| |
| САМАЛЁТ “БЕЛАРУСЬ” УЖО НЕ ЎЗЬЛЯЦІЦЬ |
|
Дэпутаты Палаты прадстаўнікоў прагаласавалі за спыненьне дзяржаўнай праграмы стварэньня беларуска-расейскага самалёта агульнага прызначэньня “Беларусь”. Падставай для нечаканага рашэньня “інтэгратараў” стала адсутнасьць грошай і зьнікненьне матывацыі для вытворчасьці такога тыпу самалётаў.
|
|
|
|
| Уладзімер Глод, Менск |
|
|
Дзяржаўная праграма стварэньня самалёта “Беларусь” была прынятая яшчэ ў 1994 годзе. А першы паветраны карабель павінен быў узьляцець у 2000 годзе. Выдаткі толькі на ягоную распрацоўку, сэртыфікацыю і падрыхтоўку да вытворчасьці, паводле праграмы, складалі 54,68 мільёна даляраў.
Аднак цяпер высьвятляецца, што паўнавартасная экспэртыза праекту ў Беларусі не праводзілася. Міністэрства абароны краіны абмежавалася толькі разглядам праектнай дакумэнтацыі. Да таго ж, у 1995 і 1996 гадах праграму без узгадненьня зь беларускім бокам расейцы “адрэдагавалі”: зьмянілі назву, статус, склад удзельнікаў і выканаўцаў, а таксама тэрмін выкананьня.
І толькі сёлета “зацікаўленыя дзяржаўныя органы кіраваньня Беларусі” нарэшце правялі комплексны аналіз праграмы. У прыватнасьці, Міністэрства эканомікі адзначае, што “цяпер адсутнічаюць дастатковыя ўмовы для рэалізацыі праекту. Апошнія гады Міністэрства фінансаў грошай на праект не выдзяляе”.
Да таго ж, паводле дакладной запіскі старшыні Дзяржаўнага камітэту ў справах авіяцыі Беларусі Фёдара Іванова, актуальнасьць праграмы губляецца: “З прычыны фінансавых цяжкасьцяў зьніжаецца попыт на ўжываньне авіяцыі ў народнай гаспадарцы рэспублікі”. Таму Дзяржкамітэт прапанаваў спыніць дзеяньне праграмы, а дэпутаты Палаты пагадзіліся з гэтымі аргумэнтамі. |
|
|
|
 |
12 Сьнежня 2002 