| |
| У ДРУКАРНІ “СЬВЕТАЧ” НЯ ХОЧУЦЬ ДРУКАВАЦЬ “НОВУЮ ГАЗЕТУ СМОРГОНИ” |
|
Сталічная друкарня “Сьветач” адмовілася друкаваць “Новую газету Сморгони”, выпуск якой аднаўляецца пасьля працяглага перапынку. Заснавальнік выданьня Рамуальд Улан вымушаны сёньня шукаць іншую друкарню.
|
|
|
|
| Сяргей Астраўцоў, Горадня |
|
|
Часова замест “Новой газеты Сморгони” выходзіў смаргонскі выпуск ваўкавыскай “Местной газеты”. У чацьвер у “Сьветачы” адбілі апошні смаргонскі нумар, і Рамуальду Ўлану сказалі, што друкаваць “Новую газету Сморгони” ня будуць. Цікава, што летась яна выходзіла менавіта ў друкарні “Сьветач” і наклад таксама дастаўляўся са сталіцы ў Смаргонь.
(Улан: ) “Мне зараз вельмі патрэбна “Новую газету Смаргони” аднавіць. Гэта — нашая газэта, а “Местная ” — іншы брэнд, іншае імя. Мы павінны “Новую газэту...” раскручваць. Цяпер ёсьць магчымасьць, але я не магу пакуль надрукаваць сваю газэту”.
Выпуск “Новой газеты Сморгони” прыпыніла сем з паловай месяца таму Міністэрства інфармацыі. Падстава: выдаўцом быў ня сам заснавальнік, а ягоная жонка. Рамуальд Улан зрабіў гэта вымушана, бо мясцовыя ўлады з дапамогай гаспадарчага суду пазбавілі яго рэгістрацыі індывідуальнага прадпрымальніка. Яны ўсяляк імкнуліся перашкодзіць выхаду незалежнай газэты.
Сёньня Рамуальд Улан зноўку зарэгістраваўся як індывідуальны прадпрымальнік і шукае месца, дзе можна было бы друкаваць сваю газэту. Што датычыць сталічнай друкарні “Сьветач”, дык яе кіраўніцтва раней адмовілася друкаваць таксама незалежную газэту “День”, хаця з рэдакцыяй была нават падпісаная афіцыйная дамова. “День” сёньня друкуюць у Смаленску. Ня выключана, што і смаргонскую газэту давядзецца вазіць туды, калі ня ўдасца знайсьці агульнай мовы зь беларускімі друкарнямі. |
|
|
|
 |
17 Траўня 2004 