Нашая сёньняшняя перадача будзе як найболей адпавядаць самому яе загалоўку.  Пагаворым пра беларускі дыялёг на інтэрнэце, пра статыстыку нашай WEB-старонкі, пра кантакты, зваротную сувязь і пашырэньне віртуальнай беларускай прасторы.

Трэці месяц запар нашая старонка займае трывалыя пазыцыі, здабытыя ёй зь першых тыдняў існаваньня.  Сярэднямесячная колькасьць заходаў на старонку трымаецца на ўзроўні 16-18 тысячаў.  Усяго хоць адзін раз наш сайт наведалі каля дзьвюх тысячаў карыстальнікаў, што дае пэўнае ўяўленьне пра памеры беларускай інтэрнэтнай супольнасьці.

Не апраўдаліся прагнозы пэсымістаў, якія прарочылі нам няўдачу з прычыны нібыта няўдалага выбару мовы і прапанавалі адразу перайсьці на расейскую або ангельскую мовы.  Колькасьць чытачоў Радыё Свабода задавальняе нас нагэтулькі, што мы плянуем зусім прыбраць з старонкі англамоўныя тэксты, якія выстаўляліся напачатку, каб пры нагодзе ўратаваць сытуацыі -- калі б беларускіх наведнікаў аказалася замала.

Рэальнасьць перавысіла ўсе нашыя спадзяваньні, за што ЎСІМ ВАМ, хто нас чытае (і слухае) ШЧЫРА ДЗЯКУЕМ! Заставайцеся з намі.

Яшчэ крыху статыстыкі.  Наведваньне ў буднія дні прыблізна аднолькавае, тым часам як у выхадныя нас чытаюць меней - па-першае, мы не выстаўляем у суботу й нядзелю новых матэрыялаў, дый слухачы нашыя таксама адпачываюць.

На працягу дня найбольш візытаў прыпадае на 19-20 гадзіну паводле менскага часу.  Прычына збольшага ясная - да гэтага часу якраз абнаўляецца зьмест старонкі, а ў нашых чытачоў на амэрыканскім кантынэнце якраз пачынаецца перапынак на абед.

У сьпісе краінаў першае месца стала трымаюць Злучаныя Штаты Амэрыкі.  Беларусь у першы месяц была на другім месцы, а цяпер, памяняўшыся з Канадай, займае трэці радок.  За першыя месяцы ў дзясятку першых уваходзілі таксама Нямеччына, Расея, Літва, Вялікабрытанія, Швэйцарыя, Польшча, Італія, Ізраіль і Вугоршчына.  Сярод рэдкіх экзатычных краінаў, дзе нас чытаюць -- Аб'яднаныя Арабскія Эміраты, Багамы, Маляйзія, Паўдзённая Афрыка, Тайвань, Таілянд.

А цяпер - пра дыялёг.  Ад нашага запуску прайшло толькі тры месяцы, а спасылкі на нашу старонку ўжо пасьпелі зьявіцца на дзясятках беларускіх WEB-сайтаў.  На жаль, наш статус не дазваляе нам адказаць ім поўнай узаемнасьцю і разьмясьціць іхныя банэры або лінкі на нашай старонцы.  Аднак, мы прынамсі можам пералічыць некаторыя зь іх у нашай перадачы.  Адрасы ў эфіры я падаваць ня буду -- гэта заняло б зашмат часу.  Спасылкі будуць пазначаныя ў інтэрнэтным варыянце чытанага мною цяпер тэксту.

Натуральна, што спасылка на старонку Беларускай Свабоды зьявілася адразу ў беларускіх WEB-каталёгах.  Беларускі WEB каталёг Янука Сякеры -- гэта частка інтэрнэтнага праекту Дранікаў (якія беларускім карыстальнікам Інтэрнэту прадстаўляць няма патрэбы).  Гэты каталёг можна знайсьці на Драніках, а таксама на WEB-сайце «Хартыі-97». Яшчэ адзін каталёг -- Беларускі WEB ад А да Я, аўтар якога, на жаль, нам невядомы. Каталёг інфармацыйных рэсурсаў «Беларускія Навіны» бясспрэчна выйграў бы любы конкурс візуальнай зручнасьці - кожны лінк прадстаўлены лягатыпам адпаведнага рэсурсу.

Паводле статыстыкі, найбольш наведнікаў, так сказаўшы, збоку, прывяла да нас, дзякуючы спасылцы на сваёй старонцы, Беларуская палічка Андруся Жвіра -- найлепшая (а можа й адзіная на сёньня) віртуальная беларуская бібліятэка.

Сярод сродкаў масавай інфармацыі першай (а можа і адзінай) спасылку на нас зьмясьціла «Наша Ніва».  Натуральна, гэтая спасылка паўтораная і ў шырэйшым віртуальным культурным праекце, які вырас на базе «Нашай Нівы» - газэце/галерэі/кнігарні/клюбе...  гэты сьпіс можна было б доўжыць, які мае назоў «Краявід».

Слухаюць нас фаны гурта НРМ празь лінк з старонкі, якую стварыў Віктар Дзятліковіч.

Зь іншых прыватных WEB-сайтаў, якія рэклямуюць Беларускую Свабоду пералічу «Беларускую старонку Кастуся Мардвінцава», арыгінальны старасьвецкі праект Міколы Пачкаева, палітычную старонку «Беларусь» Сяргея Палевікова, WEB-сайт «Рэспубліка Беларусь - Шлях да свабоды і дэмакратыі» беларускага студэнта з Бэрліну, схаванага за мянушкай«Фанкі» і вядома, старонка бэнгальскага беларуса Рашэда Чоўдгуры, які жыве ў Кувэйце.

Безумоўна, гэта далёка не вычарпальны сьпіс удзельнікаў нашага дыялёгу на Інтэрнэце, і мне прыкра адчуваць, што я чыста фізычна не магу падзякаваць усім.

На заканчэньне апошняя навіна.  Інтэрнэтная старонка Беларускай Службы Радыё Свабода апрача ранейшага, мае цяпер і спрошчаны адрас.  Вось ён:

http://www.svaboda.org

Нагадаю заадно і адрас электроннай пошты нашай інтэрнэтнай старонкі - svaboda@rferl.org.

Слухайце нас, чытайце нас у Інтэрнэце, пішыце.  Заставайцеся са Свабодай.

Сяргей Шупа, webmaster, Прага