www.svaboda.org

[ www.svaboda.org ]

пятніца, 29 жніўня 2008

Грамадзтва

графічная вэрсія

субота, 8 сьнежня 2007, 17:32

Адбылася цырымонія ўваходу Тадэвуша Кандрусевіча ў Магілёўскую архікатэдру

Галіна Абакунчык, Менск У Магілёве адбылася цырымонія ўваходу – інгрэс – кіраўніка каталіцкага касьцёлу на Беларусі ў архікатэдральны касьцёл Унебаўзяцьця Найсьвяцейшай Панны Марыі і Сьвятога Станіслава. Урачыстасьць была прымеркаваная да сьвята Беззаганнага Зачацьця Найсьвяцейшай Панны Марыі, якое каталікі адзначаюць 8 сьнежня.

Магілёўская архікатэдра сёньня зьяўляецца другой па значнасьці сьвятыняй, створанай у 1991 годзе ў Менска-Магілёўскай архідыяцэзіі. Архікатэдра была вернутая магілёўскім каталікам у 1990 годзе, дзякуючы намаганьням Тадэвуша Кандрусевіча -- тагачаснага Апостальскага Адміністратара каталікоў на Беларусі.

Як паведамляе інтэрнэт-сайт www.catholic.by, падчас урачыстай Імшы арцыбіскуп Мітрапаліт Мінска-Магілёўскі прамовіў гамілію, у якой распавёў пра гісторыю сьвятыні, пра адраджэньне веры на магілёўскай зямлі і згадаў пра свае папярэднія наведваньні магілёўскай архікатэдры.

Удзел у інгрэсе прынялі вышэйшыя духоўныя асобы каталіцкага касьцёлу і праваслаўнай царквы ў Беларусі, прадстаўнікі ўлады і грамадзкіх арганізацый. На завяршэньне моладзь менскай парафіі Найсьвяцейшай Тройцы (св. Роха) на Залатой Горцы прасьпявала вядомы «Рымскі Трыптых» Яна Паўла ІІ, пакладзены на музыку кампазітара Станіслава Сойкі.

Кананічнае ўступленьне Тадэвуша Кандрусевіча на пасаду новага Менска-Магілёўскага арцыбіскупа адбылося 10 лістапада ў архікатэдральным касьцёле Імя Найсвяцейшай Панны Марыі ў Менску.