| |
| МАСАВАЯ АНТЫВАЕННАЯ ДЭМАНСТРАЦЫЯ Ў ЛЁНДАНЕ |
|
Сёньня ў сталіцы Вялікай Брытаніі адбылася шматтысячная дэманстрацыя пратэсту супраць вайны ў Іраку, прымеркаваная да афіцыйнага візыту ў краіну прэзыдэнта ЗША Джорджа Буша. Як паведамляецца, гэта сталася адной за найбуйшейшых у гісторыі Лёндана дэманстрацыяў зь ліку тых, што праходзілі ў працоўны дзень тыдня. За падзеямі сачыў наш лёнданскі карэспандэнт.
|
|
|
|
| Мікола Пачкаеў, Лёндан |
|
|
Шэсьце антываеннага пратэсту прайшло праз цэнтар Лёндану, побач з парлямантам і ўрадавых будынкаў на Ўайтхол, і прыбыло на мітынг на Трафальгарскім пляцы.
Канчатковыя ацэнкі паліцыі – 70 тысячаў удзельнікаў, а арганізатары ацэньваюць колькасьць аж у 200,000. Арганізатарамі і ўдзельнікамі дэманстрацыі сталіся вельмі разнастайныя групы: перадусім антываенная кааліцыя “Спыніць вайну” ды ісьлямскія арганізацыі, але таксама змагары за чыстае асяродзьдзе, анархісты, працоўныя-сацыялісты, ды прыхільнікі вызваленьня Палестыны.
Найбольш папулярны сярод удзельнікаў транспарант выглядаў наступным чынам: імя “Буш” напісанае паверх вялізнае кроплі крыві. Іншыя транспаранты патрабавалі адстаўкі Блэра, “Свабоду Палестыне”, “Уладу – народу”, ды заклікі “змагацца з амэрыканска-брытанскім імпэрыялізмам”.
Уздоўж маршруту сапраўды было шмат паліцыянтаў, але я зусім ня бачыў паліцыі зь нейкімі “спэцсродкамі”, як гэта бывае ў Беларусі.
Некаторыя з дэманстрантаў абмяркоўвалі і сёньнішнія выбухі ў Стамбуле, кажучы, што Вялікая Брытанія сама выклікала на сябе агонь ісьлямістаў: бо аб’ектамі нападаў-выбухаў сталіся будынак брытанскага кансуляту ды прадстаўніцтва аднаго з найбуйнейшых брытанскіх банкаў.
Сувязь тэракту ў Стамбуле зь бягучым візытам Буша для многіх падаецца відавочнай. Але на прэсавай канфэрэнцыі Блэр і Буш зазначылі, што зрэшты большасьць ахвяраў – туркі. Буш падкрэсьліў, што сёньняшні напад – гэта перадусім забойства тэрарыстамі іншых мусульманаў.
Калі я падышоў да Трафальгарскага пляцу, ён быў ужо цалкам запоўнены, а ля калёны Нэльсана была ўсталявана вялізная, хіба што пяцімэтровая карыкатурная статуя Буша – з ракетай у руцэ. І ў цемры – асьветленая пражэктарамі бліскучая, пафарбаваная пад золата – статуя сапраўды ўражвала.
Гэта – наўмысная алюзія да той статуі Садама, якую з дапамогай амэрыканскіх жаўнераў звалілі у Багдадзе. Твар статуі быў завязаны плякатам з надпісам “Час для міру”.
І, ўрэшце, кульмінацыяй мітынгу сталася зьвяржэньне статуі Буша. Яе абвязалі вяроўкамі – рыхтык як багдадскую статую Садама – ды павалілі на зямлю. |
|
|
|
 |
20 Лістапада 2003 