www.svaboda.org

серада, 20 жніўня 2008

Чалавек

- Пашлі сябру! - тэкставая вэрсія

чацьвер, 5 ліпеня 2007, 17:34

Ці паедуць турысты на радзіму Васіля Быкава?

Вячаслаў Кулік, Менск Сёньня недзяржаўная газэта “Вольнае Глыбокае” надрукавала праект новага турыстычнага маршруту на Віцебшчыне. Гісторыкі й краязнаўцы даводзяць, што вандроўнікаў можна запрашаць на радзіму народнага пісьменьніка Васіля Быкава.

У вёсцы Бычкі Вушацкага раёну летам шмат турыстаў. Гасьцей вабіць музэй-сядзіба Васіля Быкава.

І менавіта ў час такога падарожжа краязнаўцы з райцэнтру Глыбокае склалі плян новага маршруту. Пачаць яго прапануецца на ацалелым бруку старога Альгердавага шляху.

Расказвае краязнаўца Ўладзімер Скрабатун:

“Уявіце, Альгердаваму шляху цяпер больш як сямсот гадоў! Вялікі князь Альгерд двойчы ішоў па ім Маскву браць. І князь Вітаўт хадзіў. Сапраўды цікавыя мясьціны.

У вёсцы Зябкі — вялікі млын. На беразе возера Доўгае месьцяцца старажытныя могілкі. Геаграфічным цэнтрам Эўропы афіцыйна вызначанае возера Шо”.

У вёсцы Зябкі ля слынных азёраў захаваўся таксама вакзал першай у Беларусі чыгункі. А ў суседнім мястэчку Празарокі — музэй заснавальніка першага прафэсійнага беларускага тэатру Ігната Буйніцкага.

За чатырнаццаць кілямэтраў ад гэтай мясьціны ў кірунку Вушачаў — радзіма Васіля Быкава. Са словаў Уладзімера Скрабатуна, акрамя легкавіка альбо аўтобуса на гэтым маршруце можна карыстацца роварам і лодкай.

“Пэрыядычна турыстычныя групы просяць паказаць тут цікавыя аб’екты. Пераважна гэта прасунутая моладзь студэнцкага ўзросту. Людзі, якія шануюць беларускую гісторыю”, — кажа Скрабатун.

Праект новага турыстычнага маршруту на Віцебшчыне падтрымлівае пісьменьніца Вольга Іпатава, аўтарка вершу “На возеры Доўгім”, гістарычнага раману “Альгердава дзіда”. Кожнае лета яна адпачывае ў Глыбоцкім раёне:

“Я лічу, што ідэя вельмі прывабная. Такі маршрут сканцэнтруе, я б сказала так, любоў да Быкава. Мы б маглі зь Менску праз Вушачу, з Полацку і Глыбокага зьяжджацца па гэтым маршруце і сустракаць розныя сьвяты. Але й турысты, у першую чаргу. Экскурсія — Беларусь, якой яны ня ведаюць, — гэта вельмі пэрспэктыўная ідэя”.

Праект новага турыстычнага маршруту на Віцебшчыне накіруюць у Глыбоцкі й Вушацкі райвыканкамы. Тым часам у наступныя выходныя краязнаўцы правядуць чарговую экскурсію ад Альгердавага шляху да музэю Васіля Быкава.

Радзіма Быкава, Віцебшчына. Брукаваны Альгердаў шлях