|
 |
 28 Сьнежня 2001
| |
| У МОЛАДЗЕВАГА ЦЭНТРУ “ГАРТ” КАНФІСКАВАНЫЯ КАМПУТАРЫ, КІРАЎНІК ЦЭНТРУ АШТРАФАВАНЫ НА МІЛЬЁН РУБЛЁЎ |
|
Беспрэцэдэнтнае рашэньне прыняла судзьдзя Чыгуначнага раённага суду Гомеля Ганна Новік адносна моладзевага цэнтру “Гарт” і ягонага старшыні Сяргея Адзінца.
|
|
|
|
| Казімер Яноўскі, Гомель |
|
|
Атрыманая “Гартам” у бязвыплатнае карыстаньне ад Агенцтва ўсясьветнага разьвіцьця ЗША праз фонд “Каўнтэрпарт Інтэрнэшнл” кампутарная тэхніка павінна быць сканфіскаваная ў даход дзяржавы. Сяргея Адзінца аштрафавалі на 1 мільён рублёў.
Амаль гадзіну судзьдзя Новік чытала адміністрацыйны вырак моладзеваму цэнтру “Гарт” і ягонаму кіраўніку Сяргею Адзінцу. Зь яго вынікала, што спадар Адзінец парушыў дэкрэт Аляксандра Лукашэнкі №8 пра парадак атрыманьня і скарыстаньня замежнай гуманітарнай дапамогі. Акурат пра гэта паведаміла ў суд падатковая інспэкцыя на падставе адмысловых лістоў упраўленьня КГБ і сьледчага камітэту.
Кампутарная тэхніка нібыта ўжывалася для незалежнага назіраньня за прэзыдэнцкімі выбарамі, друку газэт, улётак антыпрэзыдэнцкага зьместу і нават для арганізацыі пікетаў, сходаў у палітычных мэтах.
Гэта для судзьдзі й паслужыла падставай аштрафаваць Сяргея Адзінца на 1 мільён рублёў, што адпавядае 630 далярам, а таксама сканфіскаваць два кампутары, сканэр і прынтэр, перададзеныя фондам “Каўнтэрпарт Інтэрнэшнл” яшчэ да выхаду ў сьвет дэкрэту №8.
Судзьдзя Новік не ўзяла пад увагу сьведчаньні ў судзе кансультанткі “Каўнтэрпарту” Алены Кузьмініч пра тое, што паводле міжнародных пагадненьняў Беларусі й адмысловых пастановаў беларускага ўраду гуманітарныя праграмы “Каўнтэрпарту” не падпадаюць пад дзеяньне дэкрэту №8.
Адміністрацыйны вырак заснаваны ў першую чаргу на паказаньнях пра нібыта нямэтавае скарыстаньне тэхнікі, якія давалі сьледчы Ўладзімер Вычыкаў і супрацоўнік УКГБ Яўген Сьцепаненка. Апошні ўдзельнічаў у ператрусе напярэдадні выбараў кватэры, у якой знаходзіліся кампутары “Гарту”.
З нагоды выраку суду кіраўнік моладзевага цэтру “Гарт” Сяргей Адзінец сказаў сёньня нашаму радыё:
(Адзінец: ) “Гэтае рашэньне суду для нас было чаканым, мы меркавалі, што менавіта такім рашэньне і будзе. Але мне думаецца, што гэтае рашэньне прадэманстравала дзікасьць нашай мясцовай улады нават у параўнаньні зь іншым рэгіёнамі Беларусі. Калі ў іншых рэгіёнах усю тэхніку, адабраную падчас выбарчай кампаніі, вярнулі й вяртаюць, то ў нашым рэгіёне ўлады ня хочуць рабіць нават гэтага”.
Што датычыць надзвычайнага памеру штрафу, то кіраўнік “Гарту” заявіў наступнае:
(Адзінец: ) “Натуральна, гэта вельмі вялікая сума ў нашай краіне. Немагчыма зарабіць такую суму сумленнымі мэтадамі. Таму гэта яшчэ адзін паказчык стаўленьня нашай улады да апазыцыі, да ўсіх, хто з уладай ня згодны”.
Сяргей Адзінец рашэньне судзьдзі Новік думае абскарджваць нават у Вярхоўны Суд.
|
|
|
|
 |
|
|
