www.svaboda.org


	Мясцовыя выбары Беларусь - Расея Праскі акцэнт Экспэртыза свабоды Эканоміка Правы чалавека Міжнародны аддзел Рэгіёны Вайна з тэрарызмам

	Курапаты Палітычная геаграфія Беларускі Iнтэрнэт Суайчыньнікі Цытаты мінулага

	Вострая брама Беларуская Aтлянтыда Вольная студыя Чытальная заля Жывая мова Данчык выбірае

	Сымбаль веры Агляд пошты Дазвол на выезд Здароўе Мая Свабода Прыватны дзёньнік

    Час і Хвалі
    Realaudio
    Аўдыё-архiў

    RFE/RL Newsline
    Weekday Magazine
    PBU Report
    RFE/RL Homepage
    Reprints

11 Траўня 2004

ГОМЕЛЬСКІ СУД АДХІЛІЎ ПАЗОЎ ФУНДАТАРАЎ “ГРАМАДЗЯНСКАЙ АЛЬТЭРНАТЫВЫ” ДА ЎПРАВЫ ЮСТЫЦЫІ

Сёньня ў Гомельскім абласным судзе разглядаўся пазоў кіраўнікоў аб`яднаньня “Грамадзянская альтэрнатыва” да ўправы юстыцыі. Управа адмовілася зарэгістраваць грамадзкае аб`яднаньне. Заснавальнікамі яго выступілі звыш 200 грамадзянаў рэгіёну, пераважна сяброў зьліквідаванага ўладамі ўплывовага аб`яднаньня “Грамадзянскія ініцыятывы”.

Казімер Яноўскі, Гомель

На судзе прадстаўнікі ўправы юстыцыі Тамара Стрыжнева і Андрэй Міцкевіч у якасьці аргумэнтаў адмовы больш зьвярталіся да тлумачальных слоўнікаў, нейкай асаблівай лёгікі, высноваў рэспубліканскай камісіі, чымсьці да заканадаўчых актаў.

Яны ня змаглі нават патлумачыць, чаму ў грамадзкага аб`яднаньня ня адпавядаюць законам і дэкрэтам аднолькавыя палажэньні са статутам афіцыйнай арганізацыі – Беларускага рэспубліканскага саюзу моладзі?

Пазоўца і старшыня незарэгістраванага аб`яднаньня “Грамадзянская альтэрнатыва” Уладзімер Кацора лічыць адмову ў рэгістрацыі палітычна матываванай:

(Кацора: ) “Довады супрацоўнікаў управы юстыцыі заснаваны на эмоцыях, а не на законах. Гэта палітычныя матывы. Хутка рэфэрэндум, выбары, таму ўсё гэта небясьпечна для ўлады. Грамадзкія аб`яднаньні выставяць назіральнікаў. Гэта пагроза для іх. Улады ўжо цяпер гэтую пагрозу імкнуцца зьліквідаваць альбо не дапусьціць”.

Падчас судовага разьбіральніцтва судзьдзя Леанора Буянкова вынесла папярэджаньне заснавальніку аб`яднаньня і пазоўцу Леаніду Судаленку:

(Судаленка: ) “Я заявіў пратэст. Пракурор Кострыкава падказвала прадстаўнікам управы юстыцыі, якія нормы заканадаўства варта было б прымяніць пры адмове ў рэгістрацыі нашага грамадзкага аб`яднаньня”.

Нечаканай на судзе была прапанова ўправы юстыцыі прыкласьці да справы супольны ліст паўдзесятка настаўнікаў з Добрускага раёну.

У лісьце настаўнікі нібыта адмаўляліся ад свайго заснавальніцтва новай арганізацыі. Цікава, што ліст гэты ня згадваўся ў афіцыйнай адмове ўправы юстыцыі пра рэгістрацыю.

Пазоўцы прасілі выклікаць у суд аўтараў ліста, паколькі маюць у дакумэнтах асабістыя подпісы гэтых настаўнікаў як заснавальнікаў “Грамадзянскай альтэрнатывы”.

Судзьдзя Буянкова не задаволіла хадайніцтва. Яна вырашыла наагул адхіліць пазоў да ўправы юстыцыі, якая адмовілася зарэгістраваць новае грамадзкае аб`яднаньне.