Чатыры амэрыканскія сэнатары зьвярнуліся сёньня з лістом да дзяржсакратара
ЗША Мадлен Олбрайт з заклікам зрабіць усе магчымыя крокі дзеля бясьпекі
членаў дэлегацыі беларускай апазыцыі, якая нядаўна наведала Вашынгтон.
Кіраўнікі ўплывовых кангрэсавых камітэтаў Бэн Кэмпбэл, Джэсі Гэлмз,
Джон Маккэйн і Рычард Дурбін нагадваюць, што пагрозы Лукашэнкі на адрас
Паўла Жука, Зьміцера Бандарэнкі, Вінцука Вячоркі, Анатоля Лябедзькі нагадваюць
пагрозы на адрас апазыцыянераў, якія бясьсьледна зьніклі ў Беларусі летась.
Сэнатары заклікаюць неадкладна вылучыць усе неабходныя рэсурсы для ўмацаваньня
незалежнага друку, правоў чалавека, грамадзянскай супольнасьці, незалежных
прафсаюзаў і дэмакратычнай апазыцыі ў Беларусі.
Дэмакратычная апазыцыя ў Беларусі заслугоўвае нашай маральнай і матэрыяльнай
падтрымкі ў яе барацьбе са спадчынай камунізму і аўтарытарызму, пабудове
дэмакратычнага прававога грамадзтва, – гаворыцца ў лісьце сэнатараў да
Мадлен Олбрайт.
|
