| |
| Ад расейскіх журналістаў чакаюць станоўчай справаздачы пра Беларусь |
|
Чарговая група расейскіх журналістаў выпраўляецца ў Менск. За тры дні ў іх адбудуцца сустрэчы ў адміністрацыі Лукашэнкі, ва ўрадзе, у міністэрствах замежных справаў, інфармацыі, з дэпутатамі Палаты прадстаўнікоў і ў шэрагу іншых дзяржаўных установаў. Жыць госьці будуць у прэстыжным гатэлі “Кастрычніцкі”, а прафінансаваць візыт даручана Беларускай чыгунцы.
|
|
|
|
| Ігар Карней, Менск |
|
|
У Менск зноў прыяжджае вялікая група расейскіх журналістаў. У Нацыянальным прэсавым цэнтры паведамілі, што гэтым разам пасьля ўзгадненьня ў беларускай амбасадзе ў Расеі прозьвішчаў кандыдатаў на паездку і выданьняў, якія яны прадстаўляюць, у Беларусь накіроўваюцца тры дзясяткі чалавек.
(Супрацоўніца прэсавага цэнтру: ) “Беларуская амбасада ў Маскве сфармавала сьпіс: 26 журналістаў плюс тры экспэрты. Суправаджаюць групу супрацоўнікі беларускай амбасады. Праграмай прадугледжаныя сустрэчы з прадстаўнікамі адміністрацыі прэзыдэнта, Міністэрства інфармацыі, МЗС... Заплянаваныя наведваньні аб’ектаў Дзяржкамавія, сустрэчы з кіраўніцтвам канцэрну “Белнафтахім”, візыт на кампрэсарныя станцыі “Белтрансгазу” і “Газпрому”, сустрэчы з кіраўнікамі Мінтрансу, БАМАПу і арганізацыі “Белаўтастрада”.
Сярод запрошаных — здымачная група НТВ, телеканал “Россия”, кіраўнік карэспандэнцкай сеткі каналу “ТВ-Центр”, радыёстанцыі “Маяк”, “Юность”, “Голос России”, Расейская інфармагенцыя “Новости”, газэты “Труд”, “Деловой вестник”, “Интеграция”, “Независимая газета”, “Гудок” і некаторыя іншыя. Уласны карэспандэнт газэты “Русский курьер” Аляксандар Старыкевіч упэўнены, што неўзабаве ў гэтых выданьнях зьявяцца справаздачы пра тое, як добра жывецца беларусам. Я пацікавіўся ў спадара Старыкевіча: чаму, на ягоную думку, расейскае кіраўніцтва таксама не запрашае да сябе беларускіх журналістаў?
(Старыкевіч: ) “Ня памятаю, каб Расея асабліва клапацілася пра свой імідж, нават датычна дяржаваў значна буйнейшых, дзе куды больш уплывовыя СМІ. А ўжо пра тое, як будуць асьвятляць расейскія падзеі ў Беларусі — нікому ў Маскве справы няма”.
(Карэспандэнт: ) “Ці можна меркаваць, што калі беларускія ўлады запрашаюць замежных журналістаў, то чакаюць і адпаведнай падачы матэрыялаў?”
(Старыкевіч: ) “Па-першае, ужо той факт, што журналісты прыяжджаюць не на свае грошы, накладае на іх няхай маральныя, але ж абавязкі. Па-другое, для іх праграму складаюць так, каб яны пабачылі толькі фасад (нават ня ўвесь, а ягоныя найлепшыя фрагмэнты). Таму ўсё гэта, безумоўна, скіравана на тое, каб атрымаць пэўную колькасьць прапагандысцкіх матэрыялаў пра тое, як усё добра ў Беларусі”. |
|
|
|
 |
25 Лістапада 2003 