў гэтым выпадку ня йдзе толькі
пра памылку судзьдзі. У футболе мае занадта вялікае значэньне, якія краіны
належаць да супэрдзяржаваў. “Галяндыя, Італія, Нямеччына, Францыі ці Гішпанія
належаць да гэтай катэгорыі, а паводле гэтага й сьвісьцяць судзьдзі,” –
піша газэта “Лідове навіны. – З эканамічных прычынаў, напрыклад, моцныя
дзяржавы не зацікаўленыя ў сустрэчы ў паўфінале Чэхіі і Турэччыны.
У нядзелю на чэскім Інтэрнэце пачало шырыцца пасланьне, якое заклікае
байкатаваць італьянскую піцу, макароны і нават італьянскую опэру.
А вось якую выснову робіць рэдактар сур’ёзнага тыднёвіка “Рэспэкт” Іржы
Пэняс: “Вечарам у нядзелю за некалькі мінут я перажыў мэтамарфозу з нацыянальна
спакойнага і індыфэрэнтнага пра-эўрапейца да патрыятычнага ўзбуджанага
эўра-скептыка… Калі б сёньня праводзіўся рэфэрэндум пра уваход у Эўразьвяз,
я галасаваў бы супраць. Калі там будуць такія судзьдзі, як Каліна, у такую
Эўропу не хачу. Лепш сьмерць на мяжы”.
Падрыхтавала Алена Ціхановіч
|
