| |
| ПРАЗ ВЫКАНАНЬНЕ ПРЫНЦЫПАЎ АБСЭ БЕЛАРУСЬ МОЖА СТАЦЬ ПАЎНАВАРТАСНЫМ СЯБРАМ МІЖНАРОДНАЙ СУПОЛЬНАСЬЦІ |
|
Сёньня Гомель наведаў амбасадар Вялікай Брытаніі Браян Бэнэт. Пасьля афіцыйных перамоваў з кіраўнікамі аблвыканкаму амбасадар Бэнэт выказаў свае стаўленьне да разьвіцьця адносінаў Беларусі з краінамі Эўразьвязу. Пра пашырэньне адносінаў з Захадам нядаўна чарговы раз заяўляў кіраўнік беларускай дзяржавы.
|
|
|
|
| Казімер Яноўскі, Гомель |
|
|
Амбасадар Яе Вялікасьці заявіў, што калі Беларусь сапраўды хоча стаць часткаю Эўропы і поўнавартасным сябрам міжнароднай супольнасьці, то існуюць пэўныя прынцыпы, выкананьня якіх Захад чакае ад Беларусі:
(Бэнэт: ) “Гэта тыя прыцыпы, якіх Беларусь пагадзілася прытрымлівацца, калі яна стала сябрам АБСЭ. І Вялікабрытанія, і іншыя краіны, а таксама ЗША, як сябры АБСЭ з задавальненьнем дапамогуць Беларусі выканаць узятыя на сябе забавязаньні.
Гэта, натуральна, нялёгкі працэс, таму што Беларусь ня так даўно стала незалежнаю краінаю і па сутнасьці знаходзіцца ў пераходным пэрыядзе. Мы, канечне, спадзяемся бачыць прагрэс у згаданай справе. Мы ўпэўненыя, што прагрэс наступіць і Беларусь стане паўнавартасным удзельнікам міжнароднай супольнасьці. Яна зьдзейсьніць тыя рэформы, якія мы ад яе чакаем. Напрыклад, лібэралізацыю эканомікі ды іншае.
Такім чынам, пытаньне ня ў тым, што мы як Захад зможам зрабіць дзеля таго, каб дапамагчы Беларусі. Пытаньне ў тым, як хутка сама Беларусь здолее адпавядаць тым патрабаваньням і стандартам, якія яна прыняла на сябе”.
Паводле словаў амбасадара Бэнэта, Захад будзе вітаць любыя намеры і крокі, скіраваныя на паляпшэньне адносінаў:
(Бэнэт: ) “Гэта ня ёсьць нейкай гульнёй, як камусьці падаецца. Беларусь не павінна выбіраць паміж Захадам і Ўсходам. Беларусь павінна стаць паўнавартасным сябрам міжнароднай супольнасьці. І мы гатовыя дамамагаць ёй на гэтым шляху, вітаць любыя крокі ў гэтым кірунку”. |
|
|
|
 |
10 Сьнежня 2003 