|
 |
 2 Сьнежня 2001
| |
| У КУРАПАТАХ АДЗНАЧЫЛІ ЎГОДКІ СЛУЦКАГА ЗБРОЙНАГА ЧЫНУ |
|
У лягеры абаронцаў Курапатаў сёньня адзначалі ўгодкі Слуцкага збройнага чыну. У другой палове дня тут адбылося набажэнства памяці змагароў за незалежнасьць Беларусі. Пасьля ўзьнялі бел-чырвона-белы сьцягі й сьцяг Беларускай партыі Свабоды. А сябры чэскай фундацыі "Чалавек у нядолі" паказалі дакумэнтальныя фільмы "Дарога на Курапаты" і "Звычайны прэзыдэнт".
|
|
|
|
| Ягор Маёрчык, Менск |
|
|
Цяпер цяжка ўявіць, што яшчэ некалькі тыдняў таму ля ўрочышча Курапаты была Менская кальцавая дарога. Ад яе нічога не засталося. Пляст асфальту даўно зьнялі, прывезьлі пясок і ў два бакі актыўна пашыраюць падмурак будучай праезнай часткі.
Жыцьцё ў лягеры абаронцаў Курапатаў праходзіць пад гукі будаўнічай тэхнікі. Працы не спыняюцца нават выходнымі.
Безь перапынкаў і сьвятаў дзяжураць тут і два мікрааўтобусы з амонаўцамі. Яны сочаць за парадкам і стараюцца як мага меней кантактаваць як зь сябрамі Маладога Фронту і Беларускай партыі Свабоды, так і з будаўнікамі.
Першым у лягеры абаронцаў мяне сустрэў лідэр БПС Сяргей Высоцкі. Ён распавёў:
(Высоцкі: ) "Сёньня начавала 14 чалавек. Гэта вельмі шмат. Рэдка калі было больш. Пад'ехалі хлопцы з Магілёва, з Гомеля. Ніякіх зьменаў з боку будаўнікоў, АМОНу мы не заўважаем. Што да абаронцаў Курапатаў, то сёньня настрой прыўзьняты. Сёньня гадавіна Слуцкага збройнага чыну".
(Карэспандэнт: ) "Сяргей, мы зараз з вамі знаходзімся ля крыжоў. Усе памятаюць, што была дамова з будаўнікамі, што мяжа іхнай працы пройдзе побач з крыжамі. Тым ня менш я бачу, што некаторыя зь іх засыпаныя зямлёй — прычым засыпаныя амаль цалкам. Побач з намётам будаўнікі пракладваюць нейкую трубу. Як гэта ўсё вы можаце пракамэнтаваць?"
(Высоцкі: ) "Труба, канечне, тут яўна невыпадковая. Што б яны нам ні казалі. Тое, што сюды будзе сьцякаць вада, да цэнтральнага месца ўваходу — гэта ня можа быць выпадковым. Адносіны такія: яны кажуць — мы паднявольныя, я зарабляю сабе на хлеб, я не магу знайсьці працы па паўгода. Але адбыліся істотныя зьмены. Некаторыя нават стараюцца дапамагчы нам.
Тое ж самае з АМОНам. Некаторыя сёньня дапамагалі рыць ямкі для новых крыжоў. Яны паглядзелі на гэтую духоўнасьць, на гэтую ўзьнёсласьць, і яны пачалі разумець, што фактычна апынуліся на баку зла. І гэта для іх не міне бясьсьледна. І гэта таксама перамога на Курапатах".
Сябры Маладога Фронту і Беларускай партыі Свабоды працягваюць рабіць крыжы і ўсталёўваць іх вакол Курапатаў.
У другой палове дня сьвятар Беларускай аўтакефальнай праваслаўнай царквы Леанід Акаловіч справіў тут памінальнае набажэнства за супакой душаў ваяроў Слуцкага збройнага чыну.
А ўвечары сябры чэскай фундацыі "Чалавек у нядолі" паказалі абаронцам беларускага акропалю дакумэнтальныя фільмы "Дарога на Курапаты" і "Звычайны прэзыдэнт".
|
|
|
|
 |
|
|
