| |
| ЯКАЯ ГАЛОЎНАЯ ПАДЗЕЯ 2003 ГОДУ? |
|
На гэтае пытаньне адказваюць мінакі на магілёўскіх вуліцах. Добраўпарадкаваньне абласнога цэнтру, выбары ў мясцовыя саветы, падвышэньне пэнсіяў, зьніжэньне агульнага ўзроўню жыцьця, вайна ў Іраку — такія падзеі сёлета лічаць галоўнымі жыхары Магілёва.
|
|
|
|
| Марыя Ўсьціновіч, Магілёў |
|
|
Галоўнай падзеяй 2003 году многія магілёўцы лічаць зьмяненьні ў выглядзе свайго гораду. Сёлета ў часе падрыхтоўкі да сэсіі парлямэнцкага сходу Беларусі і Расеі ў абласным цэнтры прыбраліся, пафарбавалі і асьвятлілі будынкі, зрабілі пешаходную вуліцу і ўпрыгожылі горад.
(Спадарыня: ) “Я мяркую, самае галоўнае, што наш горад Магілёў зьмяніўся да такой ступені, што атрымалася “маленькая Швайцарыя”. Вельмі добра, прыгажосьць выратуе сьвет!”
Разам з гэтым, людзі мяркуюць, што на ўпарадкаваньне Магілёва выдаткавана шмат грошай, якія былі бы вельмі патрэбныя ў сацыяльнай сфэры. І ў зьвязку з гэтым магілёўцы згадвалі іншае вялікае (на гэты раз адмоўнае) уражаньне гэтага году:
(Спадарыня: ) “Як я разумею, наш прэзыдэнт вельмі шмат грошай выдаткаваў на сваю прэзыдэнцкую кампанію. Падвысіў заробкі. Заробак вырас на 50%, а доля валавога прадукту ўсяго на 5%. І гэтыя дыспрапорцыі цяпер на нас адбіваюцца”.
Людзі гавораць, што сёлета ім не хапала заробкаў на дастойны ўзровень жыцьця:
(Спадар: ) “Складанасьці зьвязаныя з тым, што ўяўляе сабой заработная плата, якой пастаянна не хапае, з падвышэньнем кватэрнай платы. Дай Божа, каб была праца і можна было зарабіць”.
Адной з галоўных падзеяў адыходнага году магілёўцы называюць выбары ў мясцовыя саветы дэпутатаў. Адметнай рысай гэтай палітычнай кампаніі мая суразмоўніца лічыць актыўны ўдзел пэнсіянэраў:
(Спадарыня: ) “Моладзь у нас, можна сказаць, безадказная, яна не задумваецца пра будучыню, а вось трэба глядзець на нашых пэнсіянэраў, рабіць высновы і браць зь іх прыклад”.
Людзі сталага ўзросту мяркуюць, што самай значнай для іх падзеяй году стала падвышэньне пэнсіяў. Старыя пераконваюць, што жыцьцё ў Беларусі мяняецца да лепшага:
(Спадарыня: ) “Усё ў крамах ёсьць: што хочаш, пойдзеш і набудзеш”.
(Карэспандэнтка: ) “У параўнаньні з савецкімі часамі…”
(Спадарыня: ) “…Вы ведаеце, нашмат лепей. Адчуваеш сябе свабодна, настрой добры”.
З усіх міжнародных падзеяў 2003 году жыхары Магілёва называюць галоўнай вайну ў Іраку:
(Спадар: ) “Вайна ў Іраку, канечне, гэта вельмі страшная справа. Ня дай Божа!
Магілёўцы лічаць для сябе галоўнымі і тыя падзеі, якія адбыліся ў сем’ях: нараджэньне дзіцяці, шлюб, выхад на пэнсію, атрыманьне добрай працы і гэтак далей. Людзі хочуць, каб 2004 год прынёс ім здароўе і грошы, таму добрую сустрэчу Новага году яны таксама ўважаюць за галоўную падзею.
(Спадарыня: ) “Новы год вось прыходзіць — самае асноўнае. Сустракаць трэба і праводзіць — і стары, і новы. Каб усё дрэннае пакінуць, каб сустрэць новы год з посьпехамі, каб у дзяцей было ў парадку, і дома”. |
|
|
|
 |
26 Сьнежня 2003 