| |
| ЛЕВАНЕЎСКАГА НЕ ВЫПУСЬЦІЛІ З-ЗА КРАТАЎ, А ПРАД’ЯВІЛІ АБВІНАВАЧАНЬНЕ |
|
Сёньня ў Горадні Валерыю Леванеўскаму прад’яўлена абвінавачаньне. Гэта адбылося а 17-й гадзіне. Такім чынам, ён з падазраванага стаў абвінавачаным ў справе аб абразе прэзыдэнта Лукашэнкі. Крымінальная справа цяпер знаходзіцца ў абласной пракуратуры. Сёньня раніцай у родных Валерыя Леванеўскага яшчэ была надзея, што яго могуць выпусьціць ўвечары, але ён застаўся за кратамі.
|
|
|
|
| Сяргей Астраўцоў, Горадня |
|
|
А 17-й гадзіне Валерыю Леванеўскаму яшчэ ня вызначылі меру стрыманьня. Таму ў сям’і зьявілася спадзяваньне, што яны змогуць убачыць яго. Якраз а 9-й гадзіне вечара ў Ленінскі райаддзел міліцыі прыйшла жонка Валерыя Марына і дачка Кацярына.
За зачыненым акенцам сядзеў дзяжурны падпалкоўнік, Марына зьвярнулася да яго. Ён патэлефанаваў у ізалятар і сказаў, што Валерыю можна перадаць харчы, а шампунь і мыла—не. Жонка панесла перадачу, а дачка засталася чакаць. У міліцэйскім тэлевізары ў гэты момант паказвалі Аляксандра Лукашэнку. З вуліцы зайшоў капітан, адамкнуў сэйф, схаваў у ім фуражку, узяў у рукі красворд і задаў прысутным пытаньне: “пернасьць для гарэлкі—чатыры літары—хто ведае?”
Вось што сказала Марына Леванеўская, калі мы апынуліся на вуліцы:
(Жонка: ) “Пяты раз ён ужо сядзіць і атрымліваецца, што яго так не хапае. Ужо чакаем яго кожны дзень, як ніколі, настолькі яго не хапае. Ну, цяжка, цяжка без яго”.
Вельмі спадзявалася ўбачыць сёньня бацьку і Кацярына:
(Дачка: ) “Што я магу сказаць, сапраўды мы яго чакалі. І чакалі яго ў 9 гадзінаў, але ў сувязі зь непрадбачанымі абставінамі, я ўжо ня ведаю. Нам нічога не патлумачылі і сказалі ў 9 гадзінаў раніцы прыйсьці. Можаце паглядзець, можа быць яго ў 9 гадзінаў выпусьцяць—вось што нам сказалі”.
Гэта была дачка Валерыя Леванеўскага 17-гадовая Кацярына.
Што будзе заўтра—прагназаваць цяжка. Калі Валерыя Леванеўскага ня выпусьцяць, яго могуць перавесьці ў турэмны ізалятар і тэрмінам нават на два месяцы. |
|
|
|
 |
18 Траўня 2004 