Скуранка.  Слова прынёс ва ўжытак кастрычніцкі пераварот 1917 году.  Скуранка стала ўніформай рознага гатунку камісараў, якая іх вылучала з нармальна апранутых людзей, розьніла ды адмяжоўвала.  Вядома, страх павагу не гарантуе, і тых жа пыхліва-апэрэтачных камісараў часьцяком называлі: камісраі.

Скуранка - ад скуры.  Са скурай яшчэ зьвязанае і слова скамарох: скора і мог.  Камісары былі скамарохамі, толькі - крывавымі скамарохамі.

Савецкая паэзія з апошняе моцы абрыфмавала скуранку, проза абманумэнталіла, драматургія абтрагeдыла.  Толькі ў народзе паказалі сутнасна скуранку:

Ведаем мы камуністых,
Ведаем бальшавікоў -
Яны ходзяць у скуранках,
Дзяруць скуру з мужыкоў.

Гэта пра скурадзёраў.

Мода на скураныя паліто й курткі находзіць хвалямі.  Апошняя хваля з турэцкага рынку захлынула беларускія вуліцы.  Слова скуранка амаль забылася, а пашырыўся назоў куртка са скуры, скураная куртка.

Рыгор Барадулін