| |
| У ВЫПАДКУ НЕАБХОДНАСЬЦІ ЧЭСКІЯ ВАЙСКОЎЦЫ ВОЗЬМУЦЬ УДЗЕЛ У ВАЕННАЙ АПЭРАЦЫІ СУПРАЦЬ ІРАКУ |
|
Новыя сябры НАТО ідуць на дадатковыя выдаткі, таму што сумленнае выкананьне сваіх міжнародных абавязацельстваў ёсьць асновай замежнай палітыкі любой дэмакратычнай дзяржавы.
|
|
|
|
| Натальля Судлянкова, Прага |
|
|
На тэрыторыі Кувэйта непадалёк ад мяжы зь Іракам зараз знаходзіцца падразьдзяленьне хімічнай абароны чэскага войска. Гэта 251 чалавек. Чэхія вырашыла спэцыялізавацца ў Паўночным альянсе менавіта ў галіне хімічнай абароны.
Знаходжаньне войскаў у Кувэйце, натуральна, патрабуе вялікіх сродкаў. Ня так даўна Кувэйт згадзіўся фінансаваць прысутнасьць чэскіх вайскоўцаў у краіне. Неабходная частка складае амаль 20 мільёнаў даляраў. Але даволі нечакана пазьней кіраўніцтва Кувэйту ад сваёй прапановы адмовілася. Чэхія прыняла рашэньне выводзіць свае войскі з Блізкага Ўсходу.
Тым ня менш, днямі было прынятае рашэньне усіх 251 чалавека ў Кувэйце пакінуць у зьвязку з магчымасьцю вядзеньня баявых дзеяньняў Злучаных Штатаў супраць Іраку. Чэскія хімікі, якія лічацца ў сваёй сфэры найлепшымі ў сьвеце, будуць заставацца ля ірацкай мяжы, каб абараніць амэрыканскіх вайскоўцаў у выпадку выкарыстаньня Багдадам зброі масавага зьнішчэньня.
Міністар замежных справаў Чэхіі Цырыл Свобада не выключае, што магчымы ўдзел і іншых прадстаўнікоў чэскага войска ў акцыі супраць рэжыму Садама Хусэйна, напрыклад, палявых шпіталёў ці сілаў хуткага рэагаваньня.
І як паведаміў у інтэрвію нашаму радыё спадар Свобада, чэскі парлямэнт ужо заклаў у дзяржаўны бюджэт 600 мільёнаў крон, якія будуць выдаткаваныя ў выпадку ўдзелу чэскіх вайскоўцаў у блізкаўсходняй апэрацыі. Ён лічыць сам факт звароту амэрыканцаў да сваіх партнэраў у Празе прызнаньнем высокага ўзроўню падрыхтоўкі чэскіх вайскоўцаў. Спадар Свобада перакананы, што сам факт звароту пацьвярджае неабходнасьць агульнай абароны супраць сёньняшніх агульных ворагаў. І ў гэтым сэнсе памеры краіны ня маюць ніякага значэньня. Істотным зьяўляецца жаданьне быць разам. |
|
|
|
 |
19 Сьнежня 2002 