| |
| АКЦЫЯ “МЫ ПАМЯТАЕМ” У ЦЭНТРЫ МЕНСКУ |
|
Я знаходжуся на Кастрычніцкай плошчы ў Менску. З таго месца, дзе я стаю, добра відаць, як уздоўж праспэкта Скарыны стаяць людзі з запаленымі сьвечкамі і партрэтамі Віктара Ганчара, Зьмітра Завадзкага, Юрыя Захаранкі, Генадзя Карпенкі, некалькі соцень чалавек.
|
|
|
|
| Ганна Соусь, Менск |
|
|
З майго месца добра бачна, як жывы ланцуг расьцягнуўся да ўнівэрсама "Цэнтральны" з аднаго боку і да штабу ваенна-паветраных сілаў з другога боку. Гэтая акцыя прымеркаваная да 55-й гадавіны прыняцьця Ўсеагульнай дэклярацыі правоў чалавека. У ёй бяруць удзел актывісты ўсіх дэмакратычных партыяў, кааліцыі "5+", эўрапейскай кааліцыі "Свабодная Беларусь", актывісты рэспубліканскага страйкаму прадпрымальнікаў, актывісты "Прыватнай уласнасьці" на чале зь Леанідам Малахавым, я бачу ў ланцугу актывістаў руху "Зубр", Маладога Фронту, Беларускай партыі свабоды, навучэнцаў Гуманітарнага ліцэю.
Вядомых палітыкаў тут ня шмат. Лідэры партыяў, якія ўваходзяць у кааліцыю "5+", сёньня знаходзяццаа ў Вільні на сэмінары, але я бачу тут Андрэя Саньнікава, Мікалая Статкевіча. Акцыя праходзіць даволі спакойна, за выняткам інцыдэнту на пачатку акцыі, калі міліцыянты падыходзілі да людзей, якія арганізоўвалі ланцуг, і казалі, што нельга стаяць насупраць прыпынку грамадзкага транспарту, але гэты канфлікт пэўным чынам быў вырашаны.
Насупраць мяне стаіць Ірына Красоўская, а таксама Сьвятлана Завадзкая з 12-гадовым сынам Юрыем, заснавальнікі грамадзкай ініцыятывы "Мы памятаем” (менавіта гэтыя словы ёсьць лёзунгам сёньняшняй акцыі).
(Ірына Красоўская: ) "Мы памятаем аб тым, што адбылося ў нашай краіне, і мы памятаем аб тым, што ўсе правы, якія дэкляраваныя Ўсеагульнай дэклярацыяй правоў чалавека, усе гэтыя правы чалавека парушаюцца, і таму мы сёньня тут. Спадзяемся, што тыя людзі, якія побач з намі, таксама памятаюць аб гэтым. І мы таксама верым у тое, што людзі, якія праяжджаюць міма, праходзяць міма, якія глядзяць на нас, яны таксама ўспамінаюць пра свае правы і пра тое, што ня ўсё добра ў нашай краіне. Некаторыя гавораць, што гэта яшчэ адна акцыя апазыцыі. Гэта ня так. Мы не апазыцыя, мы дэмакратычная сіла, апазыцыя – гэта Лукашэнка і яго атачэньне, яны зьяўляюцца апазыцыяй у сваёй краіне свайму народу.
Тая праблема, якая прывяла мяне ў праваабарончую дзейнасьць - гэта права на жыцьцё, і вось гэтае права на жыцьцё, яно неабыякавае ніводнаму чалавеку на Зямлі. Тое, што сёньня мы стаім на плошчы, я думаю, зразумела ўсім без вынятку людзям, якія жывуць у гэтай краіне і ў любой іншай краіне, бо права на жыцьцё - гэта права, пра якое разумеюць усе. На жаль, людзі зьвяртаюць на гэтыя правы ўвагу толькі тады, калі гэтыя правы парушаныя”.
Многія кіроўцы сыгналяць на знак салідарнасьці з удзельнікамі сёньняшняй акцыі "Мы памятаем". |
|
|
|
 |
10 Сьнежня 2003 