| |
| БЕЛААЗЁРСКІ ГАРСАВЕТ ПАЗБАЎЛЯЕЦЦА АД КІРАЎНІКОЎ-ДЭМАКРАТАЎ |
|
Сэсія гарадзкога савету Белаазёрску пазбавіла пасадаў двух прадстаўнікоў партыі БНФ. Юрася Губарэвіча звольнілі з пасады намесьніка старшыні, а Віталя Прыхача – з пасады старшыні мандатнае камісіі гарсавету.
|
|
|
|
| Севярын Квяткоўскі, Менск |
|
|
Белаазёрск быў адзіным горадам, дзе бальшыню дэпутатаў складалі прадстаўнікі апазыцыйных партыяў: БНФ і "Народнае Грамады", якія склалі ў савеце дэпутацкую групу "Ініцыятыва". Пасьля давыбараў у лістападзе ў савет прыйшлі дзесяць новых дэпутатаў ад "партыі ўлады", і хісткая перавага дэмакратаў парушылася. Вось вэрсія Юрася Губарэвіча пра падставы, паводле якіх яго адхілілі з пасады намесьніка старшыні:
(Губарэвіч: ) "Тое, што я сустракаўся з амбасадарам ЗША Майклам Козакам. Быццам бы запрашаў дэпутатаў Палаты прадстаўнікоў у Белаазёрск. А старшыня ня меў такіх кантактаў. Напэўна, такія ягоныя асабістыя крыўды прывялі да таго, што ён вырашыў зьняць мяне з гэтай пасады. Дэпутаты паслухмяна прагаласавалі за такую прапанову".
Юрась Губарэвіч адзначае, што кантакты з замежнымі партнэрамі паспрыялі таму, што мясцовы шпіталь атрымаў дапамагу на суму 160 мільёнаў рублёў.
Што да працы мандатнай камісіі, якую ўзначальваў сябар партыі БНФ Віталь Прыхач, Юрась Губарэвіч паведаміў наступнае:
(Губарэвіч: ) "Камісія ў папярэднім складзе займалася праверкай вынікаў выбараў. Былі знойденыя пэўныя парушэньні, па некаторых зь іх патрабавалася дадатковае расьсьледаваньне. Аднак уся гэтая праца была змарнаваная".
Юрась Губарэвіч наступным чынам пракамэнтаваў сытуацыю ў гарсавеце Белаазёрску:
(Губарэвіч: ) "Савет у новым складзе пачаў з зачысткі ад уплыву непажаданых дэпутатаў: дэпутатаў групы "Ініцыятыва". |
|
|
|
 |
18 Сьнежня 2003 